Dielangana dia Meji pa Lumu
Luimpe lua Yone

No 4

Bayidi ba kumpala ba Mukelenge Yesu

“Pakatshiabu kabidi, Yone wakadi muimane ne bayidi bende babidi. Wakatangila Yesu talala, pakadiye wenda, wakamba ne, Tangilayi, Muana wa mukoko wa Nzambi! Bayidi babidi bakunvua diyi diakambeye, bakalonda Yesu” (Yone 1:35-37).

Muana wa mukoko wa Kupita kua Yehowa

 Kale Bena Isalele bakadi bakengeshibue bikole be bu bapika kudi Palo, mukelenge wa Ejipitu, ne kudi bantu bende. Pakapidia Palo kulekela Bena Isalele, Yehowa wakamulumbuluisha ne buloba bua Ejipitu. Bakadi batendeledi ba nzambi mikuabo. Yehowa wakambila muena mudimu wende Mose ne, “Nendumbuluishe nzambi yonso ya Ejipitu; meme ndi Yehowa” (Ekesode 12:12).

 Kadi Bena Isalele bakadi ne kujimisha kua mibi yabo bualu kabidi! Yehowa wakambila Mose ne, “Nuambile bantu bonso ba mu Isalele ne, Mu dituku dikumi dia ngondo ewu muntu ne muntu asungule muana wa mukoko ku nzubu ya batatuabo, muana wa mukoko ku nzubu muana wa mukoko ku nzubu” (Ekesode 12:3).

 Pakafika diba dia dipatuku diabo ku Ejipitu, bakashipa muana wa mukoko dilolo. Yehowa wakambila Mose ne, “Bobo nebangate mashi, nebaamiamine ku mutshi wa pamutu pa mushiku wa mbelu ne ku biluwa bibidi bia mushiku wa mbelu wa nzubu mudibo bamudila. Mashi neikale bu tshimanyinu tshia mu nzubu munudi; ne panamona mashi, nempite pamutu penu, ne mulawu kawena unukuata panashipa bantu ba mu buloba bua Ejipitu” (Ekesode 12:7,13).

 Mukelenge Yesu, Muana wa mukoko wa Nzambi, wakadifila bu mulambu bua bupikudi buetu. Mupostolo Petelo wakavuluisha balondi ba Mukelenge ne, “Nudi bamanye ne, Tuakapikudibua, kenku bintu bidi bijimina, ku argent anyi ku ngolo ... kadi nuakapikudibua ku mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kilisto mene” (1 Petelo 1:18,19).

Bayidi ba Yone babidi badi balonda Yesu

 Yone Mubatiji wakadi muntu wa Nzambi wa bushuwa. Pakadiye wambila bantu bakalua bua kumvua diyisha diende, yeye kakadiambila, wakamba bua Mfumu wende.

 “Pakatshiabu kabidi, Yone wakadi muimane ne bayidi bende babidi. Wakatangila Yesu talala, pakadiye wenda, wakamba ne, Tangilayi! Muana wa mukoko wa Nzambi. Bayidi babidi bakumvua diyi diakambeye, bakalonda Yesu. Yesu wakatshinguluka, wakabamona bamulonda, wakabakonka ne, Nudi nukeba tshinyi ? Bakamuebeja ne, Labi (kukudimuna kua muaku ne, Muyishi), wewe udi wikala kudi kunyi ?” (Yone 1:35-38).

 Mukelenge Yesu wakadi ubateta. (Yeye wakamanya meji akadibo bela mu mitshima yabo). “Nudi nukeba tshinyi?”, didi dikonka dimpe. Tudi tukeba tshinyi mu luendu luetu lua muoyo? Tudi tudikebela bubanji, masanka a ba pa buloba, anyi bua kudisankisha? Mukelenge Yesu wakamba ne, “Diambedi kebayi bukelenge buende [bua Nzambi] ne buakane buende” (Matayo 6:33). Balume aba babidi bakadi ne anu bualu bumue - bakasua kumanya Yesu.

 Mukelenge Yesu udi musue bantu kumumanya, ke anu bu Mukelenge, kadi bu Musungidi ne Mulunda. Yeye wakambila bantu bende pakadiye pabuipi bua kubafuila ne, “Tshiena nubikila kabidi bapika; bualu bua mupika kena mumanye budi mukelenge wende wenza; kadi nakunubikila balunda; bualu bua nakunumanyisha malu onso anakunvua kudi Tatu wanyi” (Yone15:15).

Luayi numone

 Mukelenge Yesu wakandamuna ku dikonka diabo ne, “Labi, wewe udi wikala kudi kunyi?” ne meyi abidi: “Luayi numone. Bakaya, bakamona kuakadiye mutule. Bobo bakashala nende dituku adi” (Yone 1:39). Tudi bamanye ne umue wabo wakadi Andele, muanabo ne Simona Petelo. Pamue muntu mukuabo wakadi mupostolo Yone. Mu Lumu Luimpe luende yeye kena udiambila ku dina, udi wamba bua “muyidi mukuabo, wakadi Yesu musue” (Yone 21:7. Tangila Yone 13:23. 19:26).

