33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Dielangana dia Meji pa Lumu
Luimpe lua Yone

No 6

Yesu udi ubanda ku Yelushalema bua Disanka dia Kupita kua Yehowa;
udi ubuela mu Ntempelo

 “Disanka dia Kupita kua Yehowa dia Bena Yuda diakadi pa buipi, Yesu wakabanda ku Yelushalema. Wakasangana mu ntempelo bapanyi ba ngombe ne mikoko ne nyunyu ya nkutshi, ne bashintakashi ba mpalata bashikame; yeye wakasuikakasha muonshi ne tuonshi tukese wakipata buonso buayi mu ntempelo ne mikoko ne ngombe, wakitshikisha mpalata ya bashintakashi, wakatokola mesa abo; wakambila bapanyi ba nyunyu ya nkutshi ne, Umushayi bintu ebi; kanuvuiji nzubu wa Tatu wanyi bu wa bendi ba mushinga. Bayidi bandi bakavuluka Diyi didi difunda mu Mukanda wa Nzambi ne, Lukunukuna lua ku nzubu webe nelundie. Bena Yuda bakamuebeja ne, Bualu bua wewe udi wenza nunku, udi utuleja tshimanyinu kayi? Yesu wakabakudimuna Diyi ne, Bumbulayi ntempelo ewu, nemubishe kabidi matuku asatu. Bena Yuda bakamba ne, Bakibaka ntempelo ewu bidimu makumi anayi ne bisambombo, wewe neumuibake kabidi matuku asatu, anyi? Kadi yeye wakadi wamba bua ntempelo wa mubidi wandi. Pakabikeye ku lufu, bayidi bandi bakavuluka Diyi edi diakambeye, bakitabuja malu akadi mafunda mu Mukanda wa Nzambi ne Diyi diakamba Yesu” (Yone 2:13-22).

Ntempelo wa Solomo

 Pakadi ntempelo wa kumpala muibakibue kudi mukelenge Solomo, wakadi muaba wa butumbi bua Nzambi, muaba bua kutekemu Dina diende. Nzambi wakasua bua kuikala ne bantu bandi, bua kushikama nabo. “Diyi dia Yehowa diakalua kudi Solomo ne, Bua nzubu ewu uudi wibaka, biwenda mu njila yanyi, biwenza meyi anyi, biwatumikila mikenji yanyi yonso, nunku nenjadike diyi dianyi kuudi, dinakambila Davidi, tatu webe. Nenshikame munkatshi mua Bena Isalele, tshiena ndekela bantu banyi, Bena Isalele” (1 Bakelenge 6:11-13).

 “Biadipuekesha bantu banyi badi babikila dina dianyi, biantendelelabo, biakebabo mpala wanyi, ne biakudimunabo mitshima yabo bua mibi yabo, nengunvuile mu diulu, nembabuikidile mibi yabo, nensangashe buloba buabo. Nentabale mesu anyi, nenteleje matshu anyi ku kulomba kudibo balomba mu nzubu ewu. Bualu bua nakusungula, nakujidila nzubu ewu, bua dina dianyi dikalemu tshiendelele” (2 Kulondolola 7:14-16).

 Solomo ne Bena Isalele bakadi ne anu bua kutumikila Nzambi bua kumanya mpala wende (“la présence de Dieu”) nabo.

Pakadi Solomo muntu mununu wakenza malu mabi ku mesu kua Yehowa

 “Pakalua Solomo muntu mununu, bakaji bandi bakakudimusha mutshima wandi bua kulondeye nzambi mikuabo; mutshima wandi kawakadi muakane ku mesu kua Yehowa, Nzambi wandi, bu muakadi mutshima wa Davidi, tatu wandi. Yehowa wakadi nandi tshiji, bualu bua mutshima wandi wakumuka kudi Yehowa, Nzambi wa Isalele” (1 Bakelenge 11:4,9).

 Nzambi wakaleja Bena Isalele lutulu lua bungi. “Yehowa, Nzambi wa bankambua babo, wakananukila kubatumina bambi bandi, bualu wakadi ne bantu bandi ne muaba wandi luse; kadi bobo bakaseka bambi ba Nzambi; bakapetula meyi andi, bakapenda baprofete bandi too ne pakamueneka tshiji tshia Yehowa kudi bantu bandi tshidi katshiyi tshishika. Nunku yeye wakatuma mukelenge wa Bena Kasada bua kuluanganeye nabo, bakashipa bansongalume babo ne muele wa mvita mu muaba wabo wa tshijila; kabakafuila bansongalume ne bansongakaji batshidi kamama nansha bantu banunu bakoke luse; wakabafila bonso mu bianza biandi. Bakosha nzubu wa Nzambi ne kapia, bakashimbula ngumbu ya Yelushalema, bakosha mbalasa yawu yonso ne kapia, bakapaula bintu bionso bia mushinga mukole. Bakaya ne bantu bakapanduka ku muele wa mvita ku Babulona” (2 Kulondolola 36:15-17, 19,20).

Ntempelo pakadi Mukelenge Yesu pa buloba

 Pakadi Mukelenge Yesu pa buloba, Bena Yuda bakadi ne ntempelo munene ne mulenga, muibakibue kudi mukelenge Helode (Hérode le Grand) bua kusankisha bantu. Helode wakadi muena lukisu ne muntu mubi be.

 Bayidi bakuabo bakamba bualu bua ntempelo ne, “Udi mulengesha ne mabue mimpe ne bintu bifila kudi bantu, Yesu wakamba ne, Nudi nutangila bintu ebi, kadi matuku nealue ikalabo kabayi bashiya dibue dimue pamutu pa dikuabo, nebaasasule buonso buawu” (Luka 21:5,6).

