Malumbuluisha Manene Anayi

“Malumbuluisha ebe adi malelela ne makane”. (Buakabuluibua 16:7).

1. Dilumbuluisha dia bubi ku mutshi mutshiamakane. (2 Kolinto 5:21).
2. Dilumbuluisha dia bienzedi bia bena kuitabuja ku tshilumbuluidi tshia Kilisto. (2 Kolinto 5:10).
3. Dilumbuluisha dia bisamba bia bantu badi ne muoyo. (Matayo 25:31-46).
4. Dilumbuluisha dia nkuasa munene mutoke. (Buakabuluibua 20:11-15).

1. Kulumbulula kua bubi ku mutshi mutshiamakane

 Mukelenge Yesu wakafua bua bubi, kabuiyi buende, ku mutshi mutshimakane. “Yeye nguakadi kayi mumanye bubi, Nzambi wakamuvuija bubi bua bualu buetu; bua tuetu tuikale buakane bua Nzambi munda muende”. (2 Kolinto 5:21).

 Mutshi mutshiamakane a Mukelenge wetu Yesu Kilisto udi utuambila bualu bua dinanga. Kadiena dinanga bu dinanga dia Mukelenge Yesu, kadiena dinanga bu dinanga dia Nzambi kudi bantu. “Bualu bua Nzambi wakatamba kusua ba pa buloba, yeye wakabapa muanende umuepele mulela bua muntu yonso wamuitabuja kafu biende kadi wikale ne muoyo wa tshiendelele”. (Yone 3:16).

 Mutshi mutshiamakane wa Mukelenge wetu udi utuleja bubi butambe bunene bua ba pa buloba. Kadi udi utuleja luse lunene lua Nzambi ne dinanga diende ditambe kudi bantu. “Bakamutapa mputa bua mibi yetu, bakamukuma bua malu mabi etu; dikenga didi divuija ditalala dietu diakadi pambidi pende ... Yehowa wakuteka dipila dia bubi bua buonso buetu pambidi pende”. (Yeshaya 53:5,6).

2. Kulumbulula kua bienzedi bia bena kuitabuja ku tshilumbuluidi tshia Kilisto

 Butudi nabu mbua kumueneshibua buonso buetu kumpala kua tshilumbuluidi tshia Kilisto, bua muntu ne muntu kuangateye bintu bia mu mubidi wende bu muakenzenzeye, nasha malu mimpe nasha malu mabi. (2 Kolinto 5:10).

 Mukelenge Yesu wakamba patoke too ne, “Bulelela, bulelela, ndi nuambila ne, Umvua diyi dianyi, witabuja wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo. Bonso badi Tatu umpa nebalue kundi; tshiena ngipata walua kundi”. (Yone 5:24. 6:37). Nzambi wakitabuja lufu lua Mukelenge Yesu mu muaba wa muntu yonso udi ulua kudiye mu ditabuja. Kadi, “buonso buetu, muntu ne muntu, neabadile malu ende kudi Nzambi”. (Lomo 14:12). Tudi bamanye ne, bilondeshile pa milayi a Mukelenge, yeye neapeshe kudi muntu ne muntu difutu bu mudi mudimu wende. Musangu mukuabo tudi mua kuela meji bualu bua tshilumbuluidi tshia Kilisto bu dituku dia difutu dia bantu bende.

Tudi tuenzela Mukelenge mushindu wa mudimu kayi?

 Mupostolo Paulo wakafunda ne, Bu mudi ngasa wa Nzambi mumpeshibue bu muibaki udi ne meji, meme nakajadika bishimikidi bia nzubu, kadi mukuabo udi wasa pamutu pabi. Kadi muntu ne muntu adimuke biende bu mudiye wasapu. Kakuena muntu udi mua kujadika bishimikidi bikuabo, anu biobio biakamana kujadikibua, bidi Yesu Kilisto mene. Biasa muntu pa bishimikidi ebi ngolo, argent, mabue a mushinga mukole, mitshi, bisosa, anyi bidi bisasa, mudimu wa muntu ne muntu neumueneshibue; bua dituku dilualua nediumueneshe, bualu bua didi dibuluibua mu kapia; ne kapia nekatete mudimu wa muntu ne muntu ne udi wa mushindu kayi. Biashala mudimu wa muntu wakaseye pamutu patshi, yeye neangate difutu. Biapia mudimu wa muntu, neajimishe mudimu ewu wonso, kadi yeye mene neasungidibue, kadi anu bu muntu musambuke kapia. (1 Kolinto 3:10-15).

