Dielangana dia Meji pa Lumu
Luimpe lua Yone

No 22

Yesu udi udia bidia ne balunda bandi mu Betania

Yesu wakalua ku Betania, kuakadi Lazalo wakabisheye ku lufu; wakalalaku matuku asambombo diambedi Kupita kua Yehowa kakuyi kuanze kulua. Bakamulambishila bidia bia butuku; Mata wakadi ubakuatshisha, kadi Lazalo wakadi mukuabo wa bakadi bashikame nandi ku mesa. Malia wakangata tshitupa tshia kilogama tshia mananashi a mushinga mutambe bukole, menza ne nado mulelela, wakamuela mananashi ku makasa a Yesu, wakaakupula ne nsuki yandi, nzubu wakadi muule tente ne mupuya wa mananshi. Kadi muyidi wandi mukuabo, Yudasa Isakaliote, wakadi pa kumutungila tshitungu, wakakonka ne, Munyi kabakapana mananashi aa ku ndenalio nkama isatu, bua kupa bantu bapele ? Yeye kakamba diyi edi bua wakadi ne bapele luse, anu bua wakadi muibi; bualu bua yeye wakadi ne tshibutshilu, wakadi udiangatshila biakadi bitekamu. Yesu wakamba ne, Mulekelayi, nuitabuje ne, Yeye wakadi mualame too ne dianjikabo. Nudi ne bapele matuku onso munkatshi muenu, kadi kanuena nanyi meme matuku onso. Bantu ba bungi ba Bena Yuda bakunvua lumu ne; Yeye udi eku; kabakaluila bua Yesu nkayende, bakaluila kabidi bua kutangila Lazalo wakabisheye ku lufu. Kadi bakuidi banene bakasangisha diyi diabo bua kushipa Lazalo kabidi, bua Bena Yuda ba bungi bakadi bumuka bitabushila Yesu bua bualu buandi (Yone 12:1-11).

Yesu udi mu njila bua kuya ku Yelushalema ku lufu ku bianza bia bantu babi
 Katataka Mukelenge Yesu, mu disua dia Nzambi, udi mu njila bua kuya ku Yelushalema ne lufu luende ku bianza bia bena lukuna bende. Mudimu wende pa buloba udi pepi ne kushika.
 Pakadi Yesu mu njila yeye wakangata bayidi bandi nkayabo, wakabambila ne, “Unvuayi, tudi tubanda ku Yelushalema; nebafile Muana wa muntu mu bianza bia bakuidi banene ba Nzambi ne bia bafundi; bobo nebamupishe ne lufu, nebamufile mu bianza bia bantu ba mu bisamba bia bende, bamuseke, bamukume, bamushipe ku mutshi mutshiamakane; kadi papita matuku asatu yeye neabishibue” (Matayo 20:18,19). Bayidi bakadi nandi kabakajingulu diyi diende.
 Betania wakadi pepi ne Yelushalema. Mu Yelusalema Yesu wakadi ne bena lukuna ba bungi kadi pakadiye mu Betania yeye wakadi munkatshi mua balunda bandi. Wakadi mua kushikamamu nabo talalaa.

Balunda ba Yesu badi bamulambishila bidia bia butuku
 Balunda basatu ba Yesu badi batedibue. Mata, Lazalo ne Malia. Dituku dikuabo Mata wakadi mutata ne mudimu wa bungi, kakasanka bualu bua Malia muakunyi wandi wakadi ushikama ku makasa a Yesu bua kunvua diyi diende. Mata wakakonka Yesu ne, “Mukelenge kuena ubenga bua muakunyi wanyi anshile mudimu nkayanyi, anyi ? Umuambile alue kunkuatshisha. Mukelenge wakamuandamuna ne, Mata, Mata, wewe udi utamba kuela meji a malu a bungi adi akutatshisha; tudi ne anu tshintu tshimue bualu; Malia wakusungula luseke ludi luimpe, kabuena bamanye mua kumunyengalu” (Luka 10: 40-42).
 Katataka Mata wakadi ukuatshisha balunda ba Yesu bua kumulambishila bidia bia dilolo kayi ne matata. Udi tshifuanyikiji tshia muena mudimu muimpe.
 Bena mudimu bonso ba Mukelenge badi ne mapa mashilangane. Paulo wakambila Timote ne, “Usonsole tshipedi tshia Nzambi, tshidi munda muebe” (2 Timote 1:6). Paulo wakasua kukolesha mutshima wende mu mudimu wende bua Mukelenge. Mbimbe bua kushikija mudimu wakatupabo bimpe ne disanka.
 Lazalo udi tshifuanyikishi tshia buobumue ne Yesu, yeye wakadi mushikame nandi ku mesa. Mukelenge udi wamba ne, “Tangila, ndi mudimanyike ku tshibi, ndi nkokelelaku. Biumvua muntu diyi dianyi, ne udi ungunzuluila tshibi, nembuele kudiye, nendie nandi bidia, ne yeye neadie nanyi” (Buakabuluibua 3:20). Yone wakafunda ne, “Malu atuakutangila ne atuakunvua, tudi tunuambila kabidi, bua nuenu nuangate buobumue netu; bulelela, buobumue buetu budi ne, Nzambi ne Muana wandi Yesu Kilisto. Tudi tunufundila malu aa bua disanka dietu divulangane” (Yone 1:3,4).
 Lazalo wakadi mumanyi wa bukole bua Mukelenge pamutu pa lufu ne tshimanyinu kudi Bena Yuda ne Yesu udi Muana wa Nzambi, mutumibue kudibo bu Mukelenge wabo. Malia udi tshifuanyikiji tshia mutendeledi wa bushuwa. Mutendeledi udi utendelela mu nyuma ne bulelela (Yone 4:23).

Malia udi wela mananashi ku makasa a Yesu
 Musangu mukuabo anu Malia wa ku Betania wakajingulula meyi a Mukelenge Yesu kudi bayidi bandi ne, “Nebafile Muana wa muntu mu bianza bia bantu, nebamushipe; pamushipabo, yeye neabike kabidi, papita matuku asatu” (Mako 9:31). Bayidi bandi kabakajingulula tshiakadiye wamba. Malia wakela mananashi ku makasa a Yesu bua dijika diende !
 Mu nzubu pakadibo badia, Malia wakela mananashi ku makasa a Yesu, wakaakupula ne nsuki yandi. “Yudasa Isakaliote, mutungidi, wakamba ne, Munyi kabakapana mananashi aa ku ndenalio nkama isatu, bua kupa bantu bapele ? Yudasa wakadi muivi. Yesu wakamba ne, Mulekelayi, nuitabuje ne, Yeye wakadi mualame too ne dianjikabo”.
 Pakela Malia mananashi ku makasa a Yesu, nzubu wakadi muule tente ne mupuya wa mananashi. Katuena ne mpata ne mutshima wa Mukelenge wetu wakadi musambibua mu diba edi dia dikengela diende, lufu luende ku bianza bia bantu babi luakadi pabuipi.
 Bidi bimueneka Malia wakapita bayidi bonso mu dijingulula dia meyi a Yesu bualu bua lufu luende. Tshienzedi tshiende tshiakaleja dinanga diende ne kulamata kuende kudi Musungidi wende.
 Yone wakafunda ne, “Mu muanda ewu mudi dinanga, kembua tuetu tuakunanga Nzambi, kadi bua yeye wakatunanga, wakatuma Muana wandi bu mulambu wa kubuikila nawu mibi yetu” (1 Yone 4:10).

“Tuetu tudi ne dinanga, bualu bua yeye wakadianjila kutunanga”
(1 Yone 4:19).