33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Dielangana dia Meji pa Lumu
Luimpe lua Yone

No 3

Mukelenge Yesu udi ubanga mudimu wende bua kuyisha bantu

“Yone wakamona Yesu ulua kudiye, wakamba ne, Tangilayi, Muana wa mukoko wa Nzambi, udi umusha bubi bua ba pa buloba!” (Yone 1:29).

 Mvese wetu wa kumpala udi wamba bua bualu bukuabo butamba bunene mu histoire wa ba pa buloba bonso. Mukelenge Yesu Kilisto wakadi mulue bua kumueneka kudi Bena Isalele bu Mukelenge wabo ne kubanga mudimu wende wa kuyisha Lumu Luimpe.

 Yeye wakadi bu bidimu makumi asatu pakalueye kudi Yone Mubatiji. Yone wakadi uyisha bantu bakadi balua kudiye ne wakabatiza bobo bakitabuja message wende mu musulu wa Yadene. Message wa Yone wakadi ne, “Kudimunayi mitshima yenu; bualu bua bukelenge bua mu diulu budi pepi” (Matayo 3:2). Yesu wakakadi pepi bua kumueneka kudi Bena Isalele bu Mukelenge wabo mulayibue. Yone Mubatiji wakadi mulue bua kulongolola mitshima yabo bua kumuitabuja.

 Pakadi Yesu bidimu dikumi ne bibidi, tudi tubala ne yeye wakaya ne Yosefe ne Malia ku Disanka dia Kupita kua Yehowa mu Yelushalema. Katuena ne lumu bua bualu buende kabidi too ne pakalueye kudi Yone Mubatiji ku musulu wa Yadene.

Yone Mubatiji udi uyisha bantu mu tshipela

 Yone Mubatiji wakadi ushikama mu tshipela, kule ku misoko minene ya Bena Isalele ne ku Yelushalema. Bia kudia biandi biakadi mikumbi ne buitshi (Matayo 3:4). Bakuidi banene ba Nzambi ne bakulu ba bantu ba mu Yelushalema kabakamuitabuja anyi diyisha diandi (Matayo 21:23,32), kadi bantu bakuabo ba bungi, pakumvuabo dibikila diende bua kukudimuna mitshima yabo, bakakudimuka kudi Nzambi ne bakadi babatijibua. Pakabatijibua, bakaleja bantu bonso ne, Tudi ku luseke lua bantu badi banemeka Nzambi ne Diyi diandi mu tshisamba tshietu.

Bumanyishi bua Yone Mubatiji: Yesu udi Muana wa mukoko wa Nzambi

 Pakamona Yone Yesu ulua kudiye, wakamba ne, “Tangilayi, Muana wa mukoko wa Nzambi, udi umusha bubi bua ba pa buloba!” (Yone 1:29).

 Mukelenge wakadi mulue ke anu bu kushikija milayi ya Nzambi bualu bua dilua dia Musungidi, kadi bua Umue udi mumanye mua kuumusha bubi kashidi. Mukanda wa Nzambi udi wamba bua bualu buende ne, “wakamueneshibua bua kujimisheye bubi ku kudifila kuandi bu mulambu” (Ebelu 9:26).

 Mukelenge Yesu wakadifila bua bualu buetu. Bikala Mukelenge Yesu wakafuta dibanza dietu bua malu mabi etu, udi mumanye mua kutubanda nganyi? Mukanda wa Nzambi udi wamba ne, “Udi mua kubanda basungudibue kudi Nzambi nganyi? Udi ubabingisha nNzambi (Lomo 8:33). Mukelenge Yesu wakafila muoyo wende bua kupikula nawu bantu ba bungi (Mako 10:45). Paulo wakavuluija bena Kilisto ba mu Kolinto ne, Kabena bena mioyo yenu, “Bualu bua nuakasumbibua ku mushinga mukole; nunku nutumbishe Nzambi mu mubidi wenu” (1 Kolinto 6:20).

Mukelenge Yesu wakalua bua kujimija muji wa malu mabi onso - bubi

 Mukelenge Yesu wakalua pa buloba bua kujimisheye bubi, buena kuamba ne, ke anu mibi ya muntu yonso udi utonda malu mabi ende ne udi ulua kudiye bua lupandu, kadi bua kujimisha muji wa malu mabi onso, bubi. Mu dituku dilualua bubi nebuikale buumushibue kashidi. Tudi tubala mu Mukanda wa Nzambi bualu bua diulu dipia-dipia ne buloba bupia-bupia. Nzambi neavuije bintu bionso bipia-bipia (Buakabuluibua 21:1,5). Mu dituku adi Nzambi neikale ne bantu bandi. “Nzambi muine neikale nabo, neikale Nzambi wabo. Yeye neakupule tshinsonshi tshionso ku mesu kuabo; ne lufu kaluena luikalaku kabidi, madilu kaena ikalaku kabidi, nasha muadi, nasha kanyinganyinga kabidi; malu a kumudilu akumuka” (Buakabuluibua 21:3,4)

