Dielangana dia Meji pa Lumu
Luimpe lua Yone

No 19

Yesu udi wondapa Muntu mulela Mufofo

Pakadiye upita, wakamona muntu mulela mufofo. Bayidi bandi bakamukonka ne, Labi, wakuenza bualu bubi nganyi, muntu ewu, anyi bamuledi, bua yeye udi muledibue mufofo?  Yesu wakabandamuna ne, Kabakuenza bualu bubi kudi muntu ewu anyi kudi bamuledi; bualu ebu buakulua bua malu adi Nzambi wenza amueneke bualu bua muntu awu. Butudi nabu mbua kuenza malu a wakuntuma patshidi munya; butuku bulualua budi muntu kayi mumanye mua kuenza mudimu.  Pantshidi pa buloba, ndi munya wa ba pa buloba
(Yone 9:1-5).

 Pakadiye upita, Yesu wakamona muntu mulela mufofo. Katuena bamanye dina diende kadi tudi bamanye ne yeye wakadi muena dikenga mene mene. Kakadi mua kutangila baledi bandi. Kakadi mua kutangila bufuki bua Nzambi budi butuambila bua bukole ne dinanga dia Mufuki wetu.

 Bayidi ba Yesu bakadi bela meji ne, Musangu mukuabo baledi bandi anyi yeye nkayandi bakenza bualu bubi ne bua bualu ebu muntu wakadi muledibue mufofo - ke nunku to, “bualu ebu buakulua bua malu adi Nzambi wenza amueneke bualu bua muntu awu.” Tshimanyinu etshi tshidi anu umue wa bimanyinu bifundibue mu Lumu Luimpe lua Yone, “bua nuenu nuitabuje ne, Yesu udi Kilisto, Muana wa Nzambi ne bua nuenu nuikale ne muoyo mu dina diandi, panuitabuja”
(Yone 20:31).

Yesu udi muondapa muntu mufofo

 Pakambeye edi, wakatuila lute panshi, wakasopakanya nalu buloba, wakamulababu ku mesu, wakamuambila ne, Ya wowe mu tshina tshia mayi a kuowa dina diatshi Siloama (kukudimuna kua muaku ne, Mutumibue). Wakaya biandi, wakowa, wakapingana mutabale (Yone 9:6,7).

 Mukelenge Yesu wakatuila lute panshi, wakasopakanya nalu buloba, wakamulababu ku mesu. Adama wakadi mufukibue ne dinfuenkenya dia buloba (Genese 2:7). Dituku adi Muntu mukuabo wakadiku, Muntu wa mu diulu (1 Kolinto 15:47). Tudi tubala bua bualu buende ne, “Bua bualu buandi bintu bionso bidiku, ne bintu bionso bidi bifukibua ku bukole buandi” (Ebelu 2:10). Yeye wakadi mulue “bu munya wa bisamba bionso; bua kutabaja mesu a bafofo, bua kupatula bena lukanu mu tshina tshia lukanu, ne bua kumusha badi bashikame mu midima mu nzubu wa lukanu” (Yeshaya 42:7).

Muntu mufofo udi wenza bu muakambileye Yesu

 Yesu wakambila muntu mufofo ne, “Ya wowe mu tshina tshia mayi a kuowa.” Yeye wakaya biandi, wakowa, wakapingana mutabale. Muntu ewu wakadi muena meji, wakadi muenji wa diyi dia Mukelenge. Dituku dikuabo Yesu wakadi upita mu njila wa ku Yelushalema, pakadiye ulupuka mu Yeleko, muntu mufofo mukuabo dina diende Batemayo wakalomba Yesu ne, “Yesu, muana wa Davidi, unfue luse. Yesu wakamukonka ne, Udi musue meme nkuenzele tshinyi? Muntu mufofo wakamuambila ne, Muyishi wanyi, mesu anyi atabale. Yesu wakamuambila ne, Ya biebe; ditabuja diebe diakukusungila. Wakatabala lukasa, wakamulonda mu njila” (Tangila Mako 10:46-52). Muntu mufofo mu ntempelo wakitabuja Yesu, pashishe wakamukukuila, muntu wa mu Yeleko (dina diandi Batemayo) wakitabuja Yesu, wakamulonda mu njila.

