Lumu Luimpe ludi Lufuma
ku Buloba bua Kule

"Bu mudi mayi matalala kudi muntu mupungile bua nyota, mbu mudi lumu luimpe ludi lufuma ku buloba bua kule". (Nsumuinu 25:25).

Balami ba mikoko badi bangata lumu luimpe ku buloba bua kule - ku Diulu

 Mu luseke alu (luseke lua Beteleheme) muakadi balami ba mikoko, balala mu mpata, balama mikoko yabo mu butuku. Muanjelo wa Mukelenge wakimana pabuipi nabo, butumbi bua Mukelenge buakabatemena; bakatamba kutshina. Muanjelo wakabambila ne, Kanutshinyi, bualu bua nakunuluila ne lumu luimpe lua disanka dinene, nedikale kudi bantu bonso; lelu bakanulelela Musungidi mu musoko wa Davidi, yeye udi Kilisto Mukelenge. Etshi ntshimanyinu kunudi ne, Nenusangane muana mujingila tshilulu, mulale mu tshidilu tshia nyama. Tshisumbu tshia masalayi a mu diulu tshiakadisangisha lukasa ne muanjelo, batumbisha Nzambi, bamba ne, Butumbi buikale kudi Nzambi mu diulu, ditalala dikale panshi pa buloba munkatshi mua bantu badi basankisha Nzambi. Banjelo bakabashiya, bakaya mu diulu; balami ba mikoko bakambilangana ne, Tuyayi ku Beteleheme tukatangile bualu ebu buakulua buakutumanyisha Mukelenge. Bakalua lukasa, bakasangana Malia ne Yosefe, ne muana mulale mu tshidilu tshia nyama. Pakamonabo bualu ebu, bakasokolola diyi diakambilabo bua muana ewu. Bantu bonso bakumvua malu akabambilabo kudi balami bakakema. Kadi Malia wakalama meyi aa onso, wakadi wela meji munda munda. Balami bakapingana, batumbisha Nzambi bamutendelela, bualu bua malu onso akumvuabo ne akamonabo, bu muakabambilabo. (Luka 2:8-20).

 Kakuena lumu ludi lutamba Lumu Luimpe lua Nzambi, "bualu bua Muana wende Mulume, wakaledibua bu mudi buntu buende kudi tunkanunuina tua Davidi". (Lomo 1:3). Mukelenge Yesu wakalua bua kukumbaja diyi dia Nzambi kudi Satana, kunyima kua yeye wakadinga Eve mu budimi wa Edene ne, "Nenteke lukuna pankatshi pebe ne mukaji, ne pankatshi pa bana bebe ne bana bende, muana wa mukaji neakukume ku mutu kuebe, ne wewe neumusume ku tshikankanyi tshiende". (Genese 3:15). Musangu mukuabo Satana, muena lukuna wa Nzambi ne wa bantu, wakela meji ne, Nakapita dijinga dia Nzambi bua kuikala ne bantu, mudimu wa bianza biende, bua disanka diende bukole. Yeye wakapanga! Nzambi wakamuambila ne, "Muana wa mukaji neakukume ku mutu kuebe".

 Muprofete wa kale, Yeshaya, wakafunda ne, "Mukelenge muine neanupe tshimanyinu: Monayi! Mukaji utshidi kamama neimite difu, nealele muana wa balume, neamuidike dina ne, Imanuele". (Yeshaya 7:14). Kukudimuna kua muaku Imanuele kudi ne, Nzambi-udi-netu. Nzambi wakasungulu Malia, wa mu tshisamba tshia Yuda ne wa mulongo wa mukelenge Davidi bua kuikala mamu wa Yesu.

 Muprofete Mika wakamba bua muaba wa kuledibua kua muana ne, "Kadi wewe, Beteleheme Efelata, udi mukese munkatshi mua biota bia Yuda, mukuabo nealupuke munda muebe bua bualu buanyi, bua kuikala mukokeshi wa Bena Isalele; tshibangidilu tshiende tshidi tshia kale kale, tshia ku ntuadishila mene". (Mika 5:2).

Malia udi utumbisha Nzambi

 Malia, pakamanye ne yeye wakadi musungudibua bua kuikala mamu wa Mukelenge wetu, wakatumbisha Nzambi wakamba ne, "Muoyo wanyi udi utumbisha Mukelenge, mutshima wanyi wakutamba kusanka mu Nzambi, Musungidi wanyi. Yeye wakatangila bupuekele bua mukaji mupika wende; milongo yonso ya bantu too ne tshiendelele neimbikile ne, Udi ne disanka, bualu bua udi ne bukole wakungenzela malu manene; dina diende ndia tshijila". (Luka 1:46-49).