Bumanyishi bua Yone Mubatiji: Yesu udi Muana wa Nzambi

 Ku musulu wa Yadene, “Yone wakamba ne, Nakumona Nyuma upueka mu diulu bu nyunyu wa nkutshi, wakumuikila. Tshiakumumanya; kadi wakantuma bua kubatiza bantu mu mayi wakungambila ne, Muntu uwatangila Nyuma upuekela pambidi pandi, mumuikile, yeye nguabatiza bantu mu Nyuma Muimpe. Nakumona bualu ebu, ne nakumanyisha bantu ne, Ewu udi Muana wa Nzambi” (Yone 1:32-34).

Dibatiza mu Nyuma Muimpe

 Yone Mubatiji wakabatiza bantu ne mayi kadi Nzambi wakamanyisha Yone bua dibatiza dikuabo - dibatiza ne Nyuma Muimpe. Luka udi ufundila mu Bienzedi bia Bapostolo bua bualu ebu. Pakadisangisha Mukelenge Yesu ne bayidi bandi, kunyima kua dibika diandi ku lufu, “Yeye wakabambila bikole ne, Kanumuki mu Yelushalema, kadi nuindile mulayi wa Tatu unuakunvua kundi. Bulelela, Yone wakabatiza bantu ne mayi, kadi matuku kaena mashale a bungi anuabatijibua mu [anyi ne] Nyuma Muimpe” (Bienzedi 1:4,5).

 Dibatiza edi kadiena dimueneka ku mesu. Mu matuku etu, pakatonda muntu bubi buandi, padiye witabuja Mukelenge Yesu bua lupandu luende, udi wangata dipa dia Nyuma Muimpe. Nyuma Muimpe, udi munda mua muena kuitabuja (Yone 14:17), udi tshieya tshia bupianyi buetu bua mu diulu. Paulo wakafundila bena Kilisto ba mu Efeso ne, “Nuenu kabidi panuakamana kunvua diyi dia bushuwa kudiye [kudi Kilisto Yesu], lumu luimpe lua lupandu luenu, panakamuitabuja kabidi, nuakangata tshimanyishilu tshia Nyuma Muimpe mulayibue, udi tshieya tshia bupianyi buetu, too ne ku kupikudibua kua bantu ba Nzambi muenabo, bua dianyisha dia butumbi buandi” (Efeso 1:13,14).

 Pakitabuja muntu Lumu Luimpe, udi mubatijibua mu mubidi umue, “Bualu bua mu Nyuma umue buonso buetu tuakabatijibua mu mubidi umue, ne tudi Bena Yuda anyi Bena Gelika, anyi bapika anyi badishikamine; bakatunuisha Nyuma umue” (1 Kolinto 12:13).

Tshibangidilu tshia Ekeleziya

  Tshibangidlu tshia Ekeleziya tshiakadi pakalua dituku dia Pentecoste, pakadi bapostolo ba Mukelenge basangishibue mu muaba umue mu Yelushalema, bindila dilua dia Nyuma Muimpe, bu muakabambila Mukelenge Yesu (Bienzedi nshapita 2).

 Nyuma Muimpe udi Mukuatshishi ne Muakuidi wa bantu ba Nzambi pa buloba (Yone 14:16,17). Mukelenge Yesu udi Mukuatshishi ne Muakuidi wabo mu diulu (Ebelu 9:24. 1 Yone 2:1).

 Paulo wakafundila Bena Kolinto ne, “Munkatshi mua bantu nganyi udi mumanye malu a muntu? Anu nyuma wa muntu udi munda muandi udi muamanye. Nunku kakuena mukuabo udi mumanye malu a Nzambi, anu Nyuma wa Nzambi udi muamanye. Kadi tuetu tuakangata nyuma, kengua pa buloba, kadi Nyuma wa kudi Nzambi, bua tuetu tumanye masanka akatupabo tshianana kudi Nzambi” (1 Kolinto 2:11,12).

“Malu adi disu kadiyi dianze kutangila, ne ditshu kadiyi dianze kunvua,
adi kayi manze kubuela mu mutshima wa muntu, malu onso
akalongoluela Nzambi badi bamunanga. Kadi Nzambi wakatubuluila
malu aa mu Nyuma Muimpe; bualu bua Nyuma udi
ukebakeba malu onso, too ne ku malu male a Nzambi”
(1 Kolinto 2: 9,10).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.