 Muntu ne muntu udi bu muibaki, udi mua kuibaka ne bintu bimpe ne bia mushinga, anyi ne bintu bia tshianana. Bikala muena kuitabuja wibaka anu ne bintu bidi bipia bu mitshi, bisosa, anyi bidi bisasa, yeye nkayende neasungidibue bualu bua mudimu wa bupikudi wa Mukelenge Yesu, kadi anu bu muntu musambuke kapia. Neaye kua Nzambi bianza bitupu, kena upeta difutu. Kadi Mukelenge udi musue kukolesha mitshima ya bantu bende bua bobo bangata difutu dikumbane. Yeye wakamba ne, “Wanupa lupanza a mayi a kunua, bualu bua nuenu nudi ba Kilisto, bulelela, ndi nuambila ne, Kena upanga kuangata difutu diende”. (Mako 9:4).

3) Kulumbulula kua bisamba bia bantu badi ne muoyo

 Palua Muana wa muntu mu butumbi buende ne banjelo bonso, neashikame mu nkuasa wa butumbi buende; bisamba bionso nebisangakane kumpala kuende, yeye neabatapulule bu mudi mulami utapulula mikoko ne mbuji; neateke mikoko ku tshianza tshiende tshia balume ne mbuji ku tshianza tshiende tshia bakaji. Pashishe, Mukelenge neambile badi ku tshianza tshiende tshia balume ne, Luayi, nudi nusankishibua kudi Tatu wanyi, nupiane bukelenge buakunulongoluelabo ku tshibangidilu tshia buloba; bualu bua nakadi ne nzala, nuakampa bia kudia; nakadi ne nyota, nuakampa bia kunua; nakadi bianyi muenyi, nuakambueja mu nzubu; nakadi butaka, nuakanduatshisha; nakadi nsama, nuakalua kunsombesha; nakadi mu nzubu wa lukanu, nuakalua kundi. Pashikisheye kubambila nunku, bantu bakane nebamukonke ne, Mukelenge, dituku kayi dituakakutangila ne nzala, tuakudisha? Ne nyota, tuakunuisha? Dituku kayi dituakakutangila mulue muenyi, tuakubueja mu nzubu? Ne butaka, tuakuluatshisha? Dituku kayi dituakakutangila usama ne mu nzubu wa lukanu, tualua kuudi? Mukelenge neabambile ne, Bulelela, ndi nuambila ne, Bualu bua nuenu nuakenzela umue wa mu bana betu badi batambe kupuekela nunku, nuakangenzela meme. Yeye neambile kabidi badi ku tshianza tshia bakaji ne, Umukayi kundi, nudi ne mulawu, nuye mu kapia ka tshiendelele kadi katemeshela diabolo ne banjelo bende; nakadi ne nzala, kanuapa tshia kudia; nakadi ne nyota, kanuakampa tshia kunua; nakadi bianyi muenyi, kanuakambueja mu nzubu; nakadi butaka, kanuakanduatshisha; nakadi nsama, nakadi mu nzubu wa lukanu, kanuakalua kunsombesha. Bobo kabidi nebamukonke ne, Mukelenge, dituku kayi dituakakutangila ne nzala ne nyota ne buenyi ne butaka ne disama ne mu nzubu wa lukanu, tuapanga kukukuatshisha? Yeye neabambile ne, Bulelela, ndi nuambila ne, Bualu bua nuenu kanuakenzela umue wa mu bantu aba badi batambe kupuekela nunku, kanuakangenzela meme. Bantu aba nebaye mu dikenga dia tshiendelele, kadi bantu bakane nebaye mu muoyo wa tshiendele. (Matayo 25:31-46).

