Dielangana dia Meji pa Lumu
Luimpe lua Yone

No 18

Bafundi ne Bafalese badi balua ne mukaji wa musandi kudi Yesu

 Muntu ne muntu wakapingana kuende (Yone 7:53). Kadi Yesu wakaya ku mukuna wa Oleve. Dinda yeye wakalua mu ntempelo kabidi, bantu bonso bakalua kudiye; wakashikama, wakabayisha: Bafundi ne Bafalese bakalua ne mukashi mukuata wenda masandi; pakamutekabo munkatshi, bakambila Yesu ne, Muyishi, bakukuata mukashi ewu wenda masandi, mpa bualu mene. Mu mikenshi ya Mose yeye wakutuambila ne, Nukume bantu badi benza nunku mabue; apu wewe udi umuamba tshinyi? Bakamba nunku, bamuteta munda bua kuikalabo ne tshibandidi tshia kumubanda natshi. Kadi Yesu wakazonzama, wakadi ufunda panshi ne munu wandi. Kadi pakadibo bamukonkakonka, wakabanduluka, wakabambila ne, Udi munkatshi muenu udi kayi ne bualu bubi, adianjile kumuela dibue. Wakazonzama kabidi, wakafunda panshi ne munu wandi. Pakunvuabo diyi edi, bakumuka ku umue ku umue balondangane, babange ku wakadi mubatambe bukulu too ne ku wa kunshikidilu; bakashiya Yesu nkayandi ne mukashi pankatshi pakadiye muimane. Yesu wakabanduluka, wakakonka mukashi ne, Mukashiana, badi panyi? Kakuena udi mukubande, anyi? Yeye wakamba ne, Mukelenge, kakuena muntu. Yesu wakamba ne, Meme kabidi tshiena nkubanda, ya biebe, kuenji bualu bubi kabidi tshiendelele (Yone 8:1-11).

Yesu udi uya ku Mukuna wa Oleve

 Mvese wetu wa diambedi udi mvese wa nshikidilu wa mu nshapita 7. Pakashikija Disanka dia Bitandatanda, muntu ne muntu wakapingana kuende kadi Yesu wakaya mu Mukuna wa Oleve, bu muakadi tshilele tshiende (Luka 22:39). Nansha Yelushalema wakadi musoko wende, bidi bimueneka ne, Mukelenge kakalalamu. Yelushalema, anyi ne, Siona, wakadi musoko wa Mukelenge munene (Musambu 48:2), kadi bantu bandi [Bena Yuda] kakamuitabuja. Yone udi utuambila ne, “Bantu bandi mene kabakamuitabusha. [Kadi] Yeye wakapa bonso bakamuitabusha bukole bua kuluabo bana ba Nzambi, bobo mene badi bitabusha dina diende.”

 Mu dinda, Mukelenge wakapingana ku ntempelo ne wakabanga kulongesha bantu kadi bafundi (balongeshi ba Mikenji) ne Bafalase, bakadi bakeba kukuata Mukelenge mu buteyi. Bakalua ne mukashi kudi Mukelenge Yesu, bakamba ne, “Udi muena masandi”. Bakambila Mukelenge Yesu ne, Mose wakafunda mu mikenji bua kushipa bakaji ba mushindu ewu mabue, “ahu wewe udi umuamba tshinyi?” Mukelenge wakabambila ne, “Udi munkatshi muenu udi kayi ne bualu bubi, adianjile kumuela dibue”. Mioyo-mikese yabo yikatatshishabo - bakadi bimana kumpala kua Munya wa ba pa buloba (Yone 9:5). Buonso buabo bakumuka ku umue ku umue balondangane. Mukelenge Yesu wakamana kuambila Nikodemo, wakadi Mufalese, ne, “Nzambi kakatuma Muana wandi pa buloba bua kulumbuluisha ba pa buloba, kadi bua ba pa buloba nebasungidibue kudiye” (Yone 3:17). Bualu bua Nzambi udi buakane, budiye nabu mbua kulumbuluisha malu mabi onso a bantu, kadi Mukelenge Yesu wakadi mulue mu ngasa bua kushikija mudimu wa bupikudibua wakamupeshibua kudi Tatu wende. “Katataka yeye [Nzambi] udi wela mukenji ne, Bantu bonso badi kuonso bakudimune mitshima yabo; bua yeye wakasungula dituku didiye ulumbuluisha ba pa buloba mu buakane kudi muntu wakasunguleye. Yeye kabidi wakapa bantu bonso ditabuja dia bualu ebu, bua yeye wakamubisha ku lufu” (Bienzedi 17:30:31).

Yesu udi munya wa ba pa buloba

 Yesu wakabambila kabidi ne, Ndi munya wa ba pa buloba; wandonda kena wendakana mu midima, kadi neikale ne munya wa muoyo (Yone 8:12).

 Pakadi Mukelenge uyisha Diyi dia Nzambi mu ntempelo, bienzedi ne meyi mabi bia bakuabo bakaleja ne bakadi bendakana mu midima. Bienzedi biabo ne meyi abo biakaleja ne bakadi muinshi mua bukokeshi bua Satana. Bakapenda Yesu, bakamba ne, “Udi demon munda” (Yone 7:20, bakateta kumushipa. (Yone 8:40,59). Satana wakadi mushipianganyi ne muena mashimi ku tshibangidilu (Yone 8:44).

 Mukelenge Yesu wakamba ne, “Udi ungitabuja meme kena ungitabuja meme nkayanyi, udi witabuja ne wakuntuma kabidi. Udi untangila meme udi utangila ne wakuntuma kabidi. Nakulua pa buloba bu munya, bua muntu yonso wangitabuja kashadi biandi mu midima” (Yone 12:46).

Munya udi utuambila bualu bua Nzambi

 “Nzambi udi munya” (1 Yone 1:5). Munya udi mumanyishi bualu bua Nzambi. Diba, ngondo ne mitoto bidi biamba bua bufuki buende, bidi biamba bua bukole buende ne meji ende. “Pandi ntangila diulu diebe, didi mudimu wa bianza biebe, ne ngondo ne mitoto biwakufuka; muntu udi nganyi bua wewe kumuelela meji? ne muana wa muntu udi nganyi bua wewe udi umulama ne dinanga?”(Musambu 8:3,4). “Diulu didi diamba butumbi bua Nzambi; bia mu diulu bibaluluke bidi bimuenesha midimu ya bianza biandi” (Musambu 19:1).

 Munya udi wamba bua muoyo (Yone 8:12). Munya udi utuambila bualu bua Diyi dia Nzambi ne dilombola diende. “Diyi diebe didi muinda ku makasa anyi ne munya muteme mu njila wanyi” (Musambu 119:105). Bituenda mu munya netukuame mamuma mu mudimu wonso muimpe, netudiundadiunde mu kumanya kua Nzambi (Kolosai 1:10).

Tushale mu Diyi dia Mukelenge

 Yesu wakambila Bena Yuda bakuitabuja diyi diandi ne, Binuashala mu diyi dianyi, nudi bayidi banyi bulelela; nenumanye kabidi bualu bulelela, ne bualu bulelela nebunupe budishikaminyi (Yone 8:31,32).

 Muntu udi ushala mu Diyi dia Mukelenge udi umusankisha, udi uleja ne yeye udi muyidi wa bushuwa, yeye neumanye bushuwa, “bu mudi bushuwa bua mu Yesu” (Efeso 4:21).

 Mukelenge Yesu wakambila Bena Yuda bakuitabuja diyi diende ne, “Bianupa Muana budishikaminyi, nenuikale budishikaminyi bulelela” (Yone 8:36). Mupostolo Paulo wakafunda ne, “Nunku kakuena dipila mpindiewu kudi badi mu Kilisto Yesu bualu bua mukenji wa Nyuma wa muoyo wa mu Kilisto Yesu wakampikula ku mukenji wa wa bubi ne lufu” (Lomo 8:1,2).

 Muena ditabuja udi ne budishikaminyi bua kusemena pepi ne Nzambi bu Tatu wende bua kumutumbisha. “Nyeye wakatupandisha ku bukokeshi bua midima, wakatubueja mu bukelenge bua Muana wa dinanga diandi” (Kolosai 1:13).

Tabala, wewe udi mulale tulu,
bika ku lufu,
ne Kilisto neakutemene
(Efeso 5:14).