Dielangana dia Meji pa Lumu
Luimpe Lua Yone

No 2

“Diyi diakakudimuka muntu, diakuikala munkatshi muetu tshitupa, diakadi diule tente ne ngasa ne bulelela; tuakumona butumbi buende, buakadi bu bua muana umuepele udi mulela kudi Tatu wende. Mose wakatupa mikenji, kadi ngasa ne bulelela biakafuma kudi Yesu Kilisto” (Yone 1:14:17).

 Kunyima kua Nzambi, mu bukole ne ngasa, wakapandisha Bena Isalele ku bupika buabo mu Ejipitu, Yeye wakabapesha mikenji ku mukuna wa Sinai kudi Mose. Diyi dia Nzambi kudi Bena Isalele wakadi ne, “Nuenu nuakutangila malu anakenzela Bena Ejipitu, ne bu munakunutuala pa mapuapua a nyunyu wa mukanku, bu munakalua nuenu kundi meme. Binuatumikila diyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso; bualu bua buloba buonso mbuanyi … bantu bonso bakamba popamue ne, Netuenze meyi onso akutuambila Yehowa” (Ekesode 19:4,5,8).

 Nzambi wakamanya ne, Mu tshitupa tshipi Bena Isalele nebapange bua kuenza diyi dianyi dionso, nebankome nyima. (Tangila Ekesode 32:1-4). Yeye wakabapesha mikenji.

 Nansha muntu umue munkatshi muetu udi mumanye mua kulama mikenji yonso. Mikenji idi itupisha. Idi ituleja ne bubi budi mu mitshima yetu. Mukanda wa Nzambi udi wamba ne, “Bualu bua kakuena muntu wabingishibua ku mesu kuende bua kuenza kua mikenji. Bualu bua ku mikenji kudi kufuma dijingulula dia bubi” (Lomo 3:20). Kadi, “Mikenji yakalua ndeshi wetu wa kutufikisha kudi Kilisto, bua tuetu tubingishibue ku ditabuja” (Galatia 3:24). “Nzambi udi dinanga” (1 Yone 4:8). Udi musue kusankisha bantu bonso, kadi udi wa tshijila kabidi. Habakuka wakamanya bualu ebu pakafundileye ne, “Wewe udi ne mesu mapite buakane adi kaayi mua kutangila malu mabi, ne kuena mua kutangila bienzedi biabo bibi tshianana” (Habakuka 1:13).

Ngasa ne bulelela biakafuma kudi Yesu Kilisto

 Nzambi wakalaya Abalahama ne, “Bisamba bionso bia pa buloba nebisanke bualu bua kankanunuina kebe, bualu bua wewe wakatumikila diyi dianyi” (Genese 22:18). Paulo wakafunda mu mukanda wende kudi Bena Galatia ne, “Milayi yakalayidibua Abalahama ne kankanunuina kende; kayakalayidibua tunkanunuina tua bungi, kadi anu muntu umue, kankanunuina kebe, Kilisto mene” (Galatia 3:16).

Ngasa

 Tudi tuangata dikuatshisha mu dijingulula dia muaku “ngasa” ku mukanda wa Paulo kudi Tito. Tudi tubala bua “buimpe bua Nzambi, Musungidi wetu, ne dinanga diende kudi bantu bonso; kembua midimu ya mu buakane ituakuenza nkayetu, kadi bu mudi luse luende wakutusungila” (Tito 3:4,5). Paulo wakafundila Bena Efeso ne, “Bualu bua nudi basungidibue ku ngasa bua ditabuja; ne diodi kadiena difuma kunudi, ndipa dia Nzambi; kadiena difuma ku midimu bua muntu kaditumbishi” (Efeso 2:8,9).

 Yeshaya, mutangadiki munene wa mu matuku a Dipungila Dikulukulu, wakamanya disanka dia lupandu. Yeye wakafunda ne, “Nentambe kusanka mu Yehowa, mutshima wanyi neutambe kusanka mu Nzambi wanyi; bualu bua yeye wakanduatshisha bivualu bia lupandu, wakumbuikila ne tshikowelu tshia buakane” (Yeshaya 61:10). Katuena basungidibue ku buakane buetu.

 Tudi tukema patuela meji bua ngasa wa Mukelenge Yesu. “Yeye wakadi pa buloba, buloba buakafukibua kudiye, kadi ba pa buloba kabakamumanya. Wakalua kudi bintu biende, kadi bantu bende mene kabakamuitabuja. Yeye wakapa bonso bakamuitabuja bukole bua kuluabo bana ba Nzambi, bobo mene badi bitabuja dina diende” (Yone 1:10-12). Paulo wakafunda ne, “Nudi bamanye ngasa wa Mukelenge wetu Yesu Kilisto ne, Yeye wakadi mubanji, kadi wakalua mupele bua bualu buenu, bua nuenu nulue babanji ku bupele buende” (2 Kolinto 8:9).

Bulelela

  Yone wakafunda ne, “Ngasa ne bulelela biakafuma kudi Yesu Kilisto” (Yone 1:17). Yone udi musue muaku, “bulelela”. Muaku ewu udi musanganyibue bu misangu makumi anayi mu mifundu yende.

