Dielangana dia Meji pa Lumu
Luimpe lua Yone

No 20

Yesu udi Mulami Muimpe

Mukelenge Yesu wakamba ne, “Bulelela, bulelela, ndi nuambila ne, Udi kayi ubuelela ku mbelu wa lupangu lua mikoko, udi ubandila kukuabo, yeye udi muibi ne munyengi: kadi wabuelela ku mbelu udi mulami wa mikoko. Mulami wa ku mbelu udi umunzuluila; mikoko idi yunvua diyi diende; udi ubikila mikoko yandi ku mena ayi, udi upatuka wilombola. Pashikisheye kumusha yandi yonso, udi uya ku mpala kuayi, mikoko idi imulonda, bualu bua idi mimanye diyi diandi” (Yone 10:1-4).
 Misangu ya bungi Mukelenge Yesu wakayisha bantu mu nsumuinu. Yeye wakamba bualu bua mukoko mujimine ne bua disanka dia mulami pakamoneye mukoko wende (Luka 15:4,5). Dituku dikuabo pakatangila Yesu bisumbu bia bantu, “wakadi nabo luse, bualu bua bobo bakadi batata, bakadi bamuangalaka bu mikoko idi kayi ne mulami”. (Matayo 9:36). Mukelenge wakadi mulue bua kusangisha bantu bende bakamuitabuja mu lupangu lua mikoko, mu muaba muimpe ne wa ditalala. Bakuabo munkatshi mua balombodi ba Bena Isalele, nangananga mu Yelushalema, bakadi belangana meji ne tudi bantu ba Nzambi ne bayishi ba diyi diende, kadi bakapidia Mulami wa Isalele wa bushuwa. Bakadi balami ba tshianana, bakadi bu balami ba Bena Isalele mu matuku a muprofete Yezekele, Yezekele wakamba bua bualu buabo ne, “badi badidisha ... kanuakadisha mikoko” (Tangila Yezekele 34:1-6).
 Mu mvese 1-15 Mukelenge udi wamba bua lupangu lua mikoko ya Bena Isalele. (Mu mvese 16 udi wamba bualu bua mikoko mikuabo idi kayi ya mu lupangu elu).
 Tudi tujingulula ne, Mulami wa ku mbelu udi Nyuma Muimpe wa Nzambi. Mukelenge Yesu wakadi Mulami wa Isalele wa bushuwa. Yeye wakalua kudibo bu muakamba baprofete babo ba kale.

Mikoko yende idi yunvua diyi diende
 Mulami Muimpe udi ubikila mikoko yende ku mena ayi. Idi ya mushinga mukole kudiye. “Yesu wakabambila kabidi ne, Bulelela, bulelela, ndi nuambila ne, Meme ndi mushiku wa mbelu wa mikoko. Bonso bakalua ku mpala kuanyi badi bivi ne banyengi; kadi mikoko kayakunvua diyi diabo. Meme ndi mushiku wa mbelu; wabuela kundi, neasungidibue, neabuele, neapatuke, neapete mashinde” (Yone 10:7-9).
 Mikoko ya Mukelenge idi mua kushikama talalaa kayiyi ne ntata. Udi uyilombola mu madimi adi malengele. Udi uladika mikoko yende mu mitoloka ya mashinde, mu muaba wa ditalala (Tangila Musambu 23:2). Yesu wakamba ne, “Nakuluila bua bantu bapete muoyo, bawupete muvule” (Yone 10:10).

