33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Asika Kristu, Temwelo dia Unyashungu

Anyami lu Kristu Jesu Moyo ndu lusaka le Unyashungu dia etena k'ololo kambutukundja dia nsawula lanyu. Nduku dikambu diambuleka ololo lu asawu asu uku mbala la mbeka diui dia Khumadiondjo, ne dia dio dieli ma diatutushaka lumu la pundju. Ma diako mbalangasu kahana lanyu elo kene lu sujet kambutufunda ladiku.

Diui ne « Etemwelo » lesu asika Kristu eli na? Eli dihuli diolongoswami dia untu l'untu temola la mandula Unyashungu la lushi la lushi; dihuli di'Ekila ne dia Nzambi ka wulu, Utungi w'andja kakanga dihuli ne; dihuli diuleki ololo tshe, ne dia leko mbasukanasu le Unyashungu dia mena lutumbu la etshoko andi. Amotshi l'atey’asu kanaka vati, dihuli ne eli paka lu luudu la Nzambi, lene atusanganaka asika Kristu. Aha osuku, ne dia aha nshi tshe mbatshosu lu luudu la Nzambi. Tendi lu 1 Koreto 3:16; lane Paulu ambutenya ati, lam'akatetawo Kristu, alimba asu wambuhilwama ahuli w'Ekila, wolongoswami dia etemwelo ka Unyashungu ne dia lawo katudjaseka Nyuma kandi. Naka shu tayenda ntu lu Tshapita 6:19‑20, Paulu ambututela dia alimba ane aha wasu ntu, « ne dia nyu nyakasumbama la ushinga a wulu » (dikila dia Kristu).

Undu shu nkanaka shati, lu lukumbu lutu l'usika Kristu mbesu temwelo dia Unyashungu : dikambu ne hadiukuki. Ambuleka ololo shu kidia etemwelo kene, kilongosola la kilama pudipudi dia khum'utema yasu yayali kiti ka Nyuma k'Ekila. Dikambu ne hatshama tshikima lulangu lasu (volonté) la saki ka dimba diasu ambuyala la tshina dia wulu a Nyuma kudjashi l'etem'asu. Osoku, Nyuma ayuhiluya etem'asu ndu ayutetsha lama ntumbula Unyashungu lu lumu lasu, dia lo ndjala etemwelo ka lu « mete » la ka lu « Nyuma ». Lu nshi yesu lane la kete, akambu a waki nkumaka lesu; tena efula shu ndjâkimoka le Unyashungu la Nyuma kandi ntukimanyiaka mete. Lu akambu wa waki ane, Nyuma ka Unyashungu tenyaka mbuka (solutions) motshi yeli wulu lu ashu asu kana yahumbama mbosa nshi kambi, ku shu tatutshaka uku lulangu lasu dia mbeta lu mbuka ka wodu la ka hyembula; lawo mbatutotoka lu kolo (uvi, kashi, lukesu) dia nsembula akambu asu. Etena keso shu tatotshiyaka akambu wa kolo l'etemwelo k'Ekila ka Unyashungu (etem'asu) ndu tatunyiyaka Nyuma uma lu kiti ya l'etem'asu. Tali lu Romo 7:13‑20. Keli naka lu akambu tshe wa wulu waya lesu, shu tayusha Nyuma dihuli dia nkamba ulimu andi lu lumu lasu la shu nkolamela l'elembe andi, shu tayusukana la Unyashungu (relation directe), Ndi ayututshuluela etshoko andi la uma leko mbayutoto elua a Nyuma wakafundi Paulu lu Ngalatiya 5:22.

Shu nongosolaka luudu la lusanganya ne dia shu tambuleta shati, luudu la Nzambi; shu nshimbaka lundju kana ufutanu, kana akambu a kolo loko, keli tuyâmbuli kana shu nshimbaka dia akambu ane tawukumaki lu temwelo dia l'etem'asu. Elongoswelo la etiti ka lu luudu la Nzambi, esambu weembasu kana akambu tshe watshasu loko wambuhumba ndjâla uku elua kana résultat w'ulimu wakamba Nyuma lu temwelo dia l'etem'asu. Okone lam'asanganasu shu tshe lu dimba dia Kristu (Efeso 4:15,16) untu l'untu olongosodi etemwelo ka l'utem'andi, diandu la lutumbu lasu layutsho pulu l'anya wa Unyashungu; Ndi ayuleka ngenangena la ayufudia etshoko « dia mbudia dimba (Ekelezia) dia dio mpikama lu ngandji ».

Anyami, tambuhumba ndjambula untu l'untu kana shu namaka la nongosolaka temwelo diasu dia dio ndjala elambu w'ololo le Unyashungu. Tuyalame di’aha mbotshiya elua wa kolo lu temwelo di'Ekila. Lu akambu tshe waya lesu (elimu, wekelu, hemo, asui, famille,) tuyâmbule kana shu tshikelaka Nyuma dihuli dia ntundu dia Ndi nteenya lama ntsha ndu shu ndjela lulangu landi. Tuyaendi lu eteketa la etsha asu dia vo wayali elua wa Nyuma. Naka aui ane wayuyala lesu uku devoir dia lushi la lushi, keti shu tayuyala ekito wa mete wa diulelu dia pundju ndu uma ka kakiane shu tayulungula etshoko wa Unyashungu lu ehumba asu tshe, ne dia l'etem'asu mbeli edjaselu kandi. Akambu w'asi Lewi 26:3‑6; 11‑12.

Par André Ndongo Ndjundju.

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.