33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Abalahama:

Muenyi ne Muena Luendu pa Buloba

Nzambi udi ubikila Abalahama

 Abalahama wakadi muntu wa mu musoko munene wa Ula wa Kasada. Yoshua wakambila Bena Isalele bonso ne, “Kale bankambua benu bu Tela, tatu wa Abalahama ne wa Naho, bakadi bashikama dishiya dia musulu wa Pelata [musulu Euphrate mu Irak], bakadi batendelela nzambi mikuabo” (Yoshua 24:2). Stefano wakavuluisha Bena Yuda ne, “Bana betu ne batatu, umvuayi; Nzambi wa butumbi wakamueneka kudi tatu wetu Abalahama, pakadiye mu Mespotamia, diambedi yeye kayi muanze kushikama mu Halana, wakamuambila ne, Umuke mu buloba buebe ne munkatshi mua bena kuenu, ulue mu buloba ndualua kukuleja” (Bienzedi 7:2,3).

Abalahama udi uya ku Halana ne tatu wende Tela

 Abalahama wakadi mubikidibue kudi Nzambi bua kuumuka mu Ula wa Kasada ne bua kuya mu buloba mukuabo, “mu muaba undualua kukuleja” (Genese 12:1). Bidi bimueneka ne yeye kakalonda dibikila diende kudi Nzambi lukasa, yeye wakaya ku Halana ne tatu wende Tela. Halana wakadi centre munene wa bungenda, ne bu Bena Ula, bantu bakadi batendeledi ba nzambi mikuabo, bakadi bena mpingu. Bidi bimueneka ne, Tela wakadi dipumbisha kudi Abalahama ne ku dibikila diende kudi Nzambi.

 Kunyima kua lufu lua Tela, “Abalama wakaya bu muakamba Yehowa; ne Lota wakaya nandi. Abalama wakadi ne bidimu makumi muanda mutekete ne bitanu pakumukeye mu Halana. Abalama wakangata mukaji wandi Salai, ne Lota, muana wa muanabo, ne bintu biabo bionso, ne bantu bonso bakapetabo mu Halana; bakaya mu njila wa ku buloba bua Kanana, bakafika mu buloba bua Kanana” (Genese 12:4,5).

 Pakadi Abalahama mu Ula wa Kasada, yeye wakadi mubikidibue ne, Abalama, kadi pakadi Nzambi wakapunga nandi tshipungidi, wakamuambila ne, “Kabena babikila kabidi dina diebe ne, Abalama, kadi nebakuidike dina diebe ne, Abalahama; bualu bua nakakuvuija nkambua wa bisamba bia bungi. Nzambi wakambila Abalahama ne, Kabena babikila mukaji webe, Salai kabidi, nebamubikile ne, Sala” (Genese 17:5,15). Dina Sala, kuandamuna kua muaku wa mu français didi ne, “Princesse”.

Abalahama udi wibaka tshioshelu tshiende tshia kumpala mu buloba bua Kanana

 “Abalama wakapita mu buloba, wakalua ku Shekeme, kuakadi mutshi wa telebinta wa mu Mole. Bena Kanana bakadi mu buloba tshikondo atshi. Yehowa wakamueneka kudi Abalama, wakamba ne, Nempe tunkanunuina tuebe buloba ebu. Abalama wakenzela Yehowa, wakamueneka kudiye, tshioshelu” (Genese 12:6,7).

 Yehowa wakamueneka kudi Abalahama pakadiye wenda mu njila wa ditabuja, pakadiye wenda mu njila wa disua diende. Abalahama wakitabuja mulayi wa Nzambi bua kupa tunkanunuina tuende buloba bua Kanana. Muntu kena mua kusankisha Nzambi bikaleye kayi ne ditabuja. “Bikalaku kakuyi ditabuja, muntu kena mua kumusankisha; bualu bua muntu udi ulua kudi Nzambi budiye nabu mbua kuitabuja ne, Yeye udiku, ne udi mufutshi wa badi bamukeba” (Ebelu 11:6).

