MU MAFUKU A MAKIENGA, TUKITE KINI ?

(Le corona virus sunga COVID -19)

« Efile-Mukulu mushikwe basha kwitatula anka apeya buntu ku basha kwipelesha. Byabya eyisheyi kuushi ku'eyasa dya bukome di'Efile-Mukulu, mwanda wa'shi enukamishe apakafiki kipindji, tuulaayi nkalo yeenu yoso kwadi mwanda enulama ». (1 Mpyele 5:5-7). Efile-Mukulu bakwile'shi « ongitangine mu mafuku a makienga, nakakupasha, n'obe akatumbisha » (Loono 50:15).

 Mu mafuku e mashimba a bantu ena bukyelo bwi bungi bwa myanda ibungi bikikile pa mwanda wa corona virus. Corona virus mupwe kupalakana mu bisamba bi bungi, kyatudi nakyo nkya kuteka Efile-Mukulu bwashi apee bantu bena binangu mu myanda ya Bwanga, bapete Manga bukidi bwa kubuka beena maladi. Kyatudinakyo bwa kutekyela bafumu beetu kwi Efile-Mukulu bwashi ebape kinangu kya kulombola bantu mwishinda dibuwa dikumbene kulama mwi'uwa yabo ku ano maladi (mukumbo) wina kyambu.

 Twina kyongwa kikile bukata mwanda wa lufu lwa bantu, na ba docteur, na ba munganga belekene ba kwatshibwe na kino Kikolo, mu mudino wabo wa kukaluila na kubuka bantu.

Apakafiki makyenga mu bifuko byetu tutale kwi mupangi'etu

 Mufuki'etu awuku mwa kwitulama ku myanda yoso. Efile-Mukulu kwete kupusha nteko ya bantu. Pabaadi Mpolo ku Atene aye Balungwile bena kibundji, baabafikile mu kupusha eyi dyaye, muanda w'Efile-Mukulu bakitshine nsenga na bintu byoso bi mwanka, aye Fumu a mwiwulu na pa senga, shashaalaa mu ntempelo yikitshiibwe n'eyasa dya bantu… byashi kula na muntu oso akwatudi, (Mikitshino 17:24) bangi baabasepele pabaadi akula mukanda wi buwa, anka bangi namu abakumiinyine.

Twina umune mwi'wulu awuku bya kwi tukalwila

 Twina umune mwi'wulu, mwitukumiine « aye ena bukome bwa kwitu kalwila na kipandjilo kishima, bwa baaba booso abesesela pepi n'Efile-Mukulu kukiila kwadi'ye, mwanda enka kwanka bwa kwibakwila (Bena Ebeleo 7:25) luno lukulopilo lwatudi bu nyindo a muwa, eyendo na mukankanane, na atwele mpaa na munda mwa lushiko, mwanda mubatwelele Yesu bu kabandaa kabedi ku mwanda weetu, pa'ye kwikala tshite-mwakwidi mukata bwa looso (Bena Ebeleo 6:17-20 ).

Kakongye k'Efile-Mukulu akakakidi namu mu mafuku a makyenga akata su?

 Mukanda w'Efile-Mukulu awitulungula mwanda wa kipindji kya makyenga akata mu mafuku a kufudilo, mu ano mafuku, Efile-Mukulu anakishe bantu ku kiimu kikata bwa milwisho yabo, na kutomboka kwabo.

 (Talayi mu kileseso kipindji 6 mu bingi bipindji abilondo muanda corona virus, bangi abele meshi'eshi ano mafuku ekwanka binobino ; Anka atu shingula mumukanda w'Efile-Mukulu'shi, apakafiki ano mafuku a makyenga, kakongye k'Efile-Mukulu akakela mwiwulu (1 Bena Tesalonika 4:13-18) Lelo efuku dya makienga bwa maladi sunga kikolo kya (corona virus), anka makienga ekwanka binobino mwanda wao, tangakumbane na kupuandjikishabwa na makienga a pa kiimu ki'Efile-Mukulu ku efuku dia nsungu yaye ayikafiki pa nsenga poso.

