Makwatshisha mu myanda y'Efile-Mukulu

 Nandjakukyeba kwakula n'enu yini myanda inanka yi mu mukanda wa kwibedi wa mutumiibwe Mpolo kwi bena Kolente, kipindji kya kwibedi, na kishingatshilo kya 30. Aye bafundjile'shi: "Kutala nwi baaye mu Kilisto Yesu, betwikasha bukalabwino kwi Efile-Mukulu, na kululama, na bu selelee, na kukudiibwa."

 Ku uno mukanda, Mpolo akyebe kulambukisha banikye bena Kilisto be ku lupata (Kibundji) lwa Kolente. Su atubadika mu Mikitshino kipindji 18, atushingula mushindo ubabangile Mpolo mufubo wa Fumu mu luno lupata (kibundji). Bayikyele kwakwa (kipwa) kishima na myeshi isamombo (11) Kwibedi bena Kolente babaadi balangwidi ba mankishi, na mwikelo wabo ubawukilwe kwi bantu boso ku senga yishima'shi, bubi bwabo bubakile bungi. Anka pababapushishe eyi dya mukandu wi buwa, be bungi babeyalwile babakumiina mwi Kilisto. Binobino kwi (bisaka) bisatu bya bantu ku Kolente, bena Yuda, bena Ngidiki, na kakonge k'Efile-Mukulu (1 Kolente 10:32). Mwanda wa kino kisaka kya kasatu, kisaka kipya, Mpolo amba'shi: "abo babâmunwa mu Yesu Kilisto, babaitanyinibwa bena selele" (1 Kolente kipindji 1 kishingatshilo 2). Na dingi'shi, "Efile-Mukulu, kukidila kwadi, nubayitanyinwe mu buwumune na mwanaaye Yesu Kilisto Fumwetu, ena kulamata" (1:9). Atushingula namu'shi, Mpolo e mwa kufundjila anka bena Kilisto banabene mukanda'u? Su muntu takumiina Fumu Yesu bu Mupashi aye mpa na lelo uno, bi buwa amukumiine lelo, byadyakulonda yini myanda'yi.

 Mwikelo wa bena Kolente tawubadi wi buwa nya, "tusakatusaka" (1:11). Tusaka -tusaka namini? Tababaadi abatala kwi bangi bakulu na balambukishi'shi, Ami, ne a Mpolo, n'ami ne a Apolose; n'ami ne a Kefase, n'ami ne a Kilisto. Byabya bibafikile ngoshi pankatshi pabo, na mufubo w'Efile-Mukulu munkatshi mwabo. Kwi'nka byabya su bena Kilisto ababanga kwilwena ngoshi, kushi kwimana pô n'eshimba dimunenka, ngi kulwa ngoshi na Dyabulu. Sunga eyi dyetu dya "communauté" aditulesha mwanda'u. "Kwikumbashena" kwi bu kwamba'shi, twi bantu ba Fumu umune, twikale namu n'eshimba dimune.

 "Mushindo waye (w'Efile-Mukulu) ngi wanudi'nwe munda mwa Kilisto" (1:30). Mwanda kibalo kyetu kya bwana ki mu mawulu, mwamwa mwatutengyela Fumu Yesu Kilisto mupaashi (Fidipi 3:20). Munda mwabo tamwi kintu kipwandjikile n'Efile-Mukulu, anka baaba be munda mwa Kilisto be na mwanda ununenka na Kilisto nabene. Efile-Mukulu mukumiine Mwana'aye. Mukumiine dingi bantu baye boso be munda mwa Mwana'aye. Bamutulu kwiulu ku kibalo kishakyuku lufu kutwela nya. Munda mwaye, lufu taluuku kwitukwata nya.

 Tutale binobino bintu'bi binanka: bukalabwino, kalolo, buselele na kukudibwa. Atumono bintu'bi bu bintu bi buwa bukabe. Anka Mpolo amba'shi, Kilisto anetupe bintu'bi, sunga'shi, twanekale n'abyo n'aye pamunenka. Aye amba'shi, Kilisto betupele bukalabwino na bimo bintu. Bu kwamba'shi, Kilisto nabene bukalabwino kwatudi.

 Bena Kolente baabadi bena Ngidiki. Baabadi na bukalabwino bukile bwa bangi bantu. Sunga byabya, bubaadi anka bwa pa senga, bushabuuku kwibafwisha kwi Efile-Mukulu, sunga kwibapasha. Babaukile kwisadika'shi, twi na bukalabwino bwa bintu byoso. Efile-Mukulu takyebe kwisadika nya. "Yawa etumbisha, etumbishe mu mwanana" (1:31). Anka kwi baaba bayitanyinwe, bena Yunda na bena Ngidiki, Kilisto ni "mbukome bw'Efile-Mukulu na bukalabwino bw'Efile-Mukulu" (1:24).

 Mwanda wakabidi'shi, kalolo. Yesu Kilisto betupele kalolo. Kalolo ketu, bu abyamba mudimuni Esaya, "ke'nka bu bilamba bya bisumanga na bi mako" (Esaya 64:6). Obe okyebe kwimana ku mpala'Efile Mukulu, su? We na mwanda wa kufwala kilamba ki buwa, kya Kilisto nabene. "Yeoba ngi kalolo ketu" (Yelemiya 23:6, 33:16).

 Kulambukisha kwa mukanda wa Looma pa mwanda wa kalolo. Bena Isalele "Mwanda, pa kukutwa kuwuuka kululama kwa Efile-Mukulu na pa kukimba bwa kutuula kululama kwabo abo banabeene, tambakokyele ku kululama kw'Efile-Mukulu nya" (Looma 10:3). Kwi mulô ukabe kwiuka'shi, Kilisto nabeene e kalolo ketu ku mpala'Efile-Mukulu.

 Mwanda wakasatu bu selele. "Selele" bu kwamba'shi "kwamunwa." "Mwanda kino ngi kikyebe ki'eshimba di'Efile-Mukulu, bu selele bwenu; kwamba'shi nwilame ku lukyebanokyebano (1 Tesalonika 4:3). Mufubo wi buwa kwi bena Kilisto kwi kala na Kikudi-E-Selele kwifuku n'efuku. Bantu babaakumiina Fumu Yesu bekale kabidi selele ku mikelo yabo. Kwitumbisha dingi takwikudi, mwanda Kilisto nabeene e selele.

 Ku kufundilo, bu kutwesha bintu byoso mu kintu kimune, Kilisto ne kukudibwa kwetu. Betukulu na mase aye. Abo mbabingishiibwe bisumanga ku buntu bwaye, mu kufungushiibwa mu Kilisto Yesu (Looma 3:24). Efile-Mukulu bapangile bantu boso, anka ku meeso kwaye binobino kwi'nka Muntu Umunenka, Kilisto Mwan'aye. Efile-Mukulu amono bangi bantu boso babaakumiina eyendo munda mwa Kilisto. Kini kinemo'ki! Mupashani a balwishe Yawa, Kilisto Yesu, kwadi aye bintu byoso bi buwa kwatudi. Twiyishe ku mpala kw'aye, tumwishingile.

Mufundji a uno mukanda, Mwambi Kamanda (SN Downs)