Misambu 22

Nzambi wanyi, Nzambi wanyi, wakundekela tshinyi? Bualu kayi wewe udi aku kule kuyi unkuatshisha, kuyi unvua meyi a kutua kuanyi kua mikemu?... Kadi wewe udi wa tshijila, udi mushikika mu nkuasa wa butumbi munkatshi mua butumbi bua Bena Isalele (Musambu 22:1,3).

 Musambu 22 udi mu bitupa bibidi. Muadi: Mu mvese 1-21 tudi tubala bualu bua makenga a Mukenge wetu Yesu Kilisto ne lufu luende pa mutshi mutshiamakane. Mu mvese 22-31 tudi ne Musambu wa Yeye udi utamba mu bukole.

 Tshitupa tshia kumpala tshia mu Musambu 22 tshidi tshituambila bualu bua makenga a Mukelenge ku tshianza tshia Nzambi bualu bua bubi bua bantu ne bua makenga andi ku tshianza tshia Bena Yuda ne ku tshianza tshia Bena Lomo. Malu mafunda mu Mukanda wa Musambu ewu adi bua bualu buandi (Tangila Luka 24:44,45).

 Nzambi wakatuma midima pa buloba pakadi Mukelenge wetu pa mutshi mutshiamakane. Matayo udi utuambila ne, “Midima yakadi pa buloba buonso munda munya too ne diba pa isatu. Pakafika diba pa isatu, Yesu wakela diyi diandi bikole ne, Eloi, Eloi, lama sabakatani? Kukudimuna kua muaku ne, Nzambi wanyi, Nzambi wanyi, wakundekela tshinyi?” (Matayo 27:45,46. Musambu 22:1).

Nzambi wetu udi Nzambi wa tshijila

 Nzambi wetu udi Nzambi wa dinanga kadi yeye udi Nzambi wa tshijila kabidi (mvese 3). Mukelenge Yesu wakamanya ne, Kakuena njila mukuabo bua kusungila ba pa buloba ku tshiji tshiakane tshia Nzambi bualu bua bubi, nunku Yeye wakalua mu Diulu “bua kufila muoyo wandi bua kupikula nawu bantu ba bungi” (Matayo 20:28). “Yeye nguakadi kayi mumanye bubi, Nzambi wakamuvuija bubi bua bualu buetu; bua tuetu tuikale buakane bua Nzambi munda muandi” (2 Kolinto 5:21).

Mukelenge Yesu wakadi mupetudibue kudi bantu

 Kadi meme panyi ndi munanyi, tshiena muntu; ndi tshidibo bapetula kudi bantu, ndi mulenguludibue kudi bantu. Bonso badi bantangila badi banseka, badi banfunkuna mishiku, badi bakupa mitu, bamba ne, Wakadifila kudi Yehowa; yeye amusungile, yeye amupandishe, bualu bua udi usanka bualu buandi!(Musambu 22:6-8).

 Muprofete Yeshaya wakafunda bua makenga a Mukelenge Yesu ne: “Bakamulengulula, bakamulekela kudi bantu; wakadi muena kanyinganyinga, wakamanya makenga; wakadi bu muntu udi bantu basokoka mpala yabo kudiye, wakadi mupetudibue, ne katuaku-muanyisha nansha” (Yeshaya 53:3). “Bakuidi banene ba Nzambi ne bafundi ne bakulu bua bantu bakamuseka nunku, bakamba ne, Yeye wakadi usungila bakuabo, kena mumanye mua kudisungila ... Yeye udi weyemena Nzambi; Nzambi amusungile, bikaleye mumusue” (Matayo 27:41-43).

Bakuntapa mputa misompoke mu bianza ne mu makasa

 Ndi mupongoloke bu mayi, mifuba yanyi yonso idi mipauke mu manungu ayi; mutshima wanyi udi bu dipula, wakufingatuka munda muanyi. Bukole buanyi buakuuma bu tshiyoyi tshia luesu, ne ludimi luanyi ludi lulamata tshilakalaka tshianyi. Wewe udi undadika mu dinfuenkenya dia lufu. Bualu bua mbua yakunnyunguluka, tshisumbu tshia benji ba malu mabi tshidi tshingela munkatshi; bakuntapa mputa misompoke mu bianza ne mu makasa. Ndi mua kubala mifuba yanyi yonso (Musambu 22:14-17).

