Dielangana dia Meji pa Lumu
Luimpe lua Yone

No 21

Lazalo, Mulunda wa Yesu, udi mufue

Muntu wakadiku, wakadi usama, dina diandi Lazalo wa mu Betania, musoko wa Malia ne muanabo Mata. Awu Malia wakela Mukelenge mananashi, wakamukupula makasa andi ne nsuki, muanabo Lazalo nguakadi usama. Bana babo ba bakashi bakatumina Yesu diyi ne, Mukelenge, uudi musue udi usama. Pakunvua Yesu diyi edi, wakamba ne, Edi kadiena disama dia lufu, kadi didi bualu bua butumbi bua Nzambi ne bua Muana wa Nzambi kutumbishibueye (Yone 11:1-4).

Betania: Musoko Muimpe ne muaba wa ditalala
 Betania wakadi musoko mukese, bu kilomètres isatu ku esete wa Yelushalema. Kunyima kua kubanga kua mudimu wa Yesu munkatshi mua bantu ne Lumu Luimpe, katuena tubala mu Mukanda wa Nzambi ne Yesu wakalala mu Yelushalema. Yelushalema wakadi musoko wende, musoko wa Mukelenge Munene, kadi ba mu Yelushalema bakamupidia. Tudi tusanka be bua kumanya ne bakuabo bakamunanga. Pakadiye mu Betania Yesu ne bayidi bende, bakadi munkatshi mua balunda.

Yesu wakasua Mata, ne muanabo wa bakashi, ne Lazalo
 Yesu wakasua Mata, ne muanabo wa bakashi, ne Lazalo. Pakunvueye bualu bua disama diandi, wakashikama kuakadiye matuku abidi. Pashishe wakambila bayidi bandi ne, Tuyayi mu Yudaya kabidi. Bayidi bakamuambila ne, Labi, Bena Yuda bakadi bakeba kukukuma mabue anu katataka, wewe uyayaku kabidi, anyi ? (Yone 11:5-8).
 Dinanga dia Mukelege Yesu bua bantu bende didi dinene, didi dinanga diakane tshishiki, kadiena ne kansungasunga!
 Mukelenge Yesu wakadi mua kuondapa Lazalo ku diyi dia bukole buende kayi ne bualu bua kuya ku Betania, bu muakenzeye ne muena mudimu was kapitene ka masalayi (Matayo 8:13), kadi yeye wakamanya bualu buakakuata balunda bandi mu Betania buakadi bua butumbi bua Nzambi, wakindila kuakadiye matuku abidi, pashishe wakaya.
 Njila ya Mukelenge wetu idi njila yakane tshishiki. Nzambi udi unvua milombu ya bantu bandi, kadi misangu mikuabo yeye kena wandamuna ku milombu yetu lukasa. “Monayi, tudi tuidika bantu bakadikankamika ne, Badi ne disanka; nuakumvua lumu lua kudikankamika kua Yobo, nuakutangila bu muakamuenzela Mukelenge kunshikidilu, ne bu mudi Mukelenge muule tente ne luse ne dinanga” (Yakobo 5:11). “Disengelela dia muntu muakane didi ne bukole bua bungi mu kuenza kuadi” (Yakobo 5:16).

Ditabuja dia Mata
 Pakunvua Mata ne, Yesu ulualua, wakaya kumuakidila; kadi Malia wakashala mushikame mu nzubu. Mata wakambila Yesu ne, Mukelenge, bu wewe muikale kunoko, muanetu kakadi kufua. Ne katataka mene ndi mumanye ne, Tshionso tshiwalomba Nzambi, Nzambi neakupetshi. Yesu wakamuambila ne, Muanenu neabike kabidi. Mata wakamuambila ne, Ndi mumanye ne, Yeye neabike dituku dia kunshikidilu diabika bantu bonso kabidi. Yesu wakamuambila ne, Meme ndi bianyi dibisha, ndi bianyi muoyo: udi ungitabusha, nasha biafueye, neikale ne muoyo kabidi; muntu yonso udi ne muoyo, udi ungitabuja, kena ufua tshiendelele (Yone 11:20-26).
 Lufu lua muntu udi ne Yesu bu Musungidi wende kaluena lufu lua tshiendelele nansha, udi “ne Kilisto ... bualu ebu budi butamba buimpe” (Filipoi 1:23).

