Yehowa udi Mulami Wanyi
Musambu 23

1 Yehowa udi mulami wanyi, tshiena nkengela tshintu; 2 yeye udi undadika mu mitoloka ya mashinde. Udi undombola pepi ne mayi adi talalaa; udi ukankamasha mutshima wanyi. 3 Udi undombola mu njila ya buakane bualu bua dina diandi. 4 Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi; tshibongo tshiebe ne tshibangu tshiebe bidi binsamba. 5 Wewe udi ulongolola mesa ku mesu kuanyi kumpala kua badi nanyi lukuna; udi wela manyi pa mutu panyi, lupanza luanyi ludi lupongoloka. 6 Bulelela, buimpe ne luse nebindonde matuku onso a muoyo wanyi; nengikale mu nsubu wa Yehowa tshiendelele (Musambu 23).

Mufundi wa musambu udi mukelenge Davidi

 Davidi wakitabuja Nzambi mu busongalume buandi, musangu mukuabo pakadiye ulama mikoko ya tatu wandi mu madimi a Beteleheme. Yeye kakatshina nyama ya luonji yakalua kukuata mikoko. Dituku dikuabo nyama wa ntambue wakakuata muana wa mukoko. Davidi wakamulonda, wakasungila muana wa mukoko mukana muandi, wakamushipa (1 Samuele 17:34-37).

 Musambu 23 udi musambu udi ukolesha mitshima ya bantu ba Nzambi kuonso. Musambu wakadi mufundibue mu matuku a Dipungila Dikulukulu kadi udi musambu munangibue wa bungi mu bikondo bionso.

 Musambu ewu udi utuvuluija bualu bua Mulami Muimpe wa Mikoko wa mu Dipungila Dipia-dipia: Mukelenge Yesu Kilisto. Yeye wakamba ne, “Ndi mulami muimpe wa mikoko; mulami muimpe udi ufuila mikoko” (Yone 10:11).

Udi uladika mikoko yandi mu mitoloka ya mashinde

 Mulami Muimpe udi uladika mikoko yandi mu mitoloka ya mashinde (Mvese 2). Mikoko kayena idiunda bimpe mu madimi adi manyanguke, masama adi ayikuata. Mikoko idi ne mashinde makane bualu! Mulami muimpe udi ulombola mikoko yandi mu madimi adi malengele. Bantu ba Mukelenge badi ne bia kudia bimpe bua kudiunda mu malu a Nzambi. Bia kudia biabo bidi Diyi dia Nzambi. Mukelenge Yesu wakamba ne, “Bakafunda diyi ne, Muntu kikadi biandi ne muoyo bualu bua bidia nkayabi, ikale biandi nawu bualu bua meyi onso adi alupuka mukanu mua Nzambi” (Matayo 4:4).

Mikoko idi ne mayi malengele bualu

 Mu tshikondo tshia munya mukole mikoko idi ne mayi malengele bualu. Davidi wakamba ne, “Udi undombola pepi ne mayi adi talalaa” (mvese 2). Mukelenge Yesu wakambila mukaji wa mu Samalea wakakalua bua kusuna mayi ku dina dia mayi dia mu musoko wa Suka ne, “Wanua mayi aa neikale ne nyota kabidi, kadi wanua mayi anamupa kena wikala ne nyota kabidi tshiendelele; mayi anamupa neikale munda muandi bu mushimi wa mayi abanda mu muoyo wa tshiendelele” (Yone 4:13,14).

Udi ukankamaja mutshima wanyi

 Bu mikoko, tudi mua kuya muntu wandi njila muntu wandi njila kadi Mulami Muimpe udi mumanye mua kukankamaja mutshima wanyi. Mufundi wa Musambu 119:176 udi wamba ne, “Nakupambuka bu mukoko mujimine; ukebe muena mudimu webe, bualu bua tshiena mpua mikenji yebe muoyo” (Musambu 119:176). Dituku dikuabo mukelenge Davidi wakanyingalala; yeye wakamanya ne, Nakuenzela malu mabi ku mesu kua Nzambi. Bua bualu ebu wakamulomba ne, “Nzambi, unfuile luse, bu mudi luse luebe lujalame; ku divulangana dia luse luebe, unjimishile matomboka anyi, unguvuwe tshishiki ku mapambuka anyi, untokeshe ku bubi buanyi … umpingishile disanka dia lupandu luebe, unshindike ne mutshima wa mua kuenza bu mu disua diebe” (Musambu 51:1,2,12).

Wikale Mulombodi wanyi

 Pakenda Davidi pepi ne Mulami Muimpe yeye wakamanya mua kuamba ne, “Udi undombola mu njila ya buakane bualu bua dina diandi” (Mvese 3). Yeye wakafunda ne, “Undombole biebe mu bulelela buebe, unyishe; bualu bua wewe udi Nzambi wa lupandu luanyi; ndi nkuindila wewe dinda too ne ku dilolo. Bualu bua wewe udi dibue dianyi ne ngumbu yanyi ya mvita; nunku, bualu bua dina diebe wikale mulombodi wanyi, undombole mu njila. Unyishe mua kuenza bu mudi disua diebe, bualu bua wewe udi Nzambi wanyi. Nyuma webe muimpe andombole bu buloba bulandakane” (Musambu 25:5. 31:3 143:10).

Bulami ne busambi bua Mulami Muimpe

 Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi; tshibongo tshiebe ne tshibangu tshiebe bidi binsamba (Mvese 4).

 Balami ba mikoko bakadi ne bibongo biabo bua kulama mikoko yabo kadi bakadi bibangu biabo kabidi. Davidi wakafunda ne, “bidi binsamba”. Tudi tusambibue patuamanya ne tudi mu bianza bia Mulami Muimpe udi utunanga!

 Diyi dia Nzambi didi diamba ne,“Nuikale bapole, nutabale; muena lukuna wenu, diabolo mene, udi wendakana bu nyama wa ntambue udi ukungula, ukeba bantu ba kudieye” (1 Petelo 5:8). Bena kuitabuja badibo nabu mbua kuikala badimuke: “Satana mene udi udiandamuna bu muanjelo wa munya” (2 Kolinto 11:14). Padi mikoko pepi ne mulami wayi, idi mua kulala panshi kayiyi ne ditshina. Muomumue muena kuitabuja udi pepi ne Mukelenge Yesu udi mua kushala talalala mu dinanga dia Musungidi wende udi umulama ku malu mabi.

Lupanza luanyi ludi lupongoloka

 Wewe udi ulongolola mesa ku mesu kuanyi kumpala kua badi nanyi lukuna; udi wela manyi pa mutu panyi, lupanza luanyi ludi lupongoloka (Mvese 5).

 Dituku dikuabo Yesu wakalua ku Betania, kuakadi Lazalo wakabisheye ku lufu. Balunda bandi bakamulambishila bidia bia butuku (Yone 12:1,2). Lazalo wakadi mukuabo wa bakadi bashikame ne Yesu ku mesa. “Bakuidi banene bakasangisha diyi diabo bua kushipa Lazalo kabidi, bua Bena Yuda ba bungi bakadi bumuka bitabushila Yesu bua bualu buandi” (Yone 12:10,11). Kadi Lazalo wakadi mushikame ne Yesu ku mesa mu ditalala. Tuela meji bua disanka diandi ne dia bonso bakadi bashikame ne Mukelenge Yesu ku mesa. Tshiena ne mpata ne, Lazalo ne buonso buabo bakadi mua kuamba ne Davidi ne, “Lupanza luanyi ludi lupongoloka.”

Mikoko yanyi kayena ifue tshiendelele

 Bulelela, buimpe ne luse nebindonde matuku onso a muoyo wanyi; nengikale mu nsubu wa Yehowa tshiendelele (Mvese 6).

 Mukelenge Yesu wakamba ne, “Nakuluila bua bantu bapeta muoyo, baupete muvule” (Yone 10:10). “Mikoko yanyi idi yunvua diyi dianyi, ndi muimanye, idi indonda; ndi nyipa muoyo wa tshiendelele; kayena ifua tshiendelele; kakuena mukuabo udi winyenga mu tshianza tshianyi” (Yone 10:27,28).

 Davidi udi mumanye ne, Nakusangana luse ku mesu kua Mukelenge. Yeye udi unkuatshisha ne bintu bionso bindi nabi bualu. Yeye udi mumanye ne, “Yehowa udi mulami wanyi, tshiena nkengela tshintu” (Mvese 1), udi wambila bantu mu Musambu 34:8 ne, “Teta, ulabule, unvue ne, Yehowa udi muakane; disanka didi kudi muntu udi unyemena kudiye!”

“Nzambi wa ditalala wakabisha mulami munene wa mikoko munkatshi mua
bafue kabidi ku mashi a dipungila dia tshiendelele, Mukelenge wetu
Yesu mene, anuvuije bakane tshishiki mu bualu buimpe buonso bua kuenza
bu mu disua diandi, wenza munda muetu bualu budi buimpe ku mesu
kuandi bua Yesu Kilisto; butumbi buikale kudiye
ku bikondo ne ku bikondo. Amen.”
(Ebelu 13:20,21)