 Bu muena ditabuja Abalahama, wakibaka tshioshelu tshiende tshia kumpala mu Shekeme, mu buloba bua Kanana. Bantu bakadi bena mpingu. Tshioshelu tshia Abalahama tshiakadi bumanyishi kudi Nzambi wa muoyo ne wa bushuwa. Tshioshelu tshiandi tshiakaleja ne yeye wakalua kumpala kua Nzambi ne disakidila bua luse luende kudiye. Mukanda wa Nzambi udi wamba ne, “Nusanke misangu yonso; nuikale nutendelelatendelele; mu malu onso nusakidile Nzambi, bua edi ndisua dia Nzambi mu Kilisto Yesu bua bualu buenu” (1 Tesalonike 5:16-18).

Katuena ne tshioshelu tshia mabue anyi tshia mabaya bualu lelu

 Kadi tudi ne tshioshelu! Musangu mukuabo, mu matuku a Ekeleziya wa kumpala, Bena Yuda bakuabo bakambila Bena Kilisto ne, Kanuena ne tshioshelu. Mufundi wa Mukanda wakatuminabo Bena Ebelu wakamba ne, “Tudi ne tshioshelu” (Ebelu 13:10). Mukelenge Yesu udi tshioshelu tshietu, bua bualu buende tudi mua kusemena pepi ne Nzambi. Kunyima kua kuledibua kua Ekeleziya wa Nzambi (Bienzedi nshapita 2), Bena Kilisto badi mua kusemena pepi ne Nzambi mu “njila mupia mupia ne wa muoyo” (Tangila Ebelu 10:19-22). Badi mua kutendelela Tatu “mu nyuma ne mu bulelela; Tatu udi ukeba bantu ba nunku bamutendelele (Yone 4:23).

Abalahama udi ushimika tenta ne udi wasa tshioshelu tshiende tshibidi mu Kanana

 “Abalahama wakamukaku, [ku Shekeme] wakaya ku mukuna wakadi ku esete wa wa Betele, wakashimikaku ntenta wandi; Betele wakadi ku wesete ne Ai wakadi ku esete. Wakenzelaku Yehowa tshioshelu, wakabikila dina dia Yehowa” (Genese 12:8).

 Tenta wa Abalahama udi utuambila bua muena luendu pa buloba. Yeye wakadi citoyen wa buloba butambe buimpe, wakadi citoyen wa mu Diulu. Dina diende didi ditedibua mu Ebelu nshapita 11 ne balume ne bakaji ba ditabuja ba kale, balume ne bakaji bakaleja ku bienzedi biabo ne, “Tudi benyi ne bena luendu pa buloba ebu” (Ebelu 11:13). “Kuetu mene kudi mu diulu, kutudi tuindila kabidi Musungidi, Mukelenge Yesu Kilisto” (Filipoi 3:20).

Abalahama udi ubikila dina dia Yehowa

 Pa mukuna, Abalahama udi ke anu mutendeledi kadi udi musue kuenda ne Nzambi, udi musue kuikala mu njila wa disua diende. Mukanda wa Nzambi udi wamba ne, “Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamishile njila yebe” (Nsumuinu 3:5,6). Mukelenge Yesu wakambila bayidi bandi ne, “Binuikala kanuyi nanyi, kanuenu bamanye mua kuenza bualu” (Yone 15:5).

 Kutendelela kua Nzambi kudi muanda munene mu Mukanda wa Nzambi. Kutendelela kuakadi kua mushinga mukole kudi Mukelenge Yesu. Misangu ya bungi Luka udi utela ne Mukelenge Yesu wakadi utendelela, misangu mikuabo pa mukuna (Luka 6:12. Yone 6:26).

 Kutendelela kua Nzambi kudi muanda mukole bua bualu buetu. Mukanda wa Nzambi udi wamba ne, “Nusanke misangu yonso; nuikale nutendelelatendelele; mu malu onso nusakidile Nzambi, bua edi ndisua dia Nzambi mu Kilisto Yesu bua bualu buenu” (1 Tesalonike 5:16-18).

