33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Mefibosheta: Muena Mulema

(Tshifuanyikiji tshia Luse lua Nzambi)

“Davidi wakakonka ne, Muntu mukuabo wa mu nzubu wa Shaula udi mushaleku bua meme kumufuila luse bualu bua Yonatana, anyi ? Mupika mukuabo wa mu nzubu wa Shaula wakadiku, dina diandi Siba; bakamubikila kudi Davidi; mukelenge wakamuebesha ne, Wewe udi Siba, anyi ? Yeye wakamukudimuna ne, Muntu webe nyeye. Mukelenge wakamukonka ne, Kakuena muntu mukuabo udi mushale mu nzubu wa Shaula bua meme kumufuila luse lua Nzambi, anyi ? Siba wakambila mukelenge ne, Muana mukuabo wa Yonatana udi mushale, yeye udi mulema. Mukelenge wakamuebesha ne, Yeye udi kudi kunyi ? Siba wakambila mukelenge ne, Mona, yeye udi mu nzubu wa Maki, muana wa Amiele, mu Lo-deba. Pashishe mukelenge Davidi wakatuma bantu bakamuumusha mu nzubu wa Maki, muana wa Amiele, wa mu Lo-deba. Mefibosheta, muana wa Yonatana, muana wa Shaula, wakalua kudi Davidi; wakatua mpala wandi panshi, wakamukukuila. Davidi wakamba ne, Mefibosheta. Yeye wakamukudimuna diyi ne, Tangila, muntu webe ! Davidi wakamuambila ne, Kutshinyi, bulelela, nenkufuile luse bualu bua Yonatana, tatu webe; nenkupingishile buloba buonso bua Shaula, kaku webe; wewe neudie bidia ku mesa anyi matuku onso. Yeye wakamukukuila. Yeye wakakonka ne, Muntu webe udi bu nganyi bua wewe udi utangila mbua mufue bu meme ? (2 Samuele 9:1-8).

Davidi udi uleja muana wa muena lukuna wende luse lua Nzambi

 Mu matuku aa Shaula wakadi mukelenge wa Bena Isalele, kadi bienzedi biende biakadi bibi be. Yeye wakateta kushipa muena mudimu wende Davidi misangu ya bungi nunku Davidi wakanyema, wakashala mu bipela, mu mikuna, muitu ne mu nyongola, kadi Nzambi wakamulama ne bantu bende. Davidi wakadi musungudibue kudiye bua kuikala mukelenge wa bantu bende mu muaba wa Shaula.

 Dituku dikuabo Shaula ne basalayi bende bakaya bua kufuilangana ne Bena Peleshete. Bena Peleshete bakabatamba bukole, bakashipa Shaula ne muanende Yonatana kabidi. Pakumvua Davidi lumu elu, yeye wakanyingalala bikole be. Wakakonka ne, “Muntu mukuabo wa mu nzubu wa Shaula udi mushaleku, anyi ? ” Udi musue kuleja luse lua Nzambi kudi bena diku dia muena lukuna wende bikala umue ushala.

Malu aa adi atuambila bua Lumu Luimpe lua luse lua Nzambi

a) Davidi udi musue kuleja luse lua Nzambi, “bualu bua Yonatana”.

Yone wakafunda ne, “Bana banyi bakese, ndi nufundila mukanda, bualu bua mibi yenu yakabuikidibua bua dina diende”. (1 Yone 2:12). Kutshiamba ne, Bua dina dia Yesu. Mukanda wa Nzambi udi wamba ne, “Mu munga muntu yonso kamuena lupandu, bualu bua kakuena dinga dina muinshi mua diulu, dipa bantu, didi dimanye mua kutusungila”. (Bienzedi 4:12).

b) Mefibosheta udi kule kudi nzubu wa Davidi mu Lo-deba. Muaku, Lo-deba. udi wamba bua “muaba kayi ne bia kudia”. Yeye wakadi mulema kabidi.

