Wikale ne Meji

« Ditshina dia Yehowa ntshibangidilu tshia meji, kumanya Wa Tshijila ndijingulula dia mianda ». (Nsumuinu 9:10).

« Meji adi apita mabue a bilenga bulengele; bintu bionso biudi mua kujinga kabiena mua kuelekeshibua nawu. Unvuayi diyisha, nuikale ne meji, kanudipetudi nansha. Unvua biebe, muananyi, wikale ne meji; lombola mutshima webe mu njila mululame ». (Nsumuinu 8:11,33 23:19).

Bibaki Babidi

Dituku dikuabo, pakadi Mukelenge Yesu pa mukuna ne bayidi bende, yeye wakabayisha malu a bungi. Wakabambila lusumuinu lua bibaki babidi. Umue wakadi muena meji kadi mukuabo wakadi muntu mupote. Mukelenge Yesu wakabambila ne, « Muntu yonso udi munvue meyi anyi aa ne utu waatumikila neikale bu muena meji, wakibaka nzubu wende pamutu pa dibue; mvula yakaloka, misulu yakula, bipupu biakalua, biakakuma ku nzubu, kadi nzubu kakupuka, bua yeye wakadi muibaka pa dibue. Muntu yonso udi munvue meyi anyi aa, kayi watumikila, udi biende bu muntu mupote, wakibaka nzubu wende pa lusenga; mvula yakaloka, misulu yakula, bipupu biakalua, biakakuma ku nzubu, nzubu wakupuka; kupuka kuende kuakadi kunene ». (Matayo 7:24-27).

Dibue didi dituambila bualu bua Mukelenge. Kale mukelenge Davidi wakafunda ne, « Yeye nkayende udi dibue dianyi ne lupandu luanyi, tshibumba tshianyi tshile; tshiena nyungishibua ». (Musambu 62:6).

Palua malu makole, muntu udi wibaka muoyo wende pamutu pa Mukelenge Yesu Kilisto udi mu bianza bia Umue wakamba ne, « Kutshinyi bualu bua nakukupikula, nakukubikila ku dina diebe, wewe nganyi. Pawapitshila mu mayi, nengikale nebe; pawapitshila mu misulu kayena ipasalala pamutu pebe ». (Yeshaya 43:1,2).

Mishikankunde ne meji

Dituku dikuabo bayidi ba Mukelenge bakamukonka bualu bua malu alualua pafika kunshikidilu kua tshikondo etshi pa buipi. Yeye wakabambila lusumuinu lua mishikankunde dikumi yakadi yindila dilua dia mubaki wa mukaji bua kumuakadila. Ludi lusumuinu lua dilua diende bua kuangata bantu bende.

Mukelenge wakabambila ne, « Dituku adi bukelenge bua mu diulu nebuikale bu mishikankunde dikumi, yakangata minda yayi, yakaya kuakidila mubaki wa mukaji. Mishikankunde itanu yakadi mipote, minga itanu yakadi ne meji. Pakangata mupote minda yayi, kayakaya ne manyi makuabo; yakadi ne meji yakaya ne manyi mu mpanza, ne minda. Mubaki wa mukaji kakalua lubilu, mishikankunde yonso yakadi ibunga tulu, yakalala. Pakalua munda-nkulu, bakela mbila ne Tangilayi, mubaki wa mukaji! Luayi kumuakidila. Mishikankunde ayi yonso yakabika, yakalongolola minda. Mipote yakambila yakadi ne meji ne, Nutupeku manyi bualu bua minda yetu ikadi ijima. Kadi yakadi ne meji yakandamuna ne, Tudi tuela meji ne, Manyi kaena akumbana bualu buetu ne buenu; nudi mua kuya kudi bapanyi, nudisumbile. Pakayayi bua kusumba manyi, mubaki wa mukaji wakalua; yakadi ne bintu biayi bilongolola yakabuela nende ku disanka dia dibanji; bakinshila tshibi. Pashishe, mishikankunde mikuabo yakalua, yakamba ne, Mukelenge, Mukelenge, utunzuluile. Kadi yeye wakandamuna ne, Bulelela, ndi nuambila ne, Tshiena munumanye. Dimukayi, kanuena bamanye dituku ne pa diba ». (Matayo 25:1-13).

Manyi adi tshilejilu tshia Nyuma Muimpe

Manyi adi tshilejilu (« un symbole ») tshia Nyuma Muimpe. Bantu badi bitabuja Mukelenge Yesu Kilisto bu Mukelenge ne Musungidi badi ne dipa dia Nyuma Muimpe (Efeso 1:13,14), bu mishikankunde itanu yakadi ne meji ne manyi mu minda yayi. Paulo wakafundila bena kuitabuja ba mu Kolinto ne, « Kanuena bamanye ne mubidi wenu udi ntempelo wa Nyuma Muimpe udi munda muenu, unudi nuangata kudi Nzambi, anyi »? (1 Kolinto 6:19).

Mishikankunde yakadi mipote kabakadi ne manyi mu minda yayi, kayakadi mua kubuela ku disanka dia dibanji: mubaki wa mukaji wakabambila ne, « Bulelela, ndi nuambila ne, Tshiena munumanye ». (Matayo 25:12).

Bena Tesalonike ba kale bakalekela mpingu yabo « bua kukuatshila Nzambi wa muoyo ne wa bushuwa mudimu, ne bua kuindila Muana wende ulualua mu diulu; wakabisheye munkatshi mua bafue, Yesu mene, udi utupandisha ku tshiji tshilualua ». (1 Tesalonike 1:9,10).

Paulo wakafundila Bena Kolinto ne, « Tuetu, benji ba mudimu ne Nzambi, tudi tunusengelela kabidi ne, Kanuangatshi ngasa wa Nzambi bu bualu bua patupu; bua yeye udi wamba ne, Nakakunvuila mu tshikondo tshimpe, mu dituku dia lupandu nakakukuatshisha; monayi, katataka ntshikondo tshimpe, monayi, katataka ndituku dia lupandu ». (2 Kolinto 6:1-2).

Mukelenge Yesu alombole mitshima yetu mu dinanga dia Nzambi

« Diyi dia Kilisto dikale munda muenu ne bubanji buadi; mu meji onso
nuyishangane ne nedimushangane ne misambu ya bena kuitabuja
ba kale ne ya bena Kilisto ne ya Nyuma; nuimbile Nzambi misambu
ne ngasa mu mitshima yenu. Ne malu onso anudi nuenza,
ne mu meyi ne mu bienzedi, enzayi onso mu dina
dia Mukelenge Yesu; nusakidile Nzambi Tatu
bua bualu buende ». (Kolosai 3:16,17).