Mu tshikondo tshia diteta Abalahama udi upanga mu njila wa ditabuja

 “Tshiole tshiakadi mu buloba abu, ne Abalama wakaya mu Ejipitu bua kushikamamu bualu bua tshiole tshiakadi tshikole mu buloba abu. Pakambabo kubuela mu Ejipitu, Abalama wakambila mukajiandi Salai ne, Tangila, ndi mumanye ne wewe udi mukaji muimpe kumona, ne pakumona Bena Ejipitu, bobo nebambe ne, Ewu udi mukaji wende! Bobo nebanshipe meme, nebakushiye wewe ne muoyo. Ndi nkutendekena ne, Wamba biebe ne, Meme ndi muanabo wa bakaji, bua meme mpete diakalengele bua bualu buebe, ne mutshima wanyi wikale ne muoyo bua bualu buebe. Pashishe pakalua Abalama mu Ejipitu, Bena Ejipitu bakatangila ne mukaji wakadi mulengele be. Bakelenge bana ba Palo bakamumona, bakamuanyishila Palo; bakaya nandi mu nzubu wa Palo” (Genese 12:10-15).

 Abalahama wakapueka mu Ejipitu, tshimanyinu tshia ba pa buloba ebu muinshi mua bukokeshi bua Satana, mu tshikondo tshia mateta. Katuena tubala ne Abalahama wakibaka tshioshelu anyi ne yeye wakabikila dina dia Yehowa mu Ejipitu. Yeye wakadinga Palo bualu bua Salai. Wakambila Salai bua kuamba ne, Meme ndi muanabo wa bakaji. Bualu bua Salai wakadi mukaji mulengele be, bakelenge bana ba Palo bakaya nandi mu nzubu wa Palo. Nzambi wakamulama ku malu mabi ku bianza biandi.

Palo udi umusha Abalahama udi mu Ejipitu

 “Yeye (Palo) wakenzela Abalama bimpe bua bualu buandi (Salai); wakamupa mikoko ne ngombe, ne balume ba nyama ya mpunda, ne bapika balume ne bapika bakaji, ne mashina a nyama ya mpunda ne tumelo. Yehowa wakakengesha Palo ne ba mu nzubu wandi ne bipupu bikole bualu bua Salai, mukaji wa Abalama. Palo wakabikila Abalama, wakamukonka ne, Bualu ebu buwakungenzela budi tshinyi? Kuakungambila ne, Ewu udi mukaji wanyi bualu kayi? Wakungambila ne, Yeye udi muanetu wa bakaji, bua meme kumuangata bu mukaji wanyi bualu kayi? Ka, tangila mukaji webe, umuangate, uye biebe mu njila webe. Palo wakadimuja bantu bandi bua bualu buandi, ne bakaya nandi ne mukaji wandi ne bintu biandi bionso mu njila” (Genese 12:16-20).

 Ditabuja dia Abalahama diakadi ditekete pakadiye mu Ejipitu, yeye wakatshina bua muoyo wende, bualu ebu wakamulombola bua kudinga Bena Ejipitu. Nzambi wakamana kumupesha mulayi bua kumusankisha, wamba ne, “Nenkuvuije tshisamba tshinene, nenkusankishe, nenvuije dina diebe dinene, ne wewe neuvudishile bakuabo disanka” (Genese 12:2). Nzambi kakitabuja Palo anyi bantu bende bua kumuenzela bibi. Nzambi wakadi uteka mesu ende kudi muena mudimu wende.

 Tudi tupanga misangu ya bungi kadi Nzambi udi wa kueyemenyibua – milayi yende yonso idi “ya mushinga mukole ne mitambe bunene” (2 Petelo 1:4). Bantu ba Nzambi badi balamibua ku bukole buandi (1 Petelo 1:5).

