Dielangana dia Meji pa Lumu
Luimpe lua Yone

No 8

“Bakadi benda mu midima bakumona munya munene; pa bantu bakadi bashikame mu buloba bua midima mikole pakatemena munya awu” (Yeshaya 9:2).

 “Nzambi kakatuma Muana wandi pa buloba bua kulumbuluisha ba pa buloba, kadi bua ba pa buloba basungidibue kudiye. Kabena balumbuluisha wamuitabuja, kadi bakumana kulumbuluisha wapidia kuitabuja, bualu bua kakitabuja dina dia Muana umuepele mulela wa Nzambi. Etshi ntshilumbu tshia bantu ne, Munya wakalua pa buloba, kadi bantu bakasua midima, kabakasua munya, bua bienzedi biabo biakadi bibi. Muntu yonso utu wenza malu mabi katu wasua munya, kena ulua mu munya bua bienzedi biende kabimanyibu. Kadi muntu yonso utu wenza malu mimpe udi ulua mu munya bua bienzedi biende bimueneke, bualu bua biakenjibua mu Nzambi” (Yone 3:17-21).

Nzambi kakatuma Muanandi pa buloba bua kulumbuluisha ba pa buloba

 Disua dia Nzambi didi bua bantu bonso bikala ne muoyo. Mukanda wa Nzambi udi wamba ne, “Mukelenge … udi nenu lutulu, kena musue umue wenu ajimine, kadi udi musue bonso balue kukudimuna mitshima yabo” (2 Petelo 3:9). Lumu Luimpe ludi kudi bantu bonso, “bua muntu yonso wamuitabuja kafu biandi, kadi ikale ne muoyo wa tshiendelele (Yone 3:16).

Pakadi Mukelenge Yesu pa buloba Yeye wakadi munya wa ba pa buloba (Yone 9:5)

 Pakadi Mukelenge Yesu mu Galela, bantu bakadi bashikame mu midima, bakadi benda mu midima. Satana udi mfumu wa bamfumu ba midima. Paulo wakafundila Bena Efeso bualu bua “makelenge ne makokeshi ne bamfumu ba midima ba buloba ebu, ne bisumbu bia nyuma mibi bidi mu miaba ya mu diulu” (Efeso 6:12). Satana udi “nzambi wa tshikondo etshi” (2 Kolinto 4:3,4), kadi Yeye udi munya wa ba pa buloba wakamba ne, “Wandonda kena wenda-kana mu midima, kadi neikale munya wa muoyo” (Yone 8:12).

Mukanda wa Nzambi udi wamba wa mishindu ya midima mishilangane:

1.  “Buloba kabuakadi busunguluka, buakadi butupu; midima yakadipu … Nzambi wakamba ne, Munya wikale, ne munya wakikala” (Genese 1:2,3. 2 Kolinto 4:6). Midima eyi idi midima ya butuku - “obscurité naturelle”.
2.  “Bantu bakasua midima, kabakasua munya, bua bienzedi biabo biakadi bibi” (Yone 3:19).
3.  Mu matuku a muprofete Yelemiya, Bena Yuda wakakoma Nzambi nyima, yeye wakabadimusha bua bupidia buabo, wakabambila ne, “Unvuayi, teleja matshu, kanuikadi ne dipetu, bualu bua Yehowa wakuamba diyi diandi. Tumbishayi Yehowa Nzambi wenu, diambedi yeye kayi muanze kunutumina midima, diambedi makasa enu kayi manze kulenduka pa mutu pa mikuna idi ne midima, ne panutshidi nukeba munya, yeye neawandamune bua kuikalawu mufitu, neauvuije midima mikole” (Yelemiya 13:15,16).
    Midima mitumibue kudi Nzambi bua bupidia idi kulumbulula kua midima. (Obscurité judiciaire).
4.  Yesu wakamba bua Bena Yuda bakuabo bakadi bela meji ne, Tudi bana ba bukelenge bua mu diulu, kadi kabakadi ne ditabuja ne, “Ndi nuambila ne, Bantu ba bungi nebalue ku esete ne ku wesete, nebadie bidia ne Abalahama ne Isaka ne Yakoba mu bukelenge bua mu diulu; kadi nebimashe bana ba mu bukelenge pa bula mu midima; muadi newikalemu ne kusumakana menu” (Matayo 8:11,12).

