Dielangana dia Meji pa Lumu
Luimpe lua Yone

No 1

“Yesu wakenza bimanyinu bikuabo bia bungi ku mesu kua bayidi, bidi kabiyi bifundibue mu mukanda ewu; kadi malu aa adi mafundibue bua nuenu nuitabuje ne, Yesu udi Kilisto, Muana wa Nzambi, ne bua nuenu nuikale ne muoyo mu dina diende, panuitabuja” (Yone 20:30,31).

 Mikanda ya kumpala inayi ya mu Dipungila Dipia-dipia idi yamba bualu bua Mukelenge Yesu mu mishindu mishilangane. Matayo udi ufunda bualu bua Yesu bu Mukelenge wa Bena Yuda, Mako udi umumona bu Muena Mudimu wa tshishiki. Luka udi ufunda bualu bua Yesu bu Muana wa muntu, kadi Yone udi ufunda bua bualu buende bu Muana wa Nzambi.

 Mu mvese ya kumpala mu Lumu Luimpe lua Yone, tudi tubala ne, “Ku tshibangidilu Diyi diakadiku, Diyi diakadi ne Nzambi, Diyi diakadi Nzambi. Diodio diakadi ne Nzambi ku tshibangidilu. Bintu bionso biakafukibua kudiye; kakuena tshintu tshiakafukibua kudi mukuabo, anu kudiye” (Yone 1:1-3). Mukelenge Yesu biende udi Diyi.

 Mu kulomba kua Yesu bua bantu bende kudi Tatu wende, Yeye wakamba ne, “Meyi awakumpa nakubapawu, bakuitabuja” (Yone 17:8). “Nakubamanyisha dina diebe, nembamanyishedi kabidi, bua dinanga diwakunnanga nadi meme kuikaladi munda muabo, ne meme munda muabo” (Yone 17:26). Tudi bamanye Tatu bualu bua tudi bamanye Mukelenge Yesu (Yone 14:8,9).

Mu mifundu ya Yone meyi asatu adi amueneka misangu ya bungi

Muoyo

 “Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele (Yone 3:16). “Munda muende muakadi muoyo ; muoyo awu wakadi munya wa bantu. Munya udi utema mu midima, kadi midima kayakautamba bukole” (Yone 1:4,5). Mukelenge Yesu wakamba ne, “Muibi uluila anu bua kuiba ne bua kushipa ne bua kubutula, meme nakuluila bua bantu bapete muoyo, baupete muvule” (Yone 10:10).

Munya

 Yone, wakenda ne Mukelenge Yesu pakadiye pa buloba, bakambilangana. Yone wakumvua diyi diende kudi bayidi bende bualu bua Nzambi, Tatu wende. Yeye wakafunda ne, “Edi ndiyi dituakumvua kudiye ne ditudi tunuambila ne, Nzambi udi munya ne munda muende kamuena midima nansha kakese” (1 Yone 1:5). Mukelenge Yesu wakamba ne, “Ndi munya wa ba pa buloba; wandonda kena wendakana mu midima, kadi neikale ne munya wa muoyo … nakulua pa buloba bu munya, bua yonso wangitabuja kashadi biende mu midima” (Yone 8:12. 12:46).

Dinanga

 “Nzambi udi dinanga … mu muanda ewu mudi dinanga, kembua tuetu tuakunanga Nzambi, kadi bua yeye wakatunanga, wakatuma Muana wende bu mulambu wa kubuikila nawu mibi yetu” (1 Yone 4:8,10). Mu kulomba kua Mukelenge Yesu bua bantu bende kudi Tatu wende, Mukelenge wakamba ne, “Nakubamanyisha dina diebe, nembamanyishedi kabidi, bua dinanga diwakunnanga nadi meme kuikaladi munda muabo, ne meme munda muabo” (Yone 17:26).

 Butuku buakufilabo Mukelenge mu bianza bia bantu babi bua kumushipa ku mutshi mutshiamakane, Yesu wakambila bayidi bende ne, “Nakunusua bu muakunsua Tatu, shalayi mu dinanga dianyi. Binuatumikila mikenji yanyi, nenushale mu dinanga dianyi, bu munakutumikila mikenji ya Tatu wanyi, ne mundi nshala mu dinanga diende. Nakunuambila malu aa bua disanka dianyi kuikaladi munda muenu, ne bua disanka dienu kukumbanadi” (Yone 15:9-11). Yesu mumane kusua bantu bende mene bakadi pa buloba, “wakabasua too ne kunshikidilu” (Yone 13:1). Kakuena dinanga bu dinanga dia Yesu.

 Yone kena utela dina diende mu Lumu Luimpe luende. Udi udibikila mu nshapita 13:23 ne, “Muyidi mukuabo, wakadi Yesu musue” (Tangila Yone 20:2. 21:7, 21:20).

