Tutangile kudi Yesu

(Nyoka mubishibue kulu kua Mutshi)

"Bantu bakajiana Nzambi ne Mose kabidi ne, Nuakatulufuila mu Ejipitu bua kutufuisha mu tshipela nunku bua tshinyi? Kakuena bia kudia, kakuena mayi, ne bidia ebi bia tshianana biakututonda. Yehowa wakatuma nyoka idi isuma bu kapia kosha munkatshi mua bantu; yakasuma bantu; bantu ba bungi ba Isalele bakafua". (Nomba 21:5,6).

 Bena Isalele bakadi bapika mu Ejipitu, Nzambi wakabapatula bua kulua nabo bua kupiana buloba buakalayeye batatu babo. Mu luendu luabo, bantu bakajiana mana, "blé wa mu diulu". (Musambu 78:24). "Bakateta Nzambi mu mitshima yabo ... E, bakajiana Nzambi; bakakonka ne, Nzambi udi mua kulongolola mesa a bia kudia mu tshipela, anyi?" (Musambu 78:18,19). Mukelenge Yesu wakambila Bena Yuda bakuabo ne, "Ndi bianyi bidia bia muoyo. Bankambua benu bakadia mana mu tshipela bakafua. Ebi mbidia bitu biafuma mu diulu, bua muntu kudia biende, kafu". (Yone 6:48-50). Pakajiana Bena Isalele Nzambi ne Mose, bualu buakadi bukole ku mesu a Nzambi. Mana, "blé wa mu diulu", adi atuambila bualu bua Mukelenge Yesu, "bidia bilelela bia mu diulu". (Yone 6:32).

Satana: "nyoka awu wa kale"

 Satana wakadinga Eva, pashishe Adama wakapanga."Nunku, bu muakalua bubi pa buloba bualu bua muntu umue, ne bu muakalua lufu bua bubi abu, nunku lufu luakafika kudi bantu bonso, bua bonso bakenza malu mabi". (Lomo 5:12).

Nzambi udi mubanji mu luse

 "Bantu bakalua kudi Mose, bakamba ne, Tuakuenza bibi bualu bua tuetu tuakujiana Yehowa ne wewe kabidi, ulombe Yehowa atumushile nyoka munkatshi muetu. Mose wakalombela bantu Nzambi. Yehowa wakambila Mose ne, Enza biebe nyoka ne mubidi bu kapia, umuteke kulu kua mutshi; nunku pamutangila muntu musumibue, neikale ne muoyo. Mose wakenza nyoka ne tshiamu tshia mitaku, wakamuteka kulu kua mutshi, pashishe pakatangila muntu musumibue nyoka wa tshiamu tshia mitaku, wakadi ne muoyo kabidi". (Nomba 21:7-9).

Bantu badi batonda bubi buabo

 Pakambila Bena Isalele Mose ne, Tuakuenza bibi, utulombele Nzambi, Nzambi wakabenzela mushindu bua bantu basumibue kuikala ne muoyo. Pakatangila muntu musumibue kudi nyoka wa tshiamu tshia mitaku kulu kua mutshi, wakadi ne muoyo. Mukelenge Yesu wakamba ne, "Bu muakabisha Mose nyoka mu tshipela, nunku budi Muana wa muntu nabu mbua kubishibua muomumue; bua muntu yonso witabuja ikale ne muoyo wa tshiendelele bualu buende. Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende kadi ikale ne muoyo wa tshiendelele". (Yone 3:14-16).

 Mukelenge Yesus wakamba ne, "Nakuluila bua bantu bapete muoyo, baupete muvule". (Yone 10:10).

Tutangile kudi Yesu

 "Kanuena bamanye, anyi, ne, Bantu badi balumbila lubilu mu tshilumbilu badi balumbila bonso, kadi umue wabo udi wangata bukenji? Lumbilayi bienu nunku, bua nuenu nuangate bukenji. Muntu yonso udi utetangana bukole ne bakuabo mu manaya udi udikanda mu malu onso. Bonso badi benza nunku bua kuangata tshifulu tshia butumbi tshidi tshisunsuke, kadi tuetu mbua kuangata tshidi katshiyi tshisunsuke". (1 Kolinto 9:24-27). "Nunku, tuetu kabidi, bualu bua tudi tunyungulukibua ne tshisumbu tshinene nunku tshia bamanyi, tumushayi bujitu buonso, ne malu mabi adi bualu butekete bua kutulenduisha, tuidikishe ne kutantamana tshidikishilu tshietu tshia lubilu tshidi tshitekibua kumpala kuetu, batangila kudi Yesu, mubangi ne mushikishi wa ditabuja dietu, yeye, bua disanka diakatekibua kumpala kuende, wakakankamana pakakengeye ku mutshi mutshiamakane, wakalengulula bundu, ne wakushikama ku tshianza tshikole tshia nkuasa wa butumbi wa Nzambi". (Ebelu 12:1,2).

Ndi ngenza bualu bumue

 Mupostolo Paulo wakamba ne, "Ndi ngenza bualu bumue: Pandi mpua muoyo bua malu a kunyima, pandi ndobelela ku malu adi kumpala, ndi ntshinta bua kufika ku ndekelu wa njila bua kuangata bukenji bua dibikila dia mulu dia Nzambi mu Kilisto Yesu". (Filipoi 3:13,14). Pakafikeye pepi ne nshikidilu wa muoyo wende pa buloba wakadi mua kuamba ne, "Nakuluangana mvita mimpe, nakushikisha tshidikishilu tshia lubilu, nakulamata ditabuja; tshidi kumpala mpindiewu ntshifulu tshia butumbi tshia buakane bua Nzambi tshintekela, tshialua Mukelenge mulumbuludi muakane kumpa dituku diadia; kena utshimpa anu meme, kadi neatshipe bonso kabidi badi basue dimueneka diende". (2 Timote 4:7,8).

 Mupostolo Paulo wakamba ne, "Nuikale bidikishi banyi, bu mundi meme kabidi muidikishi wa Kilisto". (1 Kolinto 11:1). Tulonde mu makasa ende.

Tutangile kudi Yesu,
"mubangi ne mushikishi
wa ditabuja dietu".
(Ebelu 12:2).