Ku Makasa a Yesu

Malia wa ku Betania udi umue wa bakaji ba butumbi batedibua mu Mukanda wa Nzambi bua lungenyi luabo mu malu a Nzambi ne bua bienzedi biabo bia dinanga bua Mukelenge Yesu. Misangu isatu tudi tumusangana ku makasa a Mukelenge Yesu.

1.   Malia wakashikama ku makasa a Mukelenge bua kuteleja diyi diende. (Luka 10:39).
2.   Tudi tumumona ku makasa a Yesu, pakadiye ne busambi bualu. (Yone 11:32).
3.   Malia wakadi ku makasa Mukelenge Yesu bu mutendeledi. (Yone 12:1-3).

Malia udi mushikame ku makasa a Yesu uteleja diyi diende

 “Pakadibo baya mu njila, Yesu wakafika ku musoko mukuabo; mukaji wakadimu, dina diende Mata, wakamubueja mu nzubu muende. Wakadi ne muakunyi wende mukaji dina diende Malia, yeye wakadi mushikame ku makasa a Mukelenge, uteleja diyi diende. Kadi Mata wakadi utata ne mudimu wa bungi wa mu nzubu; yeye wakalua kudi Yesu, wakamukonka ne, Mukelenge, kuena ubenga bua muakunyi wanyi anshile mudimu nkayanyi, anyi? Umuambile alue kunkuatshisha. Mukelenge wakamuandamuna ne, Mata, Mata, wewe udi utamba kuela meji a malu a bungi adi akutatshisha; tudi anu ne tshintu tshimue bualu; Malia wakusungula luseke ludi luimpe, kabena bamanye mua kumunyengalu”. (Luka 10:38,42).
 Malia wakadi mushikame ku makasa a Yesu bu muyidi bua kuteleja meyi ende. Dituku dikuabo Mukelenge Yesu wakambila bayidi bende bakuabo ne, “Meyi anakunuambila adi nyuma ne muoyo … Ndi munya wa ba pa buloba; wandonda kena wendakana mu midima, kadi neikale ne munya wa muoyo”. (Yone 6: 63. 8:12). Ku makasa a Yesu kudi muaba wa kudipuekesha, muaba muimpe bua muyidi bua kuyila malu a Nzambi.
 Mata wakajiana, wakaditatshisha ne mudimu wa bungi bua kuakadila Mukelenge Yesu kadi Malia wakadi uteleja Yesu ku makasa ende, Mukelenge wakamuambila ne, “Mata, Mata … Malia wakusungula luseke ludi luimpe, kabena bamanye mua kumunyengalu”.

Malia udi ne busambi bualu

 Dituku dikuabo disama dikole diakakuata Lazalo, muanabo wa Mata ne Malia. Bakatumina Mukelenge diyi ne, “Mukelenge, uudi musue udi usama”. (Yone 11:3). Pakafikeye ku Betania, Lazalo wakadi mufue. Malia, pakamumoneye, wakaponena ku makasa ende, wakamuambila ne, “Mukelenge, bu wewe muikale kunoko, muanetu kakadi kufua”. (Yone 11:32). Mukelenge wakakonka ne, “Nuakumujika kudi kunyi? Bakamuambila ne, Mukelenge, lua umone. Yesu wakashikunka. Bena Yuda bakamba ne, Tangilayi muakumusueye”. (Yone 11:34-36).
 Dituku adi Mukelenge Yesu wakaleja Malia, Mata ne Bena Yuda bukole buende bua kupita lufu bukole. Ku lukita lua Lazalo Mukelenge wakela diyi diende bikole ne, “Lazalo lupuka. Wakadi mufue wakalupuka”. (Yone 11:43,44).
 Palua malu makole mu meku etu, Mukelenge Yesu, Muakuidi wetu munene ne Musambi wetu, udi pabuipi mene bua kutukuatshisha ne kutusamba. Udi mu diulu muine, “bua kumuenekeye mpindiewu kumpala kua Nzambi bua bualu buetu”. (Ebelu 9:24). Udi mumanye mua kutukuatshisha mu tshikondo tshia dikengela dietu. (Ebelu 4:16).