Yone wakadi mumonyi wa kuenda ne bienzedi bia Mukelenge Yesu

 Yone udi umue wa bapostolo basatu (Petelo, Yakobo ne Yone) badi batedibua popamue bu bamonyi ba bukole bua Mukelenge bua kubisha bantu bafue. Bakadi ne Mukelenge pakabisheye muana mukaji wa Yailo (Luka 8:51-56). Bakadi nende ku Mukuna wa Kukudimuka (Matayo 17:1,2). Petelo wakafunda ne, “Tuetu tuakadi bamonyi ba butumbi buende ku mesu etu” (2 Petelo 1:16). Bakadi ne Mukelenge Yesu pakadiye unyingalala bikole be mu Getesemane (Mako 14:32-34).

 Yone wakadi mumonyi wa lufu lua Mukelenge Yesu. Yeye wakamona disalayi diakamutua difuma mu lubadi kunyima kua lufu luende. Yone wakafunda ne, “Dinga disalayi diakamutua difuma mu lubadi, mashi ne mayi biakapatuka. Wakatangila bualu abu nguakabuamba, diyi diende ndilelela, udi mumanye biende ne, Diyi dianyi didi dilelela bua nuenu kabidi nuitabuje” (Yone 19:34,35).

 Bumanyishi bua Yone ne bakuabo budi bua mushinga mukole mu Lumu Luimpe luende. Yone wakafunda ne, “Malu aa adi mafundibue bua nuenu nuitabuje ne, Yesu udi Kilisto, Muana wa Nzambi, ne bua nuenu nuikale ne muoyo mu dina diende, panuitabuja” (Yone 20:31).

Meyi a Mukelenge Yesu

 Meyi akambibua kudi Mukelenge Yesu akadi meyi a luse. (Luka 4:22). Dituku dikuabo, bakuidi banene ne Bafalese bakatuma tupalayi tuabo bua kukuata Mukelenge, kadi muntu kakamulenga bianza. Bobo bakakonka ne, “Munyi kanuakulua nende?” Tuakabakudimuna ne, “Kakuakadi muntu kale too ne katataka wakakula bu mudi muntu ewu wakula” (Yone 7:45,46).

 Meyi a Mukelenge Yesu adi meyi a muoyo. Mukelenge Yesu wakamba ne, “Bulelela, bulelela, ndi nuambila ne, Unvua diyi dianyi, witabuja wakuntuma, udi ne muoyo wa tshiendelele, kena ulua ku tshilumbu, wakumuka ku lufu, wakubuela mu muoyo” (Yone 5:24).

 Meyi a Mukelenge Yesu adi atupesha budishikaminyi. “Yesu wakambila Bena Yuda bakuitabuja diyi diende ne, Binuashala mu diyi dianyi, nudi bayidi banyi bulelela; nenumanye kabidi bualu bulelela, ne bualu bulelela nebunupe budishikaminyi” (Yone 8:31,32). Budishikaminyi ku bukole bua Satan. Budishikaminyi ku bukokeshi bua midima. Budishikaminyi ku buowa, budishikaminyi bua kuikala mu buloba ebu bua kusankisha yeye wakadifila bua bualu buetu. Mukelenge Yesu wakamba ne, “Bianupa Muana budishikaminyi, nenuikale badishikamine bulelela” (Yone 8:36).

 Meyi a Mukelenge adi nyuma ne muoyo, adi bia kudia bia mioyo yetu ya nyuma, bia kudia bia muntu-mupia-mupia mu Kilisto. Butudi nabu mbua kuikala ne bidia bia nyuma bua kudiunda mu malu a Nzambi. Mukelenge Yesu biende udi bidia bia muoyo, “bidia bia Nzambi mbiobio bidi bifuma mu diulu, bidi bipa ba pa buloba muoyo” (Yone 6:33).

 Meyi a Mukelenge Yesu adi meyi a dinanga. Yeye wakamba ne, “Ewu udi mukenji wanyi ne, Nusuangane bu munakunusua. Kakuena muntu udi ne dinanga didi ditambe edi, dia muntu udi ufuila balunda bende. Nenuikale balunda banyi binuenza bu mundi nuambila” (Yone 15:12- 14). Kakuena mulunda bu Mukelenge Yesu. Udi Mulunda “udi upita muanabo ne muntu kumulamata” (Nsumuinu 18:24).

Muena meji wakibaka nzubu wende pa dibue

 Mukelenge Yesu wakamba ne, “Muntu yonso udi mumvue meyi anyi aa ne utu waatumikila neikale bu muena meji, wakibaka nzubu wende pamutu pa dibue; nvula yakaloka, misulu yakuula, bipupu biakalua, biakakuma ku nzubu, kadi nzubu kakupuka bua yeye wakadi muibake pa dibue” (Matayo 7:24,25).

 Mupostolo Paulo wakafundila bena Kilisto ba mu Kolosai ne, “Nunku, bu munuakitabuja Kilisto Yesu Mukelenge, nuikale nuende mu Kilisto; nuikale ne miji yenu miedibue munda muende, nuikale nuashibue munda muende, ne nuikale nujadikibue mu ditabuja dienu, bu munuakayishibua; nukumbane mu disakidila” (Kolosai 2:6,7).