Abalahama ne Lota badi batapaluka

 “Lota wakaya ne Abalama, ne yeye wakadi ne mikoko ne bimuna ne ntenta. Muaba wakadi mukese bua bobo kushikama popamue; bualu bua bintu biabo biakadi bia bungi, kabakamanya mua kushikama popamue. Balami ba bimuna bia Abalama ne balami ba bimuna bia Lota bakatandangana. Bena Kanana ne Bena Pelezi bakadi mu buloba tshikondo atshi” (Genese 13:5-7).

 Abalahama ne Lota bakadi nabu mbua kutapuluka bualu bua bimuna biabo. Abalahama wakaleja dinanga dia bungi kudi Lota, wakamuambila ne, “Ndi nkutendekena ne, Katutandanganyi; balami ba bintu bietu kabatandanganyi, bualu bua tudi bantu ba muntu umue. Buloba buonso kabuena kumpala kuebe, anyi? Ndi nkutendekena ne, Tapaluka kundi: biwaya ku tshianza tshia bakaji, nenye bianyi ku tshianza tshia balume; ne biwaya ku tshianza tshia balume, nenye ku tshianza tshia bakaji. Lota wakabandaluka, wakamona mpata ne bibanda bia musulu wa Yadene … bu buloba bua Ejipitu, pawaya mu njila wa ku Soa … Lota wakashikama mu misoko ya mu mpata; wakashimika ntenta yandi too ne ku Sodoma. Bantu ba mu Sodoma bakadi babi, bakatamba kupidia Yehowa” (Genese 13:8-13).

Lota udi ushikama mu Sodoma

 Lota wakamona mpata wonso wa Yadene bu buloba bua Ejipitu, yeye wakasungula mpata bua kuangata biuma bia bungi, kadi yeye wakadi mushikame mu Sodoma pakadi banjelo bakadi bakalua bua kubutula musoko bua malu mabi abo (Genese 19:1). Bua bualu abu, yeye wakajimija bintu biende bionso, mukaji wende, mikoko yende ne bimuna biende.

 Mukanda wa Nzambi udi wamba ne, “Kanusu malu a ba pa buloba, anyi bintu bia ba pa buloba. Biasua muntu malu a ba pa buloba, dinanga dia Tatu kadiena munda muandi. Bualu bua malu onso a ba pa buloba, lukuka lua mubidi, ne lukuka lua mesu, ne kudisua kua muoyo, kaena mafume kudi Tatu, kadi adi mafume ku buloba. Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele” (1 Yone 2:15-17).

 Butudi nabu mbua kuikale badimuke bua mateyi a Satana. Mukelenge Yesu wakabela bayidi bandi ne, “Nudimuke, nutendelele Nzambi; nunku kanuponyi mu mateyi; mutshima udi musue nunku, kadi mubidi udi mutekete” (Mako 14:38).

Abalahama udi upingana ku muaba wa tshioshelu tshiende tshia kumpala

 “Abalama wakadi ne bubanji be bua bimuna ne argent ne or. Wakatshidi uya ku Sude too ne ku Betele kuakashimikeye ntenta wandi diambedi, pankatshi pa Betele ne Ai. Wakaya kuakenzeye tshioshelu diambedi, ne Abalama wakabikilaku dina dia Yehowa” (Genese 13:2-4).

 Katataka Abalahama udi wenda mu njila wa ditabuja. Pakapuekeye mu Ejipitu mu tshikondo tshia mateta, ditabuja diende diakapanga. Bu Abalahama, tudi tupanga kabidi, kadi bu Abalahama, tudi mua kuyila malesona a mushinga mukole ku mapanga etu. Abalahama wakapingana ku muaba wa tshioshelu tshiandi tshia diambedi. Yeye wakasua kupingana kudi Nzambi. Patuapanga, butudi nabu mbua kupingana kudi Nzambi ne kutonda malu mabi etu. Mukanda wa Nzambi udi wamba ne, “Bituatonda mibi yetu, yeye udi wa kueyemenyibua ne udi ne buakane bua kubuikidilu mibi yetu, ne bua kutulengesha ku malu mabi onso” (1 Yone 1:9).