 Balombodi ba Bena Yuda, pakakuatabo Mukelenge, bakamufila mu bianza bia ngovena wa Bena Lomo, Pilato. Pilato wakakonka Mukelenge ne, “Apu wewe mukelenge, anyi? Yesu wakamba ne, Buudi wamba mbulelela, ndi Mukelenge. Nakuledibua bua bualu ebu, ne bua kuamba malu malelela. Muntu yonso wa bulelela udi unvua diyi dianyi. Pilato wakamukonka ne, Bulelela ntshinyi? Pakamukonkeye diyi edi, wakalupuka, wakaya kudi Bena Yuda, wakabambila ne, Tshiena mumusangane ne bualu” (Yone 18:37,38).

 Pilato kakamanya ne, Yeye wakadi kumpala kuende wakadi biende “njila ne bulelela ne muoyo” (Yone 14:6).

“Bu mudi bushuwa bua mu Yesu” (Efeso 4:21).

 Bu muakadi Mukelenge usamba bayidi bende, yeye mumanye ne diba didi dimana kufika bua kuteka muoyo wende panshi ku mutshi mutshiamakane, Toma wakamukonka ne, “Mukelenge, katuena bamanye kuwaya, tudi bamanye njila kudi kunyi? Yesu wakamuambila ne, Meme ndi bianyi njila ne bulelela ne muoyo; kakuena muntu udi ulua kudi Tatu, kayi muanze kulua kundi diambedi” (Yone 14:5,6).

 Dituku dikuabo, “Yesu wakambila Bena Yuda bakuitabuja diyi diende ne, Binuashala mu diyi dianyi, nudi bayidi banyi bulelela; nenumanye kabidi bualu bulelela, ne bualu bulelela nebunupe budishikaminyi” (Yone 8:31,32). Pakadi Yone mukulumpe, yeye wakafunda Gayo ne, “Nakasanka bikole pakalua bana betu banmanyisha bua bushuwa buebe, ne bu muudi wenda mu bushuwa. Tshiena ne disanka didi dipita edi bunene, bua meme kunvua ne, Bana banyi badi benda mu bushuwa” (3 Yone 1:3,4).

“Luse lujalame ne lulamatu lua bushuwa biakusangakanangana; buakane ne ditalala biakutuangana mishiku” (Musambu 85:10)

 Mvese ewu wa mu Dipungila Dikulukulu udi utangile kumpala, too ne ku dilua dia Mukelenge Yesu ne ku mudimu wende wa bupikudi pa mutshi mutshiamakane. Paulo wakafunda ne, “Diyi edi didi mua kueyemenyibua ndidi bonso bamanye mua kuitabuja ne, Kilisto Yesu wakaluila pa buloba bua kusungileye bantu babi, bandi kumpala kuabo ku bubi” (1 Timote 1:15). Mukelenge Yesu wakamba ne, Disanka didi ku mesu kua banjelo ba Nzambi bua muntu umue mubi wakukudimuna mutshima wende” (Luka 15:10).

 Nzambi udi umona muena kuitabuja bu “mu Kilisto”. “Nunku bikala muntu mu Kilisto, yeye udi mufukibue mupia-mupia; malu makulukulu akaya, monayi, akalua mapia-mapia” (2 Kolinto 5:17).

Ditalala ne Nzambi

 Muntu yonso udi witabuja Mukelenge Yesu bu Musungidi, udi mua kuamba ne, “Ndi ne ditalala ne Nzambi bua Mukelenge wetu Yesu Kilisto” (Romans 5:1). Mukelenge Yesu “mumane kuvuija ditalala ku mashi a ku mutshi wende mutshiamakane” (Kolosai 1:20). Ne mashi a mushinga mukole adi atulengesha “ku malu mabi onso” (1 Yone 1:7,9).

Ditalala dia Nzambi

  Muena Kilisto udi mua kuikala ne “ditalala dia Nzambi didi ditamba dijingulula dionso dia bantu” (Filipoi 4:7). Nzambi utshidi wambila ne, “Nakukunanga ne dinanga dia tshiendelele, nunku nakunanukila kukuleja luse lujalame” (Yelemiya 31:3). Netuambe tshinyi bua malu aa? Bikala Nzambi netu, nganyi udi mumanye mua kutupumbisha?” (Lomo 8:31). “Wewe udi ulama muntu udi ne mutshima wende mujalame bua yeye ikale ne ditalala dia tshishiki, bualu bua yeye udi ukueyemena” (Yeshaya 26:3).

Nzambi wa ditalala

Nzambi wa ditalala wakabisha mulami munene wa mikoko munkatshi mua bafue
kabidi ku mashi a dipungila dia tshiendelele, Mukelenge wetu Yesu mene,
anuvuije bakane tshishiki mu bualu buimpe buonso bua kuenza bu mu disua diende,
wenza munda muetu bualu budi buimpe ku mesu kuende bua Yesu Kilisto;
butumbi buikale kudiye ku bikondo ne bikondo.
Amen” (Ebelu 13:20,21).