Ditemolatemola dia asi wedja

Jashua 23:3. Jeremiya 2:11,27.

Naka shu ndjela aui wa mikanda ene uku ewo l'onongo, ndu tovesa tawo, shu tayuyala la luha la nimbitela aui amotshi.

Lam'akenyi umvutshi Jashua ati, nshi yami yambusukana ya ndjela washemi (aya usumbi), ndi akatshumanya dihangamendi dia wedja w'asi Isariyele dia mbalaka dia vo ntetemala mamema Latuyalaka Unyashungu l'okongo andi. Aui amotshi weyasu uma l'alaku ako ane, shati: "Tanyosohanaki la asi wedja wambutshikala l'atei anyu. Tanyudimulaki nkumbu ya ditemolatemola diawo, kuyanga ditshiba. tanyuditemolaki, tanyudisambelaki." Naka tayenda lu Jashua 24:11 shu tayena wedja eku watandi wakadingi asi Isariyele.

Okone shu mbalaka lu Bible shati: l'okongo wa nshi ya Jashua ewandji ndu elombedi w'asi Isariyele wakanganyia wudja one wakasonola Unyashungu, la vo wakatate ntemola dikishi. Efula kawo kundjela alaku aku wakawayelaka ntundu, keli wakanyangia utema wa Unyashungu. Jeremiya 1:16. Vo kumbuho uku akawalwela Unyashungu ta diawo l'asi wedja wakalangi mbashimba mbuka l'usui wa shenga. Ana w'Unyashungu kambi weli wuhu one nshi nye. Vo wambuhe elolo andi le su lam'atundutukimanyiaka lu nshi ya pa. laso kateket'andi lu unyo wa Jeremiya ati: "Undi wudja omotshi weko wakengonya ditemolatemola diawo, kuyanga dio kema ditemolatemola dia mete? Keli wudja ami wambengonya lutumbu lawo l'engo kaheyi mbakimanyia."

Asika Kristu efula wambufana la asi Isariyele ya nshi sho, ne dia hatuyeli daku dia umvutshi Jashua. Efula kasu teko lu TASOHANA ndu TADIMULA, ndu TATEMOLA ditemolatemola dia asi wedja. Asi wedja wa nshi nye weli antu tshe wahatetawo Khumadiondjo Jesu Kristu. Keli kuyanga shu kema la ditemolatemola uku dikishi, shu teko la dio lu wuhu wenasu lu Ngalatiya 5:19. "Etsha wa dimba watenamaka vo ene; munanyi, akambu wa sonyi, saki y'akambu wa kolo, otemwelo wa dikishi, doka, lutunu, utshanu, kandjema, kele, diatanelu, lundju, tamu, okomiya, edjwelu ka wanu, engenongeno wa kolo, la akambu wa wuhu uku."

Lam'esu lu ntsha wuhu w'akambu ane keti shu tambengonya lukumbu lasu la wuki, lone letawo vati, Asika Kristu, l'akambu w'anyanya waheyi ntukimanyia. ne dia lam'ayututsha luseka, lam'ayutuhetsha antu, lam'ayutuyala la mbatana l'atei asu, lukumbu la Jesu ayuyala la dionyo l'atei awo ndu vo wayuteta lukumbu lukina, vati: Ambidjoki, amunanyi, la antenganyi; uku yaka akambu aku wakatatshiki.

Okone lu nshi ya pa kana lu lushi l'ekumelu, Shesu leli l'ulungu ayutumbula ati: Lend'eli ditemolatemola dianyu diakanyayatshela lu etina ka pa? Ongenyi ami weli lu mbala dikendji ne li; kana dikoho dia wanu, kana somboki, kana uvi; wehu ene wa ditemolatemola haduiteya ntushimbela; paka mbekama mete le Khumadiondjo Jesu Kristu.

Keli untu tshe, kana umbetawudi kana untu lahatetawo, tuseki wehu ene tshe wa kolo, tetawo Khumadiondjo Jesu Kristu, tumamemi paka le ndi, ne dia ndi keli Unyashungu wa mete ndu wa lumu, ndu Khum'ekanga ka pundju. Jeremiya 10:10.

Otshudi Pen’Elonge