Bafalese ne Bena Yuda bakuabo badi ne Yesu lukuna

 Bena Yuda bakuabo mu ntempelo bakadi ne Yesu lukuna, bakadi bashikame mu midima, bakadi bafofo, bafue mu malu mabi abo, kabakajingulula ne, Yesu wakadi munkatshi muabo mu luse bua tshitupa tshipi bu munya wa a buloba. Bakaya ne mufofo kudi Bafelese, musangu mukuabo bualu bua Yesu wakamuondapa dituku dia Lumingu. Dituku dikuabo Yesu wakabambila ne bafundi ne, “Nuenu kabidi, nudi nubengela kutumikila mukenji wa Nzambi bualu bua bilele bienu tshinyi?” (Tangila Matayo 15:1-3). Kabakajingulula ne Yesu wakadi Mukelenge wa dituku dia Lumingu
(Mako 2:28).

Bumanyishi bua muntu mufofo

 Pakebeja bena kuabo ne bakamumona diambedi ne, Mesu ebe adi matabale munyi? Yeye wakabambila ne, “Muntu udibo babikila ne, Yesu, wakasopakanya buloba, wakabundaba ku mesu, wakangambila ne, Ya ku Siloama, wowe; nunku nakuya, nakuowa, nakutabala” (Yone 9:11). Pakayabo nende kudi Bafalese, bakuabo bakamba ne, “Muntu ewu [Yesu] kena mufume kudi Nzambi, bualu bua yeye katu wajila dituku dia Lumingu ... bakakonka muntu wakadi mufofo kabidi ne, Yeye wakutabaja mesu ebe, apu wewe udi umuamba munyi? Wakabakudimuna ne, Yeye udi muprofete” (Yone 9:16,17).

 Bafalese bakabikila wakadi mulele mufofo tshiakabidi, bakamuambila ne, “Utumbishe Nzambi; tudi bamanye ne muntu ewu udi mubi. Yeye wakabakudimuna ne, Udi muntu mubi, tshiena mumanye; ndi mumanye anu bualu bumue ne, Nakadi mufofo, katataka ndi mona” (Yone 9:24). Yeye wakambila Bafalese ne, “Bu muntu ewu kayi mufume kudi Nzambi, kakadi kumanya mua kuenza bualu. Bakamukudimuna ne, Wakuledibue mu malu mabi bulelela, wewe udi utuyisha tuetu, anyi? Bakamuipata” (Yone 9:32-34).

Yesu udi umona muntu wakadi mufofo

 Kunyima kua dipata dia muntu wakadi mufofo mu ntempelo, Mukelenge Yesu wakamusangila. Pakamumoneye, wakamukonka ne, “Udi witabuja Muana wa Nzambi, anyi? Wakakudimuna ne, Mukelenge yeye udi nganyi, nmuitabuje? Yesu wakamuambila ne, Wewe wakumumona, udi wakula nebe nyeye mene. Muntu awu wakamba ne, Mukelenge, ndi ngitabusha. Wakamukukuila”
(Yone 9:35-38).

Endayi bu bana ba munya

 Yesu wakambila Nikodemo, Mufalese wakalua kudi Yesu butuku ne, “Kabena balumbuluisha wamuitabuja, kadi bakamana kulumbuluisha wapidia kuitabuja, bualu bua kakitabuja dina dia Muana umuepele mulela wa Nzambi. Etshi ntshilumbu tshia bantu ne, Munya wakalua pa buloba, kadi bantu bakasua midima, kabakasua munya bua bienzedi biabo biakadi bibi” (Yone 3:18,19).

 Paulo wakafundila bena kuitabuja ba mu Bena Efeso ne, “Diambedi nuakadi midima, kadi katataka nudi munya mu Mukelenge; endayi bienu bu bana ba munya (mamuma a munya adi malu mimpe onso ne malu makane ne malu malelela), nutete budi Mukelenge muanyishe”
(Efeso 5:8).

Mukelenge Yesu wakamba ne, “Ndi munya wa ba pa buloba;
wandonda kena wendakana mu midima,
kadi neikale ne munya wa muoyo”
(Yone 8:12).