ETEMWELO (Dihuli dia ntemola)

 Antu efula nkanaka vati; ETEMWELO eli luudu lahikawo l’esanganelu ; okone talanga nkimanyiana dia shu nimbitela ololo uku eli ETEMWELO ka Unyashungu.

 Lu Joani 4:20 shu menaka shati ; Umuntu usi Samariya ambutela Khumesu Jesu dia ukungu, DIHULI len’akatemolaka wa ntshewo. Ku Jesu akawutela ati ; Etena kambukuka ndu keko kakiane dia atemodi wa Nzambi Papa wotemole lu Nyuma ndu lu mete. Antu wa wuhu oso mbatuyangaka Papa dia vo ndjala atemodi andi. Khumadiondjo akatela ambeki ati ; « Len’ambusanganyema ahendi kana asatu lu lukumbu lami, DIMI NDJALAKA l’atei awo » (Enda Mateu 18:20).

 Asi Isariyele waki la luudu la dipema dia ntemolaka Unyashungu, keli lu luudu lone tinyi pindi diakiko diutshikitanyi: 1) etinyi kemotshi k’ekila ; 2) etinyi kekina k’ekila kuleki ekila.

 Lu dihuli di’ekila k’uleki ekila, kakadjaseka Latuyalaka, Kanga lumu, l’atei awo. Elo kene tambena shati ; Asika Kristu mbeli DIHULI dia Unyashungu mbidjaseka, edjaselu kandi k’ekila. Lu mukanda wakafundela Paulu asi Koreto, (lu 1 Koreto 6:15) Opostolo akafundi ati ; « Nyu hanyeyi nyati ; uku ETEMWELO KA UNYASHUNGU MBENYU, la Nyuma ka Unyashungu atudjaseka l’etema anyu ? » Lu 1 Koreto 6:15 ndi ambenya asi Koreto ati ; Alimba anyu weli beke dia Kristu. Okone Unyashungu hatudjaseka lu mvudu yahika antu dia mbotemolaka, keli ndame katuhikaka luudu landi. Lo leko luudu lahahikama l’anya wa antu, keli lo leko luudu lahikama l'ave wa lumu. Vo mbeli alimba w’antu andi, asika Kristu.

 Tuyali atemodi wa mete, aha paka lu ashu w’antu. Unyashungu eko len’eli asika Kristu wa mete lu mbotemola. Ndi ndjalaka lawo l’atei awo.

 Okone alimba asu kema uku alimba ku alimba ; weko alimba w’ekila. Hakuki shu mbakimo lu akambu wa kolo uku luseka, ne dia weko etemwelo ka Unyashungu. Kristu akavu, aketama nshi shatu lu diumbu, akulo lushi l'asatu dia nkundja waku wayotemola Shi lu mete, la ndi akatumi Nyuma k’Ekila, ushasha wa Papa, dia ndi ndjukutsha ulimu one la kete.

(Par Entoto Ekoka, Kole)