 Pakabashiya nzubu muakadi Yesu mushikame, Andele “wakasangana muanabo Simona diambedi, wakamuambila ne, Tuakumona Mashiya (kukudimuna kua muaku ne, Kilisto). Wakalua nende kudi Yesu” (Yone 1:41,42).

Undonde

 Katuena tubala bua Andele misangu ya bungi mu Mukanda wa Nzambi. Tudi bamanye ne wakabikidibua kudi Mukelenge Yesu bua kuikala umue wa bapostolo bende ne mulembi wa bantu. Dituku dikuabo, pakadi Mukelege Yesu wenda pepi ne dishiba dia Galela, yeye wakamona Andele ne muanabo Simona Petelo bela kapamba mu dishiba; bualu bua bobo bakadi bilembi. “Yeye wakabambila ne, Luayi kunyima kuanyi, nenuvuije bilembi bia bantu. Bakashiya tupamba tuabo panshi lukasa, bakamulonda” (Matayo 4:19,20).

 Andele wakenza bimpe – wakalua ne muanabo Simona kudi Yesu. “Yesu wakamumona, wakamuambila ne, Wewe udi Simona, muana wa Yona; nebakuidike dina ne, Kefa (kukudimuna kua muaku ne, “Petelo” (Yone 1:42). [Muaku “Petelo” udi wamba bua “dibue dikese]. Biakadi bu Mukelenge Yesu udi wamba ne, “Simona, katataka wewe udi muntu wanyi”.

 Mukanda wa Nzambi udi wamba bualu bua bena Ekeleziya lelu ne, “Kanuena bamanye ne mubidi wenu udi ntempelo wa Nyuma Muimpe udi munda muenu, unudi nuangata kudi Nzambi, anyi? Kanuena bena mioyo yenu. Bualu bua nuakasumbibua ku mushinga mukole; nunku nutumbishe Nzambi mu mubidi wenu” (1 Kolinto 6:19,20).

 “Pakatshiabu, [Yesu] wakamba kuya mu Galela, wakasangana Filipo. Yesu wakamuambila ne, Undonde” (Yone 1:43).

 Mukelenge utshidi ubikila balume ne bakaji, bana ba balume ne bana ba bakaji, ku umue ku umue, bua kumulonda. Udi musue mitshima yetu ne dinanga dietu. Bu mu matuku a kale, Mukelenge utshidi wamba ne, “Muananyi, umpe mutshima webe, mesu ebe atangile njila yanyi” (Nsumuinu 23:26).

Natanaele udi ulua kudi Yesu

 Filipo wakasangana Natanaele lukasa, wakamuambila ne, “Tuakumona wakafunda Mose mu mikenji, ne baprofete, Yesu wa ku Nazaleta, muana wa Yosefe. Natanaele wakamuebeja ne, Tshintu tshimpe tshidi tshimanye mua kufuma mu Nazaleta, anyi ? Filipo wakamuambila ne, Lua umone” (Yone 1:45,46).

 Bu Natanaele wakadi ulua kudi Yesu, wakumvua Mukelenge wamba ne, “Tangilayi, yeye udi Muena Isalele bulelela, udi kayi ne lubombo” (Yone 1:47). Ku mesu kua ba pa buloba Natanaele wakadi muntu muimpe, bu Muena Isalele bua bushuwa, yeye wakalama mikenji ya Mose, kadi dituku adi yeye wakasangana ke anu Yesu wa ku Nazaleta, wakasangana Musungidi.

Luayi nudie

 Kunyima kua lufu lua Mukelenge Yesu, Malia wa ku Magadala ne Malia mukuabo, bakalua kutangila lukita luende. Muanjelo wakabambila ne, “Yeye kena kunoko, wakubika bu muakambeye. Luayi, numone muakadiye mulale. Yayi bienu lubilu, nuambile bayidi bende ne, Yeye wakubika ku lufu; monayi, neadianjile kumpala kuenu mu Galela, nenumumoneku” (Matayo 28:6,7).

 Pakadi bayidi bindila dilua diende, Petelo wakamba ne, “Ndi nya kukuata munyinyi ya mu mayi” (Yone 21:3). Natanaele ne Toma, ne bayidi bakuabo bakamba ne, “Tuetu tuyaya nebe”. Butuku abu kabakakuata tshintu. Mu dinda bakatangila Mukelenge Yesu wakadi muimane ku muelelu wa mayi. “Pakafikabo ku mpata, bakamona makala a kapia akenka ne munyinyi wa mu mayi muteka pa kapia ne mutanda wa bidia. Yesu wakabambila ne, Luayi nudie. Kakuakadi muyidi wakadi ne dikima dia kumuebeja ne, Wewe nganyi? Bakadi bamumanye ne, Mukelenge. Yesu wakalua, wakamema mutanda wa bidia, wakabapawu ne munyinyi kabidi” (Yone 21:9,12,13). Mukelenge Yesu utshidi wamba ne, “Luayi nudie. Luayi, bualu bua bintu bionso bidi bilongolola” (John 21:12. Luka 14:17). Yesu wakamba ne:

“Ndi bianyi bidia bia muoyo;
walua kundi kena wikala ne nzala,
wangitabuja kena wikala ne nyota”
(Yone 6:35).