Abalahama udi wenzela Yehowa tshioshelu mu Hebelone

 “Pakapanduluka Lota, Yehowa wakambila Abalama ne, Bandisha mesu ebe pa muaba uudi muimane, utangile ku node ne ku sude ne ku esete ne ku wesete; buloba buonso buudi umona nenkupebu ne tunkanunuina tuebe tshiendelele. Nenkuvudijile tunkanunuina tuebe, netuikale bu dinfuenkenya dia buloba; nunku biamanya muntu mua kubala dinfuenkenya dia buloba, pashishe, tunkanunuina tuebe netubadibue kabidi. Bika biebe, wendakana mu buloba buonso, mu bule buabu ne mu butshiama buabu; bualu bua nenkupebu. Abalama wakatula ntenta yende, wakamuangala, wakaya kushikama pepi ne mitshi ya telebinta ya Mamale idi mu Hebelone; wakenzelaku Yehowa tshioshelu” (Genese 13:14-18).

 Musangu mukuabo tudi mua kuela meji bua kushikama kua Abalahama pepi ne mitshi ya telebinta mu Hebelona, bu tshikondo tshia kukankamasha kua mutshima wende, tshikondo tshia buobume ne Nzambi. Mukanda wa Nzambi udi utuambila bua Abalahama ne, “Bakamuidika, Mulunda wa Nzambi” (Yakobo 2:23). Nzambi wakamba bua “Abalahama mulunda wanyi” (Yeshaya 41:8).

Buobumue bua bena kuitabuja budi ne Tatu ne Muana wende

 Mupostolo Yone wakafunda mukanda kudi “bana banyi bakese”, wakabafundila ne, “Malu atuakutangila ne atuakunvua, tudi tunuambila kabidi, bua nuenu nuangate buobumue netu; bulelela, buobumue buetu budi ne Nzambi ne Muana wandi Yesu Kilisto. Tudi tunufundila malu aa bua disanka dietu divulangane” (1 Yone 1:3,4).

Buobumue bua Bena Kilisto

 Paulo, pakadiye muena lukanu mu Lomo, wakasua kukolesha mitshima ya bena kuitabuja ba mu Efeso bua kulama buobumue buabo, wakabafundila ne, “Nunku meme, muena lukanu wa Mukelenge, ndi nusengelela ne, Endayi bakanangane ne dibikila diakanubikilabo nadi, mu kudipuekesha kuonso, mu kalolo, mu lutulu ne mu kuikalangana ne luse; nunanukile mua kulama buobumue buenu bua mu Nyuma Muimpe mu tshisuikidi tshia ditalala” (Efeso 4:1-3).

Buobumue ne Mukelenge Yesu

 Mukelenge Yesu utshidi wamba lelu: “Tangila, ndi mudimanyike ku tshibi, ndi nkokelaku. Biumvua muntu diyi dianyi, ne udi ungunzuluila tshibi, nembuele kudiye, nendie nandi bidia, ne yeye neadie nanyi” (Buakabuluibua 3:20).

 Mukelenge Yesu udi utunanga. Yeye wakakenga bikole be bua bubi, ne bua malu mabi etu. Udi musue mitshima yetu ne mioyo yetu. Yesu wakambila bayidi bandi ne, “Nenuikale balunda banyi, binuenza bu mundi nuambila. Tshiena nubikila kabidi bapika; bualu bua mupika kena mumanye budi mukelenge wandi wenza; kadi nakunubikila balunda; bualu bua nakunumanyisha malu onso anakunvua kudi Tatu wanyi” (Yone 15:14,15). Mukelenge Yesu udi “Mulunda udi upita muanabo ne muntu kumulamata” (Nsumuinu 18:24).

“Meji mateka ku malu a mubidi adi lufu,
kadi meji mateka kudi Nyuma
adi muoyo ne ditalala”
(Lomo 8:6).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.