33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Numanye Bena Lukuna Benu

Tudi basue kuela meji bualu bua malu asatu matedibue mu Mukanda wa Nzambi adi mua kupumbisha muena Kilisto mu kuenda kuende mu njila wa ditabuja. Didi ne:

 1) Malu a ba pa buloba muinshi mua bukokeshi bua Satana. 2) Malu a mubidi adi malu mabi ku mesu kua Nzambi. 3) Muena lukuna wa Nzambi ne bantu bende: Satana.

Buloba

Mukanda wa Nzambi udi wamba bualu bua buloba mu mishindu mishilangane.

Buloba bua bufuki bua Nzambi budi buleja butumbi bua Nzambi, bukole buende ne lungenyi luende. “Yeye wakafuka tshintu tshionso tshiakane mu tshikondo tshiatshi”. (Muambi 3:11). “Diulu didi diamba butumbi bua Nzambi; bia mu diulu bibaluluke bidi bimuenesha midimu ya bianza biende”. (Musambu 19:1).

 Kadi Mukanda wa Nzambi udi wamba bualu bua buloba bukuabo - buloba muinshi mua Satana ne bantu bende. Pakadi Mukelenge Yesu pepi ne bua kuteka muoyo wende panshi, wakambila bayidi bende ne, “Tshiena nuambila malu makuabo a bungi, bualu bua mukokeshi wa buloba ulualua, yeye kena nanyi bualu munda muanyi”. (Yone 14:30).

 Ku tshikondo atshi Mukelenge Yesu, pakalombeye Tatu wende, wakamba bualu bua bantu bende ne, “Bobo kabena ba pa buloba, bu mundi meme tshiyi wa pa buloba. Ubajidile mu bulelela: diyi diebe mbulelela”. (Yone 17:16,17).

 Mupostolo Yone wakafundila bantu ba mu tshiota tshia Nzambi bua ba pa buloba bakuabo muinshi mua bukokeshi bua Satana ne, “Bana bakese, nudi ba Nzambi, nuakubapita bukole; bualu bua yeye udi munda muenu udi upita yeye udi wa mu buloba bunene. Bualu bua muanda wonso udi muledibue kudi Nzambi udi upita malu a pa buloba bukole; ne edi ndipita diakupita malu a pa buloba bukole, nditabuja dietu. Nganyi muntu udi upita malu a pa buloba bukole? Anu yeye udi witabuja ne, Yesu udi Muana wa Nzambi”. (1 Yone 4:4. 5:4,5).

Malu a ba pa buloba

 Mukanda wa Nzambi udi wamba bua buloba ebu ne, “Kanusu malu a ba pa buloba, anyi bintu bia pa buloba. Biasua muntu malu a ba pa buloba, dinanga dia Tatu kadiena munda muende. Bualu bua malu onso a pa buloba, lukuka lua mubidi, ne lukuka lua mesu, ne kudisua kua muoyo, kaena mafume kudi Tatu, kadi adi mafume ku buloba. Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele. (1 Yone 2:15,17).

 Satana wakateya Eva mu Budimi bua Edene ne malu asatu matedibua mu 1 Yone 2:16: adi lukuka lua mubidi, lukuka lua mesu, ne kudisua kua muoyo. (Genese 3:4-6). Eva wakapanga! Pakadi Mukelenge Yesu mutedibue mu tshipela kudi Satana ne malu aa asatu, Yeye kakapanga nansha. Mukelenge wakamuandamuna ku Diyi dia Nzambi. Satana kawakadi mua kuimana kumpala kuende. (Matayo 4:10,11). Diyi dia Nzambi nedilame mitshima yetu ku mateyi a Satana.

Mubidi

 Mupostolo Paulo wakafunda ne, “Ndi mumanye ne, Munda muanyi, mu mubidi wanyi mene, kamuena muikale bualu buimpe; bualu bua disua dia kuenza bimpe didi kundi, kadi bukole bua mua kuenza nabu bimpe kabuenaku. Bualu bua muanda muimpe undi musue kuenza, tshiena ngenza, kadi muanda mubi undi tshiyi musue kuenza, ewu ngundi ngenza”. (Lomo 7:18,19).

 “Malu mabi adi mubidi wenza adi amueneka ne, Tshiendenda tshia malunda mabi, meji mabi, masandi, ditendelela dia mpingu, kupaka kua manga, lukuna, kutandangana, mukawu, tshiji, kutapuluka, mpata, diyoyo, mutshiaudi, bukuatshiki bua maluvu, manaya a bundu ne malu aa onso; ndi ndianjila kunudimuja bu munakamana kunudimuja diambedi ne, Bantu batu benza malu aa kabena bapiana bukelenge bua Nzambi”. (Galatia 5:19-21).

 Malu aa adi malu a ba pa buloba kabayi ne Nzambi. Kadi Paulo wakafunda kabidi ne, “Kakuena dipila mpindiewu kudi badi mu Kilisto Yesu”. (Lomo 8:1). Paulo wakadibala bu mufue ne Kilisto, yeye wakamba ne, “Muoyo undi nawu mu mubidi katataka ndi nawu mu ditabuja dia mu Muana wa Nzambi, wakannanga, wakadifila bua bualu buanyi”. (Galatia 2:20).

  “Ndi nuambila ne, Endayi mu Nyuma Muimpe, nunku kanuena nulonda lukuka lua mubidi. Bualu bua dijinga dia malu a mubidi didi difuilangana ne dijinga dia malu a Nyuma, ne dijinga dia malu a Nyuma didi difuilangana ne dijinga dia malu a mubidi; bua malu aa adi mimanyinangane, bua nuenu kanuenji malu anudi basue kuenza. Kadi binuikala balombodibua kudi Nyuma, kanuena muinshi mua mikenji”. (Galatia 5:16-18). Muena kuitabuja yonso udi ne dipa dia Nyuma Muimpe, udi Nyuma wa meji ne wa bukole. Nyuma Muimpe udi Mukuatshishi wetu mu luendu lua ditabuja. Kadi tudi mua kumunyingalaja. (Yone 14:16,17. Efeso 1:13,14. 4:30). Muena Kilisto udi mumanye mua kuenda mu njila udi usankisha Nzambi bualu bua dikuatshisha ne dilombola dia Nyuma Muimpe udi kayi munyingalajibue. Mupostolo Paulo wakamanya ne, Bikala Mukelenge kayi nanyi tshiena mumanye mua kuenza bualu, kadi wakadi mua kuamba ne, “Ndi mumanye mua kuenza malu onso mu Mukelenge udi unkolesha”. (Filipoi 4:13).

Muambi Jean

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.