Malia udi wela mananashi ku makasa a Mukelenge

 “Yesu wakalua ku Betania, kuakadi Lazalo wakabisheye ku lufu … bakamulambishila bidia bia butuku; Mata wakadi ubakuatshisha, kadi Lazalo wakadi mukuabo wa bakadi bashikame nende ku mesa. Malia wakangata tshitupa tshia kilogama tshia mananashi a mushinga mutambe bukole, menza ne nado mulelela, wakamuela mananshi ku makasa a Yesu, wakaakupula ne nsuki yende, nzubu wakadi muule tente ne mupuya wa mananashi”. (Yone 12:1-3). Musangu ewu bakalambishila Mukelenge Yesu bidia bia butuku mu nzubu wa Simona muena nsudi. (Matayo 26:6-13).
 Musoko mukese wa Betania wakadi muaba wa dinanga, ditalala, ne wa kukankamika bua Mukelenge Yesu mu tshikondo tshia bupidia bua Bena Yuda bua kumuitabuja. Ku Betania kuakadi bobo bakamunanga. Yelushalema wakadi pepi mene mene, kadi balombodi ba bantu ne bakuabo ba mu musoko wakadi ukebakeba kumushipa.

Bualu bua Mata

 Mata kakadi usanka pakadi Malia mushikame ku makasa a Yesu uteleja diyi diende. Yeye wakasua Mukelenge bua kutuma Malia bua kumukuatshisha mu nzubu. (Luke 10:40). Katataka, mu nzubu wa Simona, yeye udi wenzela Mukelenge mudimu muimpe. Mukelenge Yesu udi mumanye mapanga etu, kadi udi mumanye mitshima ya bantu bende badi bamunanga kabidi. “Yesu wakasua Mata, ne muanabo wa bakaji, ne Lazalo. Tuetu tudi ne dinanga, bualu bua yeye wakadianjila kutunanga”. (Yone 11:5. 1 Yone 4:19).

Mukelenge udi wambila bayidi bende bua lufu luende

 Mukelenge wakamana kuambila bayidi bende bualu bua lukuna lua bantu ne bua lufu luende ku bianza biabo mu Yelushalema (Matayo 20:17-19), kadi bidi bimueneka ne buonso buabo kabajingulula bualu ebu. Musangu mukuabo anu Malia wa ku Betania wakajingulula malu aa. Yeye wakalua ku bidia bia dilolo ne mulondo wa alabasta, mu mulonda muakadi mananashi a mushinga mutambe bukole bua kumuela pambidi pende. Mukelenge wakambila bakuabo bakadi nende ne tshiji ne, “Mulekelayi, nuitabuje ne, Yeye wakadi mualame too ne dianjikabo”. (Tangila Yone 12:4-7).

Malia udi ku makasa a Mukelenge Yesu bu mutendeledi

 Tuakumana kumona Malia ku makasa a Yesu bua kunvua diyi diende. (Luka 10:39). Katataka Malia udi ku makasa a Yesu bu mutendeledi. Yeye wakamuela mananshi ku makasa ende, bualu buakadi bulengele, tshienzedi tshiende tshiakafuma ku mutshima muuje tente ne dinanga bua Musungidi wende. Matayo udi wamba ne, Malia wakela mananshi pa mutu pende, Yone udi anu utela kuela kua mananashi ku makasa a Mukelenge. “Nzubu wakadi muule tente ne mupuya wa mananashi”. Mupuya wa mananashi wakadi tshintu tshiakadi tshitua dipembu dimpe kudi Mukelenge ne kudi Nzambi. Wakabambila bua ditendelela dia mutshima muuje tente ne dinanga bua Musungidi wende. Mukelenge wakamba ne, “Bulelela, ndi nuambila ne, Mu miaba yonso a ya pa buloba buonso yambabo lumu elu luimpe, nebambe kabidi bualu buakenza mukaji ewu, buikale tshivulukidi tshiende”. (Tangila Matayo 26:6-13).
 Mukanda wa Nzambi udi wamba ne, “Kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku”. (Ebelu 13:16).

Pamutu pa malu aa onso,
tupeshe Yeye wakadifila bua bualu buetu,
Mukelenge wetu Yesu Kilsto,
mitshima yetu, dinanga dietu ne ditumbisha dietu.
Mukelenge utshidi wamba ne
“Muananyi, umpe mutshima webe”.
(Nsumuinu 23:26).