Dielangana dia Meji pa Lumu
Luimpe lua Yone

No 12

Tshimanyinu tshia Kuondapibua kua Musame ku Mpokolo wa Beteseda

“Pakashika malu aa, disanka dia Bena Yuda diakadiku; Yesu wakaya ku Yelushalema. Mu Yelushalema, pepi ne tshibuelelu tshia mikoko, mudi mpokolo wa mayi a kuowa, udi Bena Yuda babikila ne, Beteseda, wakadi ne bitanda bitanu. Mu bitanda amu muakadi mulale tshisumbu tshia bakadi batekete ne bafofo ne balema ne banyane” (Yone 5:1-3).

 Mukelenge Yesu wakadi ne tshilele tshia kuya ku Yelushalema bua Masanka a Yehowa, kadi katataka mupostolo Yone udi ubikila disanka edi ne, “Disanka dia Bena Yuda”. Balombodi ba Bena Yuda, bakuidi banene, Bafalase ne bakuabo, bakamana kukoma Yehowa nyima. Bakadi ne tshimuenekelu tshia buimpe bua Nzambi, kadi bienzedi biabo biakaleja ne, Kabakadi balondi ba Nyuma (les hommes spirituels), bakadi kule kudi Nzambi. Bakaditumbisha bu balondi ba Mose ne mifunda yende, kadi bakapidia bumanyishi buandi kudi Yesu bu Muana wa Nzambi. Bakadi bena kudisua, bafofo ne balondi ba bafofo. Mupostolo Paulo wakafunda bua bantu bakuabo bakadi bakafuanyikisha nabo ne, “Bakafofomishabo mesu a meji a badi kabayi bitabuja kudi nzambi wa tshikondo etshi, bua dinkenka dia lumu luimpe lua butumbi bua Kilisto, udi tshifuanyikiji tshia Nzambi, kaditemi kudibo” (2 Kolinto 4:4). Kunyima kua lukuna lua bantu kudi Yesu, kuakadi “nzambi wa tshikondo etshi”: Satana.

Yesu udi usangana muntu usame mulale pepi ne mpokolo wa mayi

 Mpokolo wa Beteseda wakadi ne mitanda mitanu. Musangu mukuabo tudi mua kuela meji wa mokolo wa mayi a kuowa bu tshifuanyikiji tshia mikenji ya Mose, mikenji ya Mose kayena mimanye mua kusungila muntu. Mikenji idi itupila! Bena Yuda bakadi ne “kuvua kua mishindu ne mishindu” (Ebelu 9:10). Kuvua kuabo kakuakadi mua kujimiji malu mabi a bantu anyi kubapesha ditalala dia muoyo-mukese wabo.

 Nansha muntu umue wakalama mikenji yonso, anu Muntu umue, Muntu Kilisto Yesu. Dituku adi, Yesu wakadi mu ntempelo munkatshi mua bantu mu luse ne mu dinanga ne bukole bua kuondapa mabedi abo ne kujimiji malu mabi abo. Mukelenge Yesu udi mumanye mua kusungila muntu yonso udi ulua kudiye mu ditabuja. Bualu bua Yeye wakadi kayi ne bubi, Yeye wakadi mua kudifila bu mulambu bua mibi yetu pa mutshi mutshiamakane. Mukelenge Yesu udi mumanye mua kusungila ne lupandu lujima badi basemena pa buipi ne Nzambi bua bualu buandi. (Tangila Ebelu 7:25). Mupostolo Petelo wakafundila Bena Yuda bakadi bena ditabuja ne, “Nudi bamanye ne, Tuakupikudibua, kenku bintu bijimina, ku argent anyi ku ngolo … kadi nuakapikudibua ku mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kilisto mene” (1 Petelo 1:18,19).

Yesu udi ukonka musame

  “Pakamumona Yesu mulale, pakamanyeye ne, Yeye wakadi mu bualu ebu musangu mule, wakamukonka ne, Udi musue kuondapibua, anyi? Muntu musame wakamuandamuna ne, Mukelenge, pavuandululabo mayi, tshiena ne muntu wa kumbueja mu mpokolo; pantshidi nya, munga udi umpita kumpala. Yesu wakamuambila ne, “Bika, ambula bulalu buebe, endaku” (Yone 5:6-8). (Bena Yuda bakela meji ne, Ku tshikondo ku tshikondo muanjelo wakavuandalula mayi). Pakamba Yesu ne, “Bika, ambula bulalu buebe endaku, muntu wakakoleshibua lukasa, wakambula bulalu, wakenda” (Yone 5:8,9).

 Bidi bimueneka muntu ewu wakadi usama bualu bua bubi buakenzeye, musangu mukuabo pakadiye nsongalume. Mukelenge Yesu wakamuambila ne, “Mona, wakukola; kuenji bualu bubi kabidi, bua dikenga ditambe kadilu kuudi. Muntu awu wakumuka, wakambila Bena Yuda ne, Wakankolesha udi Yesu. Bua bualu ebu Bena Yuda bakatatshisha Yesu, bua yeye wakenza malu aa dituku dia Lumingu” (Yone 5:14-16).

Bumanyishi kudi Yesu

 Kuondapa kua muntu wakadi usama bidimu makumi asatu ne muanda mukulu kudi Yesu kuakadi tshimanyinu ne Yeye wakadi Muana wa Nzambi, mutumibue kudi Nzambi mu buloba buetu bua kushikija meyi a baprofete ba kale, mafunda mu Mukanda wa Nzambi, bualu bua Musungidi, Muprofete, Muakuidi ne Mukelenge. Mu Yone nshapita 5 tudi ne:

1.  Bumanyishi bua Yone Mubatiji: “Nuenu nuakatuma bantu kudi Yone, ne yeye
      wakujadika bualu bulelela ne kuamba kuandi” (Yone 5:33).
2.  Bienzedi bia Yesu: “Tshimanyinu tshindi natshi tshidi tshitambe diyi dia Yone,
      bualu bua malu a kukema akumpa Tatu bua meme kuenza, malu antshidi
      ngenza mene, adi angamba ne, Tatu wakuntuma” (Yone 5:36).
3.  Bumanyishi bua Tatu: “Tatu wakantuma wakungamba kabidi” (Yone 5:37.
      Tangila Matayo 3:17).
4.  Bumanyishi bua Mukanda wa Nzambi: Mukelenge wakambila Bena Yuda ne,
      “Nudi nukeba kujingulula malu adi mafunda mu Mukanda wa Nzambi, bua nudi
      nuelangana meji ne, Mu malu aa tudi ne muoyo wa tshiendelele; malu awu kabidi adi
      angamba; kanuena basue kulua kundi bua nuenu kuikala ne muoyo” (Yone 5:39,40).
5.  Mose wakafunda bualu bua Yesu: “Kanuedianganyi meji ne, Meme nenubande
      ku mesu kua Tatu; mukuabo udiko; Mose mene, unudi beyemene, yeye neanubande.
      Bu nuenu bitabuje Mose nuakadi kungitabuja meme, bua yeye wakafunda bualu
      buanyi?” (Yone 5:45,46).

Bumanyishi bua Yesu bualu bua muoyo wa tshiendelele

 Bena ditabuja bakuabo badi ne mpata bua lupandu luabo. Bakuabo badi bela meji tudi nabu mbua kuela bienzedi bimpe bua kupeta lupandu. Kadi meyi a Mukelenge Yesu adi ajadika bushuwa bualu bua lupandu luetu patoke too. Yeye wakambila bantu bakadi mu ntempelo ne, “Bulelela, bulelela, ndi nuambila ne, Unvua diyi dianyi, witabuja wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo” (Yone 5:24).

 Muntu wakadi mulale pepi ne mokolo wa mayi, kayi ne bukole bua kuenda, wakambila Bena Yuda ne, “Wakunkolesha udi Yesu” (Yone 5:15). Mukanda wa Nzambi udi wamba ne, “Mu munga muntu yonso kamuena lupandu, bualu bua kakuena dinga dina munshi mua diulu, dipa bantu didi dimanye mua kutusungila” (Bienzedi 4:12).

Mukelenge Yesu wakamba ne, “Luayi kundi,
bonso badi ne mudimu mukole, badi ne bujitu bunene,
meme nenupe dikisha. Angatayi mutshi wanyi wa tshikokedi
pa nshingu yenu, nuyile malu kundi; bualu bua meme
ndi ne kalolo ne kanemu mu mutshima wanyi; nunku
nuenu nenusangane dikisha mu mitshima yenu”
(Matayo 11:28,29).