 Mose, muntu wa Nzambi, wakadi ne bujitu bunene pambidi pende bualu bua tshikadilu tshia nyuma tshia Bena Isalele. Wakamba ne, “Bobo badi bu tshisamba tshia bantu badi kabayi ne lungenyi, kabena ne dijingulula dia malu munda muabo. Bu bobo bikale ne lungenyi, bakadi kujingulula bualu ebu, bakadi kuela meji a malu alua kudibo” (Dutelonome 32:28,29).

Bukokeshi bua midima

 Pakafika diba bua Mukelenge Yesu kumuka pa buloba ebu, yeye wakalua mu Getesemene butuku, mu muaba wa mitshi ya mamuma. Pakalua bena lukuna bende bua kumukuata, Yeye wakabambila ne, “Panakadi nenu mu ntempelo ku dituku ku dituku, kanuakandenga bianza; kadi edi diba ndienu, ne bukokeshi bua midima (Luka 22:53).

 “Pakangata Yudasa tshisumbu tshia masalayi ne tupalayi tua bakuidi banene ne Bafalase, wakaluamu ne minda ne bimunyi ne bintu bia mvita. Nunku Yesu wakamanya malu onso akadi alua kudiye, wakaya kudibo wakabakonka ne, Nudi nukeba nganyi? Bakamuku-dimuna ne, Yesu wa ku Nazaleta. Yesu wakabambila ne, Mmeme. Yudasa, mumutungidi, wakadi muimane nabo. Pakabambileye ne, Mmeme, bakapingana tshianyima, bakadi-shinda” (Yone 18:2-6). Kabakadi bukole bua kumukuata.

 Mukelenge Yesu wakadifila mu bianza bia bantu babi bua kujikija mudimu wa bupikudi wakamupesheye kudi Nzambi. Bukokeshi bua midima kabuakadi bukokeshi pa mutu pa Muana wa Nzambi. Kabakadi ne bukole bua kumushipa. Yeye wakaya nabo ku makenga makole ne kunshikidilu, ku lufu luende pa mutshi mutshiamakane. Bena lukuna bandi kabakamanya ne, Ku lufu luende yeye wakavuija tshianana “udi ne bukole bua lufu, ndiabolo mene; ne bua yeye apikule bonso aba bakadi bakuatshibue mu bupika matuku onso a muoyo wabo bua ditshina diabo dia lufu” (Ebelu 2:14,15).

Nzambi udi upandisha bantu bende ku bukole bua Satana

 Paulo wakafundila bena ditabuja ba ku Efeso: “Nusakidile Tatu, wakatuvuija bantu badi mua kuikala babanyanganyi ba bupianyi bua basanto bua mu munya. Nyeye wakutupandisha ku bukokeshi bua midima, wakatubueja mu bukelenge wa Muana wa dinanga diandi, utudi ne kupikudibua kuetu munda muandi, nkujimisha kua mibi yetu” (Kolosai 1:12-14).

 Bantu ba Mukelenge kabena bashikama mu midima, bu Bena Isalele ba kale, pakadi midima mikole yakadi mu buloba bua Ejipitu, “munya wakadi mu nzubu ya Bena Isalele bonso” (Ekesode 10;23).

 Mukelenge Yesu wakamba ne, “Nuenu nudi munya wa buloba. Kabena bamanye mua kusokoka musoko udi muasa pa mukuna. Nunku munya muenu uteme ku mesu kua bantu, bamone midimu yenu mimpe, batumbishe kabidi tatu wenu udi mu diulu” (Matayo 5:14,16). Paulo wakafundila ekeleziya wa ku Efeso ne, “Diambedi nuakadi midima, kadi katataka nudi munya mu Mukelenge; endayi bienu bu bana ba munya” (Efeso 5:8).

“Nunku, bu munuakitabuja Kilisto Yesu Mukelenge,
nuikale nuende mu Kilisto; nuikale ne miji yenu
miedibue munda muandi, nuikale nuashibue
munda muandi, ne nuikale nujadikibue mu
ditabuja diebe, bu munuakayishibua;
nukumbane ne disakila”
(Kolosai 2:6,7).