Bisumbu bia bantu bisatu: Tudi tubala bualu bua bisumbu bisatu bia bantu mu tshitupa etshi tshia mu Mukanda wa Nzambi.

Mikoko: Idi tshifuanyikiji tshia bantu badi baleja dinanga kudi “bana betu” mu tshikondo tshia dikenga diabo. Mvese wa kunshikidilu udi ubikila “mikoko” ne, “Bantu bakane”. Badi bena kuitabuja.

Mbuji: Idi tshifuanyikiji tshia bena bupidia. Bienzedi biabo bidi bibapisha.

Bana betu: Badi Bena Isalele badi bitabuja Nzambi ku tshikondo etshi. Badi babikidibua ne, “Bana betu” kudi Mukelenge Yesu. Yeye wakadi muledibua Mukelenge wa Bena Yuda. Ku tshikondo etshi, bisamba bionso badi ne muoyo pa buloba nebisangakane kumpala kuende. Yeye udi mumanye bantu bende, neabatapulule bu mudi mulami utapulula mikoko ne mbuji, mikoko yende neyibuele mu bukelenge bua Mukelenge pa buloba.

 Tudi tujingulula ku Mukanda wa Nzambi ne, Diambedi malu adi matedibue mu tshitupa etshi tshia mu Mukanda wa Nzambi kaayi manze kulua, Ekeleziya wa Nzambi newikale mudiulu. (1Tesalonike 4:13-18). Mukelenge Yesu wakambila ekeleziya wa ku Filadelefia ne, “Bualu bua wakalama diyi dia kutantamana kuanyi, nenkulame kabidi ku diba dia diteta, diodio didi diamba kulua kudi ba pa buloba bonso, bua kuteta badi bikala pa buloba. Ndualua lubilu, ukuate bikole tshiudi natshi, bua muntu kanyengi tshifulu tshiebe tshia butumbi”. (Buakabuluibua 3:10,11).

4) Tshilumbuluidi tshia kunshikidilu

 Nakatangila nkuasa wa butumbi munene mutoke, ne wakadi ushikamapu, wakanyemabo kudi buloba ne diulu kumpala kuende, ne kabakabisangana muaba kabidi. Nakatangila bafue, banene ne bakese, bimane kumpala kua nkuasa wa butumbi; ne mikanda yakabuluibua, mukanda mukuabo wakabuluibua kabidi, udi wa muoyo; bakalumbuluisha bafue ku malu akadi mafunda mu mukanda, bu muakadi bienzedi biabo. Mayi manene kabidi, akapatula bafue bakadimu, ne lufu ne Muaba wa Bafue biakapatula bafue bakadimu, ne bakalumbuluisha muntu yonso bu muakadi bienzedi biende. Bakela lufu ne Muaba wa Bafue mu dishiba dia kapia. Elu ndufu luibidi, dishiba dia kapia mene. Bikala muntu kayi musanganyibue mufunda mu mukanda wa muoyo, wakedibua mu dishiba dia kapia. (Buakabuluibua 20:11-14).

 Bantu badi bapishibua ku kulumbulula kua nkuasa wa butumbi munene mutoke badi bobo bakafua mu malu mabi abo. Mena abo kaena mafundibue mu mukanda wa muoyo. Mukanda wa Nzambi udi wamba ne, “Kakuena tshintu tshia tshianana tshidi tshibuelamu [mu diulu], nasha kakese; nasha muntu udi wenza bualu bubi ne mashimi; kadi anu badi ne mena abo mafunda mu mukanda wa muoyo wa Muana wa Mukoko nebabuelemu”. (Buakabuluibua 21:27).

Mukelenge Yesu wakambila bayidi bende ne,
“Nusanke bua mena enu adi mafunda mu diulu”.
(Luka 10:20).