Mefibosheta mu Lo-deba udi tshifuanyikiji tshia muntu kayi mumanye mua kuenda bua kusankisha Nzambi, udi kayi ne ditekemena, kayi ne ditalala dia Nzambi mu mutshima wanyi.

 c) Davidi udi utuma bantu bua kumusha Yonatana mu Lo-deba.

“Nzambi wakatamba kuleja luse luende kutudi mu muanda ewu ne, Patutshivua bantu babi, Kilisto wakatufuila. Mu muanda ewu mudi dinanga, kembua tuetu tuakunanga Nzambi, kadi bua yeye wakatunanga, wakatuma Muana wende bu mulambu wa kubuikila nawu mibi yetu”. (Lomo 5:8. 1 Yone 4:10).

 d) Mefibosheta udi wambila Davidi ne,“Muntu webe udi bu nganyi bua wewe udi utangila mbua mufue bu meme ? ”

Padi muntu mubi wela meji bua tshikadilu tshiende ku mesu kua Nzambi, Lumu Luimpe lua Nzambi, bualu bua Muana wende, udi lumu luimpe bua bualu buende. Kadi bua kupeta kubuikidila kua mibi yende ne ditalala ne Nzambi, budiye nabu mbua kudipuekesha ne kuyitonda. Mukanda wa Nzambi udi wamba ne, “Bituatonda mibi yetu, yeye udi wa kueyemenyibua ne udi ne buakane bua kubuikidila mibi yetu, ne bua kutulengesha ku malu mabi onso”. (1 Yone 1: 9).

 e) Mukelenge Davidi udi wambila Mefibosheta meyi a luse. Udi musue Mefibosheta bua kushala pepi nende, bu muena diku, bu umue wa bana ba mukelenge, kayi ne buowa.

Lumu luimpe lua ngasa wa Nzambi udi lumu luimpe lua ditalala. Nzambi udi “Nzambi wa ditalala”. (Ebelu 13:20). Mukelenge Yesu utshidi wambila bantu bende ne, “Ndi nushila ditalala, ndi nupa ditalala dianyi; tshiena nupadi bu mudi ba pa buloba banupadi. Mitshima yenu kayizakadi, kayitshinyi”. (Yone 14:27).

 f) Mu ngasa ne mu dinanga, mukelenge Davidi udi wambila Siba, muena mudimu wa Shaula, ne, Mefibosheta, muana wa mukelenge webe, “neadie bidia ku mesa anyi tshiendelele”. Davidi wakamba kabidi ne, “Yeye neadie bidia ku mesa anyi bu umue wa bana ba mukelenge … nunku Mefibosheta wakashikama mu Yelushalema; wakadia bidia ku mesu a mukelenge matuku onso”. (2 Samuele 9:11,13).

Dibikila dia Mukelenge Yesu lelu didi ne, “Tangila, ndi mudimanyike ku tshibi, ndi nkokelaku. Biunvua muntu diyi dianyi, ne udi ungunzuluila tshibi, nembuele kudiye, nendie nende bidia, ne yeye neadie nanyi”. (Buakabuluibua 3:20). Dibikila dia Mukelenge didi kudi muntu ne muntu. Udi musue bantu bende bua kushala pepi nende, mu buobumue nende.

Mukelenge Davidi wakafunda Musambu 23 mu Mukanda wa Nzambi: “Yehowa udi mulami wanyi, tshiena nkengela tshintu … wewe udi ulongolola mesa ku mesu kuanyi kumpala kua badi nanyi lukuna; udi wela manyi pamutu panyi, lupanza luanyi ludi lupongoloka. Bulelela buimpe ne luse nenbindonde matuku onso a muoyo wanyi; nengikale mu nzubu wa Yehowa tshiendelele”. (Musambu 23:1,5,6).

Teta, ulabule, unvue ne, Yehowa udi muakane;
disanka didi kudi muntu udi unyemena kudiye!”
(Musambu 34:8).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.