Mulami muimpe udi ufuila mikoko
 Yesu wakabambila kabidi ne, “Ndi mulami muimpe wa mikoko; mulami muimpe udi ufuila mikoko. Muena mudimu wa difutu, kayi mulami wa mikoko mene, kayi muena mikoko, pamoneye nkashama ulua, udi ushiya mikoko, udi unyema, nkashama udi wikuata, udi witangadisha; yeye udi unyema bualu bua yeye udi muena mudimu wa difutu, mikoko kayena bu bualu kudiye. Ndi mulami muimpe wa mikoko; ndi mumanye yanyi, yanyi idi minmanye, bu mudi Tatu munmanye, meme kabidi ndi mumanye Tatu: ndi nfuila mikoko” (Yone 10:11-15).
 Mulami Muimpe, mu dinanga diende bua mikoko wende, wakayifuila.
 Mukelenge Yesu, pakakengeye pa mutshi mutshiamakane, wakela meji bualu bua mukoko mukuabo mujimine, munyengi wakadi mulembeleja pa mutshi mutshiamakane nende, mufidibua ku lufu bua malu mabi ende. Muntu ewu wakakudimuna mutshima wende. Wakambila munyengi mukuabo wakadi upenda Yesu ne, “Wewe kuena utshina Nzambi, anyi ? Wewe udi mu dipila diodimue. Bakukosa tshilumbu tshietu bimpe; tuetu tudi tuangata difutu bu mutuakuenza, kadi muntu ewu kena muenze bualu bubi. Yeye wakamba ne, Yesu, pawabuela mu bukelenge buebe, unvuluke. Yesu wakamuambila ne, Bulelela, ndi nkuambila ne, Lelu wewe newikale nanyi mu Paladiso” (Luka 23:40-43).
 Munyengi wakadi pepi ne lufu kadi wakapeta muoyo wa tshiendele pakitabujeye Yesu. Ditabuja dia mukoko wakadi mujimine, diakasamba mutshima wa Mukelenge wetu mu makenga ende dinene be ! “Disanka didi ku mesu kua banjelo ba Nzambi bualu bua muntu umue mubi wakukudimuna mutshima wende” (Luka 15:10).

Mikoko mikuabo idi kayi ya mu lupangu lua Bena Isalele
 Ndi ne mikoko mikuabo idi kayi ya mu lupangu elu; bundi nabu mbua kulua nayi, neyunvue diyi dianyi; neyilue tshisumbu tshimue, ne mulami umue (Yone 10:16).
 Mikoko mitedibue mu mvese 1-15 idi ituambila bua Bena Isalele, kadi Mukelenge wakamba ne, Ndi ne mikoko mikuabo idi kayi ya mu lupangu elu, buena kuamba ne, Mukelenge Yesu wakadi bantu bakuabo, kabayi ba Bena Isalele. Lumu Luimpe ludi bua bisamba bionso, bua buloba bujima (Yone 3:16). Dituku dikuabo mukaji wa ku Suko wakambila bena musoko ne, “Luayi numone muntu wakungambila malu onso anakenzenza; nyeye Kilisto, anyi ? Bakambila mukaji ne, “Tuakuitabuja katataka, kambualu bua diyi diebe, tuakudiumvuila, tudi bamanye ne, Bulelela, ewu udi Musungidi wa ba pa buloba” (Yone 4:29,42). Kunyima kua dibika dia Yesu ku lufu, yeye wakambila bayidi bende ne, “Yayi bienu, nuvuije ba bisamba bionso bayidi” (Matayo 28:19).
 Ekeleziya wa Nzambi udi tshisumbu tshimue, anyi mubidi umue wa Bena Kilisto ku dituku dia Pentekoste too ne katataka (Bienzedi nshap. 2), nansha bikalabo Bena Yuda anyi bantu ba bisamba bikuabo. Muntu yonso udi witabuja Yesu, Muana wa Nzambi, bu Musungidi ne Mukelenge, udi tshitupa tshia Ekeleziya wa Nzambi (Tangila 1 Kolinto 12:13).

Yesu udi wambila bakuabo ne, Kanuena ba mikoko yanyi
 Bena Yuda bakakonka Mukelenge Yesu ne, “Wewe neutushiye ne mioyo yetu kulu-kulu musangu buule munyi ? Biwikala Kilisto, utuambile patoke. Yesu wakabakudimuna ne, Nakunuambila, kadi kanuena nuitabuja; malu antshidi ngenza mu dina dia Tatu wanyi adi angamba. Kadi nuenu kanuena nuitabuja, bualu bua kanuena ba mu mikoko yanyi” (Yone 10:24-26).
 Mubadi wanyi munanga Mukelenge Yesu udi Mulami webe, anyi ? Dina diebe didi difunda mu mukanda wa muoyo, anyi ? Mulami Muimpe udi wamba ne, “Tshiena ngipata walua kundi” (Yone 6:37).

Mukelenge Yesu wakamba ne,
“Mikoko yanyi idi yunvua diyi dianyi,
ndi muimanye, idi indonda;
ndi nyipa muoyo wa tshiendelele;
kayena ifua tshiendelele, kakuena
mukuabo udi winyenga mu
tshianza tshianyi” (Yone 10:27,28).