33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Dielangana dia Meji pa Lumu
Luimpe lua Yone

No 17

Yesu udi wamba bualu bua Nyuma Muimpe

Pakalua dituku dia kunshikidilu dia disanka, [Disanka dia Bitandatanda] diakadi dituku dinene, Yesu wakimana, wakela diyi diandi bikole ne, Bikala muntu ne nyota, alue kundi, anue. Misulu ya mayi a muoyo neyipatuke munda mua wangitabusha, bu muakamba Mukanda wa Nzambi. Yeye wakadi wamba bua Nyuma wangatabo kudi bakumuitabuja; Nyuma kakadi muanze kulua, bua Yesu kakanza kutumbishibua (Yone 7:37-39).

Yesu wakamba ne, “Bikala muntu ne nyota, alue kundi”

 Mukelenge Yesu udi ushikisha nyota mu mioyo ya bantu. Mukelenge Davidi wakenza bimpe pakambeye ne, “Nzambi, wewe udi Nzambi wanyi; ndi nkukeba bikole; muoyo wanyi udi ne nyota bualu buebe; mubidi wanyi udi upanga mu dikujinga diawu, mu buloba bume ne budi bukama, budi kabuyi mayi” (Musambu 63:1). Bantu bonso badi ne Nzambi bualu! Mu dinanga diende dinene Yeye wakatuma Mukelenge Yesu bua kuikala Musungidi wetu. Nzambi wamba bualu bua Bena Isalele ne, “Diulu, ukeme biebe bikole bua bualu ebu ... bualu bua bantu banyi bakuenza malu mabi abidi: bakundekela meme, mushimi wa mayi a muoyo, bakudiumbuila mena a mayi, mena mamane kupuka mene adi kaayi mua kulama mayi” (Yelemiya 2:13). Katuikadi bu bantu aba ba kale!

 Mukelenge Yesu wakambila mukaji wa mu Samalea pakaya kusuna mayi ne, “Wanua mayi aa neikale ne nyota kabidi, kadi wanua mayi anamupa kena wikala ne nyota kabidi tshiendelele” (Yone 4;13,14).

Bualu bua Nyuma Muimpe

 Mukelenge Yesu wakambila Nikodemo, wakadi Mufalese ne mulopo wa Bena Yuda ne, “Bulelela, bulelela, ndi kuambila ne, Bikala muntu kayi muledibue kudi mayi ne kudi Nyuma, yeye kena mumanye mua kubuela mu bukelenge bua Nzambi” (Yone 3:5). Mayi mu mvese ewu udi wamba bua Diyi dia Nzambi, kaena wamba bua dibatiza! (1 Petelo 1:23).

 Kunyima kua dilua dia Nyuma Muimpe pakalua dituku dia Pentekoste, Nyuma Muimpe udi ne muena kuitabuja (Bienzedi nshap. 2). Mukelenge Yesu wakasamba bayidi bandi diambedi yeye kayi muanze kuya ku mutshi mutshiamakane ne lufu, wakabambila ne, “Nendombe Tatu, yeye neanupe Musambi mukuabo, ikale nenu tshiendelele” (Yone 14:16).

 Miaku “Musambi” mu Lumu Luimpe lua Yone ne “Muakuidi” mu 1 Yone 2:1 idi muomumue mu Buena Gelika. Idi yamba bua “muntu udi wimana pabuipi bua kukuatshisha mukuabo.”

 Kunyima kua dibandishibua dia Mukelenge Yesu mu diulu, Nyuma Muimpe wakapueka bua kuikala munda mua bantu bende kashidi. Paulo wakafundila Timote bualu bua “dikuatshisha dia Nyuma Muimpe udi muikale munda muetu” (2 Timote 1:14). Nyuma Muimpe udi Mukuatshishi wetu ne Muakuidi wetu panshi pa buloba. Mukelenge Yesu udi Mukuatshishi wetu mu diulu ne Muakuidi wetu kudi Tatu (Ebelu 9:24. 1 Yone 2:1). Nyuma Muimpe udi Nyuma wa bulelela (Yone 14:17). Nyuma Muimpe udi Nyuma wa bukole (Lomo 15:13). Nyuma Muimpe udi Nyuma wa dinanga (Lomo 15:30).

Katunyingalaji Nyuma Muimpe

 Mukanda wa Nzambi udi wamba ne, “Kanunyingalaji Nyuma Muimpe wa Nzambi, nuakapebua tshimanyishilu kudiye munda muenu tshidiku too ne palua dituku dia bupikudi” (Efeso 4:30).

Ditapuluka munkatshi mua bantu bua bualu bua Yesu

Bantu bakuabo, pakunvuabo meyi aa, bakamba ne, Bulelela, yeye udi muprofete awu wa Nzambi. Bakuabo bakamba ne, Yeye udi Kilisto. Kadi bakuabo bakakonka ne, Apu Kilisto udi ufuma mu Galela, anyi? Mukanda wa Nzambi kawena wamba ne, Kilisto neikale kankanunuina ka Davidi, neafume ku Beteleheme, kuakadi Davidi, anyi?Ditapuluka diakadiku munkatshi mua bantu bua bualu buende. Bakuabo bakasua kumukuata, kadi muntu kakamulenga tshianza (Yone 7:40-44).

 Bena Yuda bakadi batekemena dilua dia muprofete munene bu Mose, Nzambi waka-muambila ne, “Meme nembabishile muprofete munkatshi mua bana babo bu wewe; meme nenteke meyi anyi onso mukana muandi, ne yeye neabambile meyi onso anamuambila. Muntu yonso udi upidia kunvua meyi anyi adiye wamba mu dina dianyi, meme nenkose tshilumbu tshiandi” (Dutelonome 18:18). Bu tshisamba tshia bantu, Bena Yuda kabakadi bamanye mua kujingulula ne Yesu wakadi Muprofete mubalayibue bualu bua bukole bua mitshima yabo.

 Muaku ne, Kilisto, udi wamba bua “muntu muedibue manyi”. Dituku dikuabo, Yone ... [Mubatiji] wakatangila Yesu talala, pakadiye wenda, wakamba ne, Tangilayi, Muana wa mukoko wa Nzambi!” (Yone 1:35). Andele, muanabo wa Simona Petelo, wakumvua diyi diakakambeye, wakasangana ne Petelo, wakamuambila ne, “Tuakumona Mashiya, (kuku-dimuna kua muaku ne Kilisto). Wakalua nandi kudi Yesu” (Yone 1:41,42).

Bakuidi banene ne Bafalese badi batuma tupalayi tuabo bua kukuata Yesu

Tupalayi tuakapingana kudi bakuidi banene ne Bafalese; bobo bakabakonka ne, Munyi kanuakulua nandi? Tupalayi tuakabakudimuna ne, Kakuakadi muntu kale too ne katataka wakakula bu mudi muntu ewu wakula. Bafalese bakabandamuna ne, Nuenu kabidi, bakanupambuisha, anyi? Bantu betu banene anyi Bafalese bakumuitabusha, anyi? Bantu ba tshisumbu etshi badi kabayi bamanye mikenshi ya Nzambi badi bedibua mulawu. Nikodemo, muntu wakