Dielangana dia Meji pa Lumu
Luimpe lua Yone

No 11

Yesu udi ukolesha Muana wa Muntu Munene

Yesu “wakalua kabidi ku Kana wa Galela kuakakudimuneye mayi nvinyo. Mulopo wa mukelenge wakadi ne muanandi usama mu Kapenuma. Pakunvueye lumu ne, Yesu wakumuka mu Yudaya, wakulua mu Galela, wakaya kudiye, wakamutendekena ne, Upueke, wondape muananyi; bualu bua lufu luakadi lumutonde. Yesu wakamuambila ne, Binuikala kanuyi numona bimanyinu ne malu a kukema, kanuena nuitabuja, nasha kakese. Mulopo wa mukelenge wakamuambila ne, Mukelenge, Pueka diambedi muananyi kayi muanze kufua. Yesu wakamuambila ne, Ya biebe, muanebe udi ne muoyo. Muntu awu wakitabuja Diyi diakamuambila Yesu, wakaya biandi. Pakadiye uya mu njila, bantu bandi bakasangila nandi, bakamuambila ne, Muanebe udi ne muoyo. Yeye wakabakonka diba diakabangeye kusangala. Bakamuambila ne, Makelela, pakadi diba pa umue, mubidi kapia wakamulekela. Nunku tatu wakamanya ne, Mpa diba adi mene diakungambila Yesu ne, Muanebe udi ne muoyo. Yeye wakitabuja ne ba mu nzubu wandi bonso. Etshi ntshimanyinu tshibidi tshiakenza Yesu pakumukeye mu Yudaya, pakalueye mu Galela” (Yone 4:46-54).

Yesu udi mupidibue kudi balombodi ba bantu ba mu Yelushalema

 Mukelenge Yesu wakashiya Yudaya bua kupingana mu Galela. Bakuidi banene, Bafalase, ne balombodi ba bantu ba mu Yelushalema, bakamupidia ne bumanyishi buende. Katuena tubala ne Yesu wakalala mu Yelushalema kunyima kua dibanga dia mudimu wende wa kuambila bantu malu a Nzambi. Pakadiye mu Yelushalema bua musangu wa kunshikidilu, diambedi yeye kayi muanze kudifila bua malu mabi etu pa mutshi mutshiamakane, “wakalupuka mu musoko, wakaya ku Betania, wakalalaku” (Matayo 21:17).

 Pakapingana Yesu ku Galela, Mukelenge Yesu wakapitshila Samalia. Bena Samalea ba bungi bakamuitabuja. “Bakamusengelela ne, Shala netu; yeye wakalamu matuku abidi” (Yone 4:40). Bikala Bena Yelushalema ne Bena Yudaya bamupidia, bakuabo mu Samalia ne Galela nebamuitabuje. “Pakalueye mu Galela nunku, Bena Galela bakamuitabuja” (Yone 4:45).

Yesu udi wondapa muana wa muntu munene bua ditabuja diende

 Mulopo wa mukelenge, wakadi mushikame mu Kapenuma, wakadi ne muana wa mulume wakadi usama be. Yeye wakunvua Yesu udi mu Kana, bualu bua kanyinganyinga kende kakole ne dinanga diandi bua muana, yeye wakabanga luendu bua kusengelela Yesu bua kulua ku Kapenuma bua kuondapa muanende, luendu lua bu 39 kilomètres en voiture lelu.

 Pakafikeye mu Kana, mulopo wakatendekena Yesu ne, “Upueke, wondapeye muananyi; bualu bua lufu luakadi lumutonde”. Yesu wakamuambila ne, “Binuikala kanuyi numona bimanyinu ne malu a kukema, kanuena nuitabuja, nasha kakese” (Yone 4:47,48).

Mukelenge Yesu udi utete ditabuja dia mulopo

 Yesu wakateta ditabuja dia mulopo, kadi yeye wakamanya ne, Bantu bakuabo badi bakeba bimanyinu ne malu a kukema bua kungitabuja. Bafalase bakuabo “bakamuteta munda ne, Utuleje tshimanyinu tshia mu diulu” (Mako 8:11). Bakuabo bakamukonka ne, “Udi wenza tshimanyinu kayi bua tuetu tumone, tuitabuje diyi diebe? Tshiudi wenza tshinyi? (Yone 6:30). Malomba abo akaleja bupidia mu mitshima yabo!

 Mulopo wakadi muntu wa ditabuja, wakambila Yesu ne, “Mukelenge, pueka diambedi muananyi kayi muanze kufua. Yesu wakamuambila ne, Ya biebe, muanebe udi ne muoyo. Muntu awu wakitabuja diyi diakamuambila Yesu, wakaya biandi” (Yone 4:49).

 Katataka Mukelenge Yesu udi mu Diulu, kadi utshidi wandamuna kudi malomba a bantu bandi, diyi diende ditshidi ne bukole buadi bua kale. Mukanda wa Nzambi udi ukolesha mitshima yetu bua kusemena pepi nende ne malomba etu. “Bualu bua tuetu tudi ne muakuidi munene wakupita mulu onso, Yesu, Muana wa Nzambi mene, tulamate dijukula dia ditabuja dietu. Bualu bua katuena ne muakuidi munene udi kayi mumanye mua kukenga netu mu matekete etu, kadi tudi ne umue wakuteyibua mu malu onso muomumue atudi tuteyibua nawu, kayi ne bubi. Nunku, tusemene ne dikima pepi ne nkuasa wa butumbi wa ngasa, bua tuetu tupete luse ne bua tusangane ngasa bua kutukuatshisha mu tshikondo tshia dikengela dietu” (Ebelu 4:14-16).

Bena mudimu ba mulopo badi basangila nandi mu njila

 Tuela meji ndambu bualu bua dipingana dia mulopo ku Kapenuma: “Pakadiye uya mu njila, bantu bandi bakasangila nandi, bakamuambila ne, Muanebe udi ne muoyo. Yeye wakabakonka diba diakabangeye kusangala. Bakamuambila ne, Makelela, pakadi diba pa umue, mubidi kapia wakamulekela. Nunku tatu wakamanya ne, Mpa diba adi mene diakungambila Yesu ne, Muanebe udi ne muoyo. Yeye wakitabuja ne ba mu nzubu wandi bonso” (Yone 4:51-53).

 Pamutu pa disanka dia mu diku dia mulopo wa mukelenge bua kuondapibua kua muana, disanka dikuabo dikadiku, disanka dia lupandu. Mulopo ne ba mu nzubu wandi bonso bakitabuja Mukelenge Yesu bu Musungidi wabo.

 Tudi tuela meji bua disanka dia mulami wa nzubu wa lukanu mu Filipoi ne disanka dia mu diku diende pakitabujabo Mukelenge Yesu. Dituku dikuabo, balumbuludi ba mu musoko bakabueja Paulo ne Sila mu nzubu wa lukanu bua diyisha dia Lumu Luimpe. “Pakalua bu mundankulu, Paulo ne Sila bakadi batendelela, bakadi bimbila Nzambi misambu, bena lukanu bakadi bateleja; buloba buakakanka bikole, bishimikidi bia nzubu wa lukanu biakanyunga, bibi bionso biakunzuluka lukasa, nkanu ya bantu bonso yakadibo babasuike nayi yakasuluka” (Bienzedi 16:25,26). Mulami wa nzubu wa lukanu wakamanya ne, Paulo ne Sila bakadi bena mudimu ba Nzambi ne yeye wakadi ne lupandu bualu, wakamba ne, “Bakelenge, bundi nabu mbua kuenza tshinyi bua kusungidibua? Bakamba ne, Itabuja Mukelenge Yesu, neusungidibue” (Bienzedi 16:31,32). Mulami “wakabanda nabo mu nzubu wandi, wakabalongoluela mesa, wakatamba kusanka ne nzubu wandi yonso, bamane kuitabuja Nzambi” (Bienzedi 16:30-34).

Disanka didi lupetu lua lupandu

 Muena ditabuja udi mua kujimija disanka dia lupandu, bu mukelenge Davidi pakapangeye bua kuenda mu njila ya Nzambi. Mu dilomba diende bua dibuikidila dia mibi yende, Davidi wakamba ne, “Unguvuwe, nempite neige butoke too. Umpingishile disanka dia lupandu luebe, unshidike ne mutshima wa mua kuenza bu mu disua diebe” (Musambu 51:7,12).

  Patuapanga, tuye lubilu kudi Mukelenge. Mukelenge udi musue bantu bandi bua kuikala ne disanka diende. Disanka dia Mukelenge didi bukole buabo (Tangila Nehemiya 8:10).

Mukelenge Yesu wakamba ne:
“Binuatumikila mikenji yanyi, nenushale mu dinanga dianyi,
bu munakutumikila mikenji ya Tatu wanyi, ne mundi nshala mu dinanga diandi,
Nakunuambila malu aa bua disanka dianyi kuikaladi munda muenu,
ne bua disanka dienu kukumbanadi” (Yone 15:10,11).