33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Mu dituku dia lutatu, tuenze tshinyi?

(Le Coronavirus anyi COVID-19)

"Nzambi udi upidia badi badisue, kadi udi upa badi badipuekesha ngasa. Nunku nudipuekeshe kunshi kua tshianza tshikole tshia Nzambi, bua yeye anubandishe mu tshikondo tshiasunguleye; nuteke ntatu yenu yonso kudiye, bualu bua yeye udi unulubulula." (1 Petelo 5:5-7). Nzambi wakamba ne, "Umbikile mu dituku dia makenga; nenkupandishe, ne wewe neuntumbishe." (Musambu 50:15).

 Mu matuku aa mitshima ya bantu idi ne matata a bungi bua malu a bungi, nangananga bualu bua le coronavirus. Le coronavirus wakamana kuvulangana mu bisamba bia bungi. Butudi nabu mbua kulomba Nzambi bua kupesha bantu badi ne lungenyi mu malu a buanga basangane manga lubilu be bua kuondapa basame. Butudi nabu mbua kulombela bamfumu betu Nzambi kabidi bua kubapesha lungenyi bua kulombola bantu mu njila mimpe idi mua kulama mioyo yabo kudi disama edi dia tshiambu.

 Tudi tunyingalala bikole be bua lufu lua bantu ba bungi, ne bua lufu lua ba-docteur ne ba-infirmier badi bakuatshibue kudi virus ewu mu mudimu wabo wa kuondapa bantu.

Palua makenga mu meku etu tutangile kudi Mufuki wetu

 Mufuki wetu udi mumanye mua kutulama ku malu mabi onso. Nzambi udi umvua milombu ya bantu. Pakadi Paulo mu Atena yeye wakambila bena musoko, bakadisangisha bua kumvua diyi diende, bualu bua “Nzambi wakafuka buloba ne bintu bionso bidipu, bualu bua yeye udi Mukelenge wa diulu ne buloba, katu wikala mu bitendelelu bidi bibaka ku bianza bia bantu … yeye kena netu kule kudi muntu ne muntu”. (Bienzedi 17:24,27.) Bakuabo bakaseka pakadiye wambilabo lumu luimpe, kadi bakuabo bakitabuja.

Tudi ne Umue mu Diulu udi mumanye mua kutusungila

 Tudi ne Umue mu Diulu, udi utunanga, “Yeye udi ne bukole bua kusungila ne lupandu lujima badi basemena pa buipi ne Nzambi bua bualu buende, yeye muikale ne muoyo tshiendelele bualu bua kubakuila. (Ebelu 7:25). Ditekemena edi didi bu luongo lua muoyo wetu, didi dikuata bikole, didi dishindama. (cf. Ebelu 6:17-20).

Ekeleziya wa Nzambi neapitshile tshikondo tshia “Makenga Manene”, anyi?

 Mukanda wa Nzambi udi utuambila bualu bua tshikondo tshia dikenga dinene mu matuku a kunshikidilu. Mu dituku adi, Nzambi nealumbuluishe bantu bakuabo bikole be bua kupidia kuabo ne ditomboka diabo. (Tangila Buakabuluibua nshapita 6 ne mu nshapita mikuabo idi ilonda). Bualu bua le coronavirus, bakuabo badi belangana meji ne tshikondo atshi tshidi tshidiku katataka. Kadi tudi tujingulula ku Mukanda wa Nzambi ne, Palua dituku adi, Ekeleziya wa Nzambi neikale mu diulu. (1 Tesalonike 4:13-18).

 Lelu didi dituku dia dikenga bua le coronavirus, kadi makenga adiku katataka bualu buawu, kaena makumbane bua kuelekeshibua ne makenga muinshi mua malumbuluishi a Nzambi mu dituku dia tshiji tshiende tshidi tshilualua pa buloba bujima.