 Pakalua tshikondo pepi ne kuledibua kua Mukelenge Yesu, Malia ne Yosefe bakadi bashikama mu Nazaleta. Bua kushikija Diyi dia Nzambi, Nzambi wakenzeja mukelenge wa Bena Lomo, Kaisa Augusto, bua kuela mukenji kudi ba pa buloba bonso bakadi muinshi mua bukokeshi buende ne, "Bantu bonso bakaya bua kufundishabo mena abo, muntu kuabo, muntu kuabo". (Luka 2:3). Nunku Yosefe, muena Beteleheme, ne wa mu nzubu wa Davidi bu Malia, wakaya ku musoko wa kuledibua kuende. Pakadibo aku, matuku akakumbana bua Malia kuleleye. Nansha diyi dimue dia Nzambi nedipange, yeye neakumbaje meyi ende onso adi mafunda mu Mukanda wa Nzambi.

Kawakadi muaba mu nzubu wa wa tshilala benyi bua Yosefe ne Malia

 Balami ba mikoko bakasangana muana Yesu mulale mu tshidilu tshia nyama. Nansha Bena Yuda bakadi ne bumanyishi bua baprofete babo mu Dipungila Dikulukulu, pakalua Mukelenge Yesu kudibo, kabakamuitabuja. "Yeye wakadi pa buloba, buloba buaka-fukibua kudiye, kadi ba pa buloba kabakamumanya. Wakalua kudi bintu biende, kadi bantu bende mene kabakamuitabuja". (Yone 1:10-12). Pakumvua mukelenge Helode lumu lua kuledibua kuende, yeye wakakeba kumushipa. Kadi bantu banya-banya bakadi bindila kulua kuende. Mulume mukuabo, dina diende Shimeona, pakamoneye Mukelenge Yesu mu ntempelo ne mamu wende ne Yosefe, "wakamuambula mu maboko, wakatumbisha Nzambi, wakamba ne, Mukelenge, mpindiewu wewe udi ulekela mupika webe aye biende talala bu muwakuamba; bualu bua mesu anyi akumona lupandu luebe luwakulongolola ku mesu kua bantu bonso; munya wamueneka kudi bisamba bia bende ne butumbi bua Isalele, bantu bebe". (Luka 2:28-32).

 Ana, mukaji mununu be, "wakalua pa diba adi, wakasakidila Nzambi, wakambila bonso bakadi batekemene bupikudi mu Yelushalema bualu buende". (Luka 2:38). Petelo waka-funda ne, "Kilisto wakafua musangu umue bua malu mabi, muntu muakane wakafuila bantu babi, bua kulua netu kudi Nzambi". (1 Petelo 3:18). Mukelenge Yesu, ku lufu luende, wakavuija tshianana "udi ne bukole bua lufu, ndiabola mene; ne bua yeye apikule bonso aba bakadi bakuatshibue mu bupika matuku onso a muoyo wabo bua ditshina diabo dia lufu". (Ebelu 2:14,15). "Muana wa mukaji" wakakuma ku mutu kua Satana. Mukelenge Yesu wakapita Satana bukole kashidi.

 Tudi tuela Nzambi ne, Tuasakidila, bua mukenji wa muanjelo kudi balami ba mikoko ne, "Nakunuluila ne lumu luimpe lua disanka dinene, nedikale kudi bantu bonso". Lumu Luimpe ludi lumu luimpe lua disanka dinene, disanka pa buloba kadi disanka mu diulu kabidi. Mukelenge Yesu wakamba ne, "Disanka didi ku mesu kua banjelo ba Nzambi bualu bua muntu umue mubi wakukudimuna mutshima wende". (Luka 15:10).

 Lupetu lua dilua dia Mukelenge wetu Yesu Kilisto bua kuikala Musungidi wetu ludi disanka dinene bua bobo badi bamuitabuja. Muprofete wa kale, Habakuka, wakamanya disanka dia lupandu. Yeye wakafunda ne,

Bikala mutshi wa mfigi kauyi usampila ntonga,
bikalaku kakuyi tumuma ku mionshi ya mvinyo;
biapanga mutshi wa olive kukuama,
biapanga madimi kulua bia kudia;
bikala mikoko ya mu lupangu kayiyiku,
ne bikalaku kakuyi bimuna mu mpangu yabi;
kadi meme panyi nensanke mu Yehowa,
nentumbile mu Nzambi wa lupandu luanyi
(Habakuka 3:17,18).