Kulomba kua Yabesa

Yabesa udi utendelela Nzambi wa Isalele

 “Yabesa wakatamba bana babo mu butumbi; mamu wende wakamuidika dina ne, Yabesa, wamba ne, Nakamulela ne kanyinganyinga. Yabesa wakatendelela Nzambi wa Isalele wamba ne, Nakadi kusua bua wewe kunsankisha ne kulepesha mikalu yanyi ne bua tshianza tshiebe tshikala nanyi, bua wewe kundama bua tshibuedi mu malu mabi ne bua meme tshikadi ne kanyinganyinga! Nzambi wakamupa malu akalombeye”. (1 Kulondolola 4:9,10).

 Tudi tubala bualu bua Yabesa anu mu mvese eyi ibidi mu Mukanda wa Nzambi. Dilomba dia Yabesa didi ditukuatshisha bua kujingulula malu a mushinga mukole kutudi mu luendu luetu lua ditabuja. Nzambi udi musue kutusankisha!

Yabesa udi musue Nzambi kulepesha mikalu yende

 Yabesa wakambila Nzambi ne, “Nakadi kusua bua wewe kunsankisha ne kulepesha mikalu yanyi ne bua tshianza tshiebe tshikala nanyi”. Nzambi wakapesha Bena Isalele milayi ya bungi bua kubasankisha, kadi bakadi ne bualu bua kutumikila Diyi diende ne bua kuikala batapuluke kudi bisamba bia bende, kudi malu a ba pa buloba. Bisamba bia bende biakadi bena mpingu.

 Ku tshikondo atshi masanka a Bena Isalele akadi pa buloba, mu tshikondo tshietu masanka a Bena Kilisto adi mu diulu. Paulo wakafundila Bena Efeso ne, “Nzambi, Tatu wa Mukelenge wetu Yesu Kilisto atumbishibue, wakatuvuidishila masanka onso a Nyuma mu miaba ya mu diulu, mu Kilisto”. (Efeso 1:3). Mukelenge biende alepeshe “mikalu yetu”, nunku mudimu utudi tuenzela Mukelenge newikale bua butumbi buende. Netuvudishile bakuabo disanka mu malu a Nzambi.

Yabesa udi ne dimanya dia tshijila tshia Nzambi

 Yabesa wakatamba bana babo mu butumbi, wakadi ne dimanya dia tshijila tshia Nzambi bu Habakuka, muprofete wa kale kale. Habakuka wakamba ne, “Yehowa, Nzambi wanyi, wewe kuena wanyi Wa Tshijila kale too ne mpindiewu, anyi? … Wewe udi ne mesu mapite buakane adi kaayi mua kutangila malu mabi”. (Habakuka 1:12,13). Yabesa wakamanya ne, Mbualu butekete bua meme kuenza malu adi kaayi mimpe, malu adi mua kunyingalaja mutshima wanyi. Yeye wakasua kusankisha Nzambi bu Hanoka ne Noa, Mukanda wa Nzambi udi wamba ne bakendakana ne Nzambi. (Genese 5:24.6:9).

Nzambi udi musue kusankisha bantu bende

 “Disanka didi kudi muntu udi kayi ulonda lungenyi lua bantu babi, udi kayi wimana mu njila diatshimue ne benji ba malu mabi, udi kayi mushikame mu tshisombelu tshia babuidi. Kadi disanka diende didi mu mikenji ya Yehowa, ne mu mikenji yende mudiye welangana meji munya ne butuku. Yeye udi bu mutshi wakukunabo kukala kua misulu ya mayi, udi ukuama mamuma awu mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele”. (Musambu 1:1-3).

Nzambi wakapesha Yabesa malu akalombeye

 Muntu udi musue kusankisha Nzambi udi wendakana ne Nzambi. Nansha bikala malu makole amukuata, yeye udi mumanye ne, Nzambi udi wela meji bua bualu buanyi. Mufundi wa Musambu 40 wakafunda ne, “Nakindila Yehowa ne lutulu, wakateleja matshu ende kundi, wakumvua muadi wanyi”. (Musambu 40:1). Mesu a Mukelenge adi kudi bobo badi basue kumusankisha, udi umvua malomba abo. Nzambi wakapesha Yabesa malu akalombeye. Dituku dikuabo Mukelenge Yesu wakadi uyisha bantu bendebakuabo, wakabambila ne, “Ndi nuambila ne, Nulombe, nebanupe; nukebe, nenumone; nukokole, nebanunzuluile”. (Luka 11:9).

Tudi mua kulomba Nzambi bintu bibi

 Yakobo wakabela bakuabo ne, “Nudi nulomba ne kanuena nuangata bintu, bualu bua nudi nubilomba bibi, anu bualu bua kubimuangalaja ku masanka enu”. (Yakobo 4:3). Bena Filipoi kabakadi dibela edi bualu! Paulo wakabafundila ne, “Nusanke mu Mukelenge misangu yonso, nengambe tshiakabidi ne, Nusanke. Bupole buenu bumanyishibue kudi bantu bonso, Mukelenge udi pabuipi. Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kilisto Yesu”. (Filipoi 4:4-7).

Mu malu onso tusakidile Nzambi

 Mu mukanda wende kudi Bena Tesalonike Paulo wakabafundila ne, “Nusanke misangu yonso; nuikale nutendelelatendelele; mu malu onso nusakidile Nzambi, bua edi ndisua dia Nzambi bua bualu buenu”. (1 Tesalonike 5:16-18). Bantu ba Nzambi badi ne masanka a bungi be. “Mutshima wanyi, uvudishile Yehowa disanka; kupu muoyo bua masanka onso akutupeye”. (Musambu 103:2).

 Yabesa wakalomba Nzambi ne, “Bua tshianza tshiebe tshikala nanyi, bua wewe kundama bua tshibuedi mu malu mabi ne bua meme tshikadi ne kanyinganyinga!” Mukelenge atulame bua tuetu bietu katubuedi mu malu mabi ne bua tuetu bietu katuikala ne kanyinganyinga!

Teta, ulabule, unvue ne, Yehowa udi muakane;
disanka didi kudi muntu udi uyemena kudiye!”
(Musambu 34:8).