Bishingatshilo bingi bikumbene kwitukwasha bwa mwanda

 Mpolo baadi mufundjile bena kakongye ka bena Tesalonika mwanda wa kutwela kwaye kwabadi na Silwano na Timote « muanda abo banabeene abakula pa mwanda weetu kipaso kibatutwelele kwanudi, na nkipaso kini kibanudi bafutaale ku mankishi na kufubila Efile-Mukulu atala na eyendo, na pa mwanda wa kutengyela ku mawulu mwan'aye abasangwile munkatshi mwa bafwe Yesu etufungusha ku sungu ayifiki » (1 Tesalonika 1:9-10) Mpolo baadi mufundjile Bena Tesalonika dingi mu kipindji kya 5 kish 9 Mwanda « Efile-Mukulu tamwitwitanyine ku sungu, anka byatudya kupeta kipandjilo kwi Fumu Yesu Kilisto ».

 Bishingashilo bingi bibaadi bukwashi bimu Kileseso 3:8-10. Eyi dia Fumu kwi kakongie ka ku Filadelefi dibaadi bino'shi : « obe wena bukome bupeela, anka bolama eyi dyande na twemupele eyi dyande…. Muanda we mulame eyi dya lwishinko lwande, ami namu nakakulama pa kipindji kya kutompibwa akukafiki pa nsenga yooso ishaalwe, mwanda wa kutompa booso be pa nsenga » (Kileseso 3:8-10).

 Mutumibue Yoano, bafundjile mukanda wa Kileseso, ta tala kakongye pa nsenga kunyima kwa kipindji 3, na mu bidindji abilondo abyakula wa « makienga akata » na bisambiisho bw'Efile-Mukulu pa nsenga yishima. Aye amono kakongye mu mawuulu. Mu Kileseso 5:9. Amono bantu abayimbi loono lupya, na musambo wa kukudiibwa. Abo « mba bisamba byoso, ndjimi yooso, miilo yoso, na mu ndjimi yoso, na mawubo oso ».

 Bangi namu abele meeshi, na bu ami nabene'shi, n'abo abatemunwa mu 1 Bena Tesalonika 4:13-18, mbena kukumiina babatshibwa mu makumbi « bua kufumankana na Fumu mwiwulu » pakafiki bwa kulombasha eyi dyaye kwi bantu baaye'shi : « na su nende na nakalumbuula mbalo, nankalukiila na nankenwata byakukyeba'shi kwakwa kwandji'mi, anwe namu mwikwikale » (Yoano 14:3).

 Apakafiki Fumu Yesu na bena ngoshi ba mu mawulu, bwa kwata bufumu bwaye pa nsenga, atukumiina'shi Kakongye katemunwe mu Kileseso 19:7-8 akakafiki naaye. Mu kino kipindji atubadika mwanda wa kufika kwaye bwa kusambisha ba pa nsenga na kutuula bufumu bwaye pa nsenga. Aye akamunana mukalolo bu « Fumu a ba fumu, na Mwanana a ba mwanana » (Kileseso 19:16).

Apafiki myanda ibukopo mu bifuko byetu 

 Apafiki myanda ibukopo mu bifuko byetu, mwina Kilisto ebya kwikala na kufukama mw'eshimba dyaye, kufukama akufikaa kw'Efile-Mukulu kintu sunga nkimune taki bya kumulamuuna na kifulo ki'Efile-Mukulu ki mu Kilisto Yesu (Looma 8:39).

 « Mwanda atuwuku'shi , su shibo yeetu ya nsenga yikale epema, yasasuka, tuina shibo yikale kwi Efile-Mukulu, shibo yishii yikitshibwe na mayasa a bantu ya yikalayika mu mawulu (2 Bena Kolente 5:1) Fumu Davidi bafundjile mu Musambo 23'shi « sunga nenda mutadiile ku lupongo lwa mufito wa lufu, ntantshini mwanda ubi, mwanda obe we nami, ngabo yobe na mukombo obe abinsamba. Eyendo, buwa na lusa abindondo mafuku oso mu muwa wande, nakekala mu shibo y'Efile-Mukulu loosoo (yikalayika).

Kupopeela kwenu kuwukiibwe kwi bantu booso; Fumu taadi peepi ;
Tanwikalanga na lukalakashi lwa kintu suunga nkimune, anka mu bintu
byoso tuulaayi nkalo yeenu kwi Efile-Mukulu mu nteko na kwiyambiila na
lutumbu ; na kufukama ku'Efile-Mukulu, kwakwa kukile kinangu kyoso,
akukalama mashimba enu na nangunangu yeenu mu Kilisto Yesu.
(Bena Fidipi 4:5-7 )