Malia udi ulua kudi Yesu
 Pakalua Malia kudi Yesu, pakamumoneye, wakaponena ku makasa andi, wakamuambila ne, Mukelenge, bu wewe muikale kunoko, muanetu kakadi kufua (Yone 11:32 ).
 Tudi tusangana Malia ku makasa a Yesu misangu isatu. Musangu wa kumpala yeye wakadi mu nzubu wa Mata, “mushikame ku makasa a Yesu, utelesha diyi diandi” (Luka 10:38). Pakadi Lazalo mufue, Malia wakadi ku makasa andi bua busambi buende, pashishe, mu Yone nshapita 12, tudi tumumona ku makasa a Yesu bu mutendeledi.

Yesu udi ushikunka
 Yesu wakashikunka. Bena Yuda bakamba ne, Tangilayi muakumusueye. Kadi bakuabo bakamba ne, Muntu ewu wakatabaja mesu a wakadi mufofo, kakamanya mua kusungila muntu ewu, kafu biende, munyi ? (Yone 11:35-37).
 Yesu, Muana wa Nzambi, munkatshi mua bantu mu buntu buende, wakashikunka pakamoneye Malia ne Bena Yuda bakadi nandi udila. Yesu wakanyingalala nabo. Bena Yuda ba bungi bakadi balue bua kubasamba Mata ne Malia bua muanabo (Yone 11:19).
 Dituku dikuabo, Pakafika Yesu pabuipi pa Yelushalema, pakawumoneye, wakadila bualu buawu (Luka 19:41). Yesu wakanyingalala bualu bua bupidia bua bena musoko, wakamanya ne bantu nebalue muinshi mua tshiji tshia Nzambi bua bualu ebu.

Lazalo udi mu lukita matuku anayi
 Yesu wakalua ku lukita ... luakadi lua lubuebue, dibue diakadi dibuikilaku. Yesu wakamba ne, Umushayi dibue. Kadi Mata, muanabo ne mufue wakamuambila ne, Mukelenge, yeye ukadi ununka katataka, ukadimu matuku anayi. Yesu wakamukonka ne, Tshiakukuambila ne, Biwitabuja, neumone butumbi bua Nzambi, anyi ? Bakumusha dibue. Yesu wakabandisha mesu mulu, wakamba ne, Tatu, ndi nkusakidila bua wewe wakunvua diyi dianyi. Nakumanya ne, Wewe udi unvua meyi anyi matuku onso; kadi nakuamba diyi edi bualu bua bantu badi bimane banyunguluke bitabuje ne, Wewe udi muntume. Pakambeye nunku, wakela diyi diandi bikole ne, Lazalo, lupuka (Yone 11:38-43).
 Dibikidibua dia Lazalo munkatshi mua bafue diakadi tshimanyinu kudi Bena Yuda ne, Yesu wakadi mutumibue kudi Nzambi bua kushikisheye diyi dia baprofete ba mu matuku a Dipungila Dikulukulu. Wakadi tshimanyinu kudi bantu bualu bua Bunzambi bua Yesu, ne tshimanyinu ne bumanyishi buende buakadi bulelela.

Mukelenge Yesu udi uleja bukole buende pa mutu pa lufu
 Wakadi mufue wakalupuka, munyengela bilulu ku bianza ne ku makasa. Ku mpala kuandi kuakadi kunyengela tshitambala. Yesu wakabambila ne, Numujingulule, aye biende. Bena Yuda ba bungi, bakadi balue kudi Malia, bakamuitabuja, pakamonabo bualu buakenzeye. Kadi bakuabo bakaya kudi Bafalese, bakabambila malu akenza Yesu. (Yone 11;44-46 ).
 Mukelenge Yesu wakamba ne, “Bulelela, bulelela, ndi nuambila ne, Unvua diyi dianyi, witabuja wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo. Bulelela, bulelela ndi nuambila ne, Diba nedilue, didiku katataka mene, diunvua bafue diyi dia Muana wa Nzambi; badi bunvua nebikale ne muoyo” (Yone 5:24,25).

“Tuasakidila kudi Nzambi, udi utupa kutamba kua lufu
bualu bua Mukelenge Yesu Kilisto”
(1 Kolinto 15:57).