 Lufu lua pa mutshi mutshimakane, luakadi lufu lukole be, lua buowa bunene ne lua bundu. Bena Yuda, bilondeshile pa bilele biabo, pakashipabo muntu, bakamukuma mabue (Bienzedi 7:58). Bua bualu ebu, bakafila Mukelenge Yesu mu bianza bia Bena Lomo bua kushikija meyi adi mafunda mu Diyi dia Nzambi bua bualu buandi (Matayo 26:56. Mako 14:49). Mukelenge nakayandi wakamba bua lufu luandi pa mutshi mutshia-makane. Yeye wakambila Nikodemo, mulopo wa Bena Yuda ne, “Bu muakabisha Mose nyoka mu tshipela, nunku budi Muana wa muntu nabu mbua kubishibua muomumue; bua muntu yonso witabuja ikale ne muoyo wa tshiendele bualu buandi. Bualu bua Nzambi wakatamba kusua ba pa buloba, yeye wakabapa Muandi umuepele mulela bua muntu yonso wamuitabuja kafu biandi, kadi ikale ne muoyo wa tshiendele” (Yone 3:14-16).

 Dinanga dia Mukelenge Yesu didi dinene be. Yeye wakalua, mutumibue kudi Tatu wende, bua kuleja ba pa buloba dinanga dia Nzambi. “Pakamuekeye mu tshifuanykiji tshia muntu, yeye wakadipuekesha, wakalua mutumikidi too ne ku lufu, ku lufu mene lua pa mutshi mutshiamakane” (Filipoi 2:8).

Badi babanyangana bilulu bianyi munkatshi muabo

 “Badi banjosha talalaa, badi bangosha mesu. Badi babanyangana bilulu bianyi munkatshi muabo, badi belela bivualu bianyi nshobo” (Musambu 22:17,18).

 “Masalayi, pakamukuminawu milonda mu bianza ne ku makasa ku mutshi mutshiamakane, akangata bilulu biandi akabanyangana anayi, disalayi biadi, disalayi biadi; ne tshikowelu tshiandi kabidi, kadi tshikowelu katshiakadi ne mitelu, tshiakadi tshikuma tshijima kulu too ne panshi. Bakambilangana ne, Katutshipandi, tutshielele nshobo ne tshikala nganyi; nunku bakashikija diyi diakafundabo mu Mukanda wa Nzambi ne, Bakabanyangana bilulu bianyi, bakela tshikowelu tshianyi nshobo” (Yone 19:23,24).

Unsungile mukana wa nyama wa ntambue

 Unsungile mukana mua nyama wa ntambue, usungila muoyo wanyi mukengeshibue ku lufu lua ku nsengu ya mbowa! (Musambu 22:21).

 Nzambi wakumvua dilomba dia Mukelenge wetu Yesu Kilisto. Wakamubisha munkatshi mua bafue (Ebelu 13:20).

 Mukana mua nyama wa ntambue ne lufu lua ku nsengu ya mbowa bidi binuvuluija bualu bua Satana ne bua bena lukuna ba Mukelenge. Yesu wakambila balombodi ba Bena Yuda pakaluabo bua kumukuata mu Getesemene, ne, “Edi diba ndienu ne bukokeshi bua midima” (Luka 22:53). Mukelenge wakadifila mu bianza biabo.

Tshitupa Tshibidi

Musambu wa Yeye udi utamba mu Bukole

“Nengambile bana betu bua dina diebe; nenkutumbishe munkatshi mua ba mu disangisha dia bantu ba Nzambi. Nuenu badi batshina Yehowa, numutumbishe! Nuenu, bana bonso ba Yakoba, numutumbishe; nuenu, bana bonso ba Isalele, nukuatshike buowa ku mpala kuandi!” (Musambu 22:22).

 Katataka tudi ne musambu wa Yeye udi upita bena lukuna bandi bonso bukole. Mukelenge Yesu kena ufua bundu bua kubikila bantu bandi ne, Bana betu, “wamba ne, Nengambile bana betu dina diebe, munkatshi mua bena ekeleziya nengimbe misambu ya kukutumbisha nayi” (Ebelu 2:11,12).