Mvese mikuabo idi mua kutukuatshisha bua kujingulula bualu

 Paulo wakafundila bena ekeleziya ba mu Tesalonike bualu bua tshibueledi tshiende kudibo ne Siluano ne Timote, “ne bu munuakakudimuka kudi Nzambi panuakalekela mpingu bua kukuatshila Nzambi wa muoyo ne wa bushuwa mudimu, ne bua kuindila Muana wende ulualua mu diulu; wakabisheye munkatshi mua bafue, Yesu mene, udi utupandisha ku tshiji tshilualua”. (1 Tesalonike 1:9,10). Paulo wakafundila Bena Tesalonike kabidi mu nshapita 5:9 ne, “Nzambi kakatusungula bua kututekela tshiji, kadi bua tuetu kupeta lupandu bualu bua Mukelenge wetu Yesu Kilisto”.

Mvese mikuabo, yakadi dikuatshisha, idi mu Buakabuluibua 3:8,10. Mukenji wa Mukelenge kudi ekeleziya wa mu Filadelefia wakadi ne, “Wewe udi ne bukole bukese, ne wakalama diyi dianyi, ne kuakapidia dina dianyi … bualu bua wakalama diyi dia kutantamana kuanyi, nenkulame kabidi ku diba dia kuteta, diodio didi diamba kulua kudi ba pa buloba bonso, bua kuteta badi bikala pa buloba”. (Buakabuluibua 3:8,10).

 Mupostolo Yone, mufundi wa Mukanda wa Buakabuluibua, kena utangila Ekeleziya pa buloba kunyima kua nshapita 3 ne mu nshapita idi ilonda idi yamba bualu bua “makenga manene” ne malumbuishi a Nzambi pa buloba bujima. Udi umona Ekeleziya mu diulu. Mu Buakabuluibua nshapita 5:9 udi utangila bantu badi bimba musambu mupia-mupia, udi musambu wa bupikudi. Badi “ba mu tshisamba tshionso, ne ba mu muaku wonso, ne ba munkatshi mua bantu bonso, ne ba munkatshi mua ditunga dionso”. Bakuabo badi bela meji, bu meme nkayanyi ne, Badi bobo badi batedibua mu 1 Tesalonike 4:13-18. Badi bena kuitabuja, bakangatshibue mu matutu “bua kusangila ne Mukelenge mu lupepele”, palueye bua kushikija diyi diende kudi bantu bende ne, “Binaya ne binanulongoluela muaba, nenpingane kabidi, nenuangate kundi meme muine, bua kundi ngikala, nuenu nenuikaleku kabidi”. (Yone 14:3).

 Palua Mukelenge Yesu ne bena mvita ba mu diulu bua kuangata bukelenge buende pa buloba, tudi tuitabuja ne, Ekeleziya, mutedibue mu Buakabuluibua 19:7,8, nealue nende kabidi. Mu nshapita ewu tudi tubala bualu bua dilua diende bua kulumbuluisha ba pa buloba ne bua kujadika bukelenge buende pa buloba. Yeye neakokeshe mu buakane, bu “MFUMU WA BAMFUMU, NE MUKELENGE WA BAKELENGE”. (Buakabuluibua 19:16).

Palua malu makole mu meku etu

 Palua malu makole mu meku etu, muena Kilisto udi mua kumanya ditalala mu mutshima wende, ditalala didi difuma kudi Nzambi, nansha tshintu tshimue tshidi mua kumupandulula ku dinanga dia Nzambi didi mu Kilisto Yesu. (Lomo 8:39).

 “Tudi bamanye ne, Bikala nzubu wa pa buloba wa mubidi wetu mupuke, tudi ne nzubu mufume kudi Nzambi, nzubu udi kayi muasa ne bianza, udi mu diulu tshiendelele”. (2 Kolinto 5:1). Mukelenge Davidi wakafunda mu musambu 23 ne, “Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi; tshibongo tshiebe ne tshibangu tshiebe bidi binsamba. Bulelela, buimpe ne luse nebindonde matuku onso a muoyo wanyi; nengikale mu nzubu wa Yehowa tshiendelele.

Mukelenge udi pabuipi. Lekelayi kuditatshisha
ku bualu bumue; kadi mu malu onso
ku ditendelela ne ku disengelela
numanyishe Nzambi bua milombu yenu
ne disakidila. Ne ditalala dia Nzambi didi ditamba
dijingulula dionso dia bantu, nedilame mitshima
yenu ne meji enu mu Kilisto Yesu.
(Filipoi 4:5-7).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.