 Bena Yuda bakalama bilele bia Disanka dia Kupita kua Yehowa kadi balombodi babo bakamana kukoma Nzambi nyima. Ntempelo wakadi mubikidibue kudi Mukelenge Yesu ne, “Nzubu wenu”. Mukelenge wakayisha bantu mu ntempelo ne, “Kabakafunda mu Mukanda wa Nzambi ne, “Nebabikile nzubu wanyi ne, Nzubu wa tshitendelelu tshia bisamba bionso, anyi? Kadi nuenu nuakumvuija muaba wa banyengi! Bakuidi banene ba Nzambi ne bafundi pakunvuabo diyi edi, bakakeba mua kumushipa; bakamutshina, bualu bua diyisha diandi diakakemesha bantu bonso” (Mako 11:17,18).

 Bena Yelushalema ne balombodi babo kabakatshina Nzambi. Bakuidi banene ne balombodi ba bantu bakadi ne Mukelenge Yesu lukuna. Pakamukuatabo ne bakamufila kudi Pilato, ngovena wa Bena Lomo, yeye wakamulumbuluisha, wakaya kudi bantu, wakabambila ne, “Tshiena mumusangane ne bualu. Nudi ne tshilele tshienu tshia meme kumulekela muntu umue pa Kupita kua Yehowa; nudi basue nnulekele Mukelenge wa Bena Yuda, anyi? Kadi bobo bakela mbila kabidi ne, Muntu ewu, nansha, anu Balaba. Balaba wakadi munyengi wa bintu” (Yone 18:38-40).

 Nzambi kena usekibua. Mu tshidimu 70 après JC, Bena Lomo bakashipa bantu ba bungi ba mu Yelushalema. Bakabutula musoko bilondeshile pa diyi dia Mukelenge kudi bayidi bende. Katshia dibutuku dia ntempelo kudibo too ne lelu Bena Isalele kabena ne ntempelo. Lelu Bena Musulman badi ne mosquée pamutu pa muaba wa ntempelo wakadi mu Yelushalema.

Ekeleziya wa Nzambi udi Ntempelo wa Nyuma Muimpe

 Paulo wakafundila bena ditabuja ba ku Efeso, Bena Yuda ne bantu ba bisamba bia bende ne, “Nunku kanuena bantu ba bende ne benyi kabidi, kadi nudi bena kuabo ne basanto ne ba mu tshiota tshia Nzambi. Tudi tuibakibua pamutu pa bapostolo ne baprofete, bu bishimikidi bia nzubu; Kilisto Yesu nkayandi udi dibue dinene dia ku ditumba dia nzubu; bitupa bionso bia nzubu bilungukaja bimpe bidi bidiundadiunda too ne paluabi ntempelo tshia tshijila mu Mukelenge; munudi bibakibue popamue kabidi, munda muandi, bua kuikala nzubu wa Nzambi mu Nyuma” (Efeso 2:19-22).

Mubidi wa muena ditabuja udi ntempelo wa Nyuma Muimpe

 Pakadi Mukelenge Yesu pepi bua kudifila bua malu mabi etu pa mutshi mutshiamakane, yeye wakasamba bayidi bandi bakadi nandi ku tshibangidilu, yeye wakambia ne, “Mitshima yenu kayizakadi; nuitabuje Nzambi, nungitabuje meme kabidi. Binuansua, nenuenze mikenji yanyi. Nendombe Tatu, yeye neanupe Musambi mukuabo, ikale nenu tshiendelele, Nyuma wa bulelela mene udi ba pa buloba kabayi bamanye mua kuangata, bua bobo kabena bamumona, kabena bamumanye; nuenu nudi bamumanye bua yeye utu wikala nenu, neikale munda muenu. Tshiena nushiya bana ba nshiya, nempingane kunudi. Meme muye mbimpe bienu; bingikala tshiyi nya, Musambi kena ulua kunudi; kadi binaya, nenutumineye” (Yone 14:1,15-18. 16:7).

 Muaku, “Musambi”, mu Lumu Luimpe lua Yone, ne muaku, “Muakuidi”, mu 1 Yone 2:1, idi muomumue mu Buena Gelika - muaku wa Dipungila Dipia-dipia. Nyuma Muimpe udi Mukuatshishi wetu ne Muakuidi wetu mu buloba. Mukelenge Yesu udi Mukuatshishi wetu ne Muakuidi wetu kudi Tatu mu diulu (Ebelu 9:24. 1 Yone 2:1).

 Paulo wakadi bujitu pambidi pende bualu bua bienzedi bia bena ditabuja bakuabo mu Kolinto. Yeye wakabafundila ne, “Kanuena bamanye ne, mubidi wenu udi ntempelo wa Nyuma Muimpe udi munda muenu, unudi nuangata kudi Nzambi, anyi? Kanuena bena mioyo yenu. Bualu bua nuakasumbibua ku mushinga mukole; nunku nutumbishe Nzambi mu mubidi wenu” (1 Kolinto 6:19,20).

 Tuende bua kusankisha Nzambi Tatu wetu, ne Musungidi wetu, Mukelenge Yesu wakadifila bua bualu buetu, ne dikuatshisha dia Nyuma Muimpe. Katunyingalaja Nyuma Muimpe wa Nzambi, udi munda muetu "tshidiku too ne palua dituku dia bupikudi" (Efeso 4:30).

"Nunku, bana betu, ndi nusengelela, bua luse lua Nzambi,
bua nufile mibidi yenu bu mulambu udi ne moyo,
wa tshijila udi usankisha Nzambi bimpe,
ne didi diakane tshishiki" (Lomo 12:1).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.