Ku lufu luandi Mukelenge Yesu wakavuija bukole bua Satana tshianana

 “Bualu bua bana bakuabanyangana mubidi ne mashi, yeye [Yesu] muine kabidi wakadiangatshila bintu binebe muomumue; bua ku lufu luandi yeye amuvuje tshianana udi ne bukole bua lufu, ndiabola mene; ne bua yeye apikule bonso aba bakadi bakuatshibue mu bupika matuku onso a muoyo wabo bua ditshina diabo dia lufu” (Ebelu 2:14,15). Bualu bua Yesu wakapita Satana bukole ne wakavuija bukole buandi tshianana bantu bandi badi mua kumupita bukole kabidi.

Badi ne mitshima mipuekele nebadie, nebukute; badi bakeba Yehowa nebamutumbishe (Musambu 22:26).

 “Bualu bua yeye udi upa muntu tshidiye ujinga, ne udi ukutshisha muena nzala ne bintu bimpe” (Musambu 107:9). Miaku eyi idi meyi a bushuwa bua bikondo bionso.

Mukelenge Yesu neapingane bua kujadika bukelenge buende pa buloba

 Ba mu kunfudilu kua buloba nebamuvuluke, nebakudimune mitshima yabo kudi Yehowa. Ba mu biota bionso bia bisamba bia bantu nebatendelele kumpala kuebe. Bualu bua bukelenge budi bualu bua Yehowa, ne yeye udi mukokeshi wa bisamba bia bantu (Musambu 22:27,28).

 Mukanda wa Nzambi udi wamba bua dituku dilualua palua Mukelenge Yesu Kilisto bua kulumbuluisha ba pa buloba mu buakane (Buakabuluibua 19:11-16). Mu dituku adi, “Ba mu kunfudilu kua buloba nebamuvuluke, nebakudimune mitshima yabo kudi Yehowa” (Musambu 22:27). “Mu matuku andi bantu bakane nebikale ne diakalengele, ditalala divule nedikaleku too ne pajimina ngondo tshiendelele” (Musambu 72:7). “Yeye nealumbulule bilumbu bia munkatshi mua bantu ba bungi, neakose bilumbu bia bisamba binene bia bantu bidi kule; bobo nebangate miele yabo ya mvita, nebayifule nkasu ya kudima nayi ... tshisamba tshikuabo tshia bantu katshiena tshibisha muele wa mvita bua kuluisha nawu tshinga tshisamba; kabena mua kuyila lungenyi lua kuluangana nalu mvita kabidi” (Mika 4:3).

“Yeye wakubenza”

 Tunkanunuina tua bantu netumukuatshile mudimu. Bantu nebambile bena mulongo udi ubalonda ku nyima bualu bua Mukelenge. Nebambile bantu badi kabayi banze kuledibua bua buakane buandi, nebabambile ne, Yeye wakubuenza (Musambu 22:30,31).

 Pa mutshi mutshiamakane Mukelenge Yesu wakamba ne “Bualu buakushika; waki-nyika mutu, wakapuola muoyo” (Yone 19:30). Mudimu wa bupikudi wakashikijibua ku butumbi bua Nzambi (Yone 17:4). Bantu ba mu bikondo bionso nebambe ne, Yeye wakubuenza. “Nunku tuetu bantu bebe, mikoko ya mu tshidilu tshiebe tshidi ne mashinde, netukusakidile tshiendelele; netumanyishe ba mu bikondo bionso butumbi buebe” (Musambu 79:13).

Patuatangila nkulusu kuakafua Mfumu wa muoyo,
Bubanji budi butupu, kudisua kuetu, ke bundu.
Tshifulu tshiende tshia meba, makasa, lubadi, bianza,
Biakatuleja makenga, bimanyinu bia dinanga.
Tufile mulambu kudiye wa misambu ya mitshima,
Disakidila dia bushuwa, kudi Kilisto wa Nzambi.
Misambu ya Bidia bia Mukelenge
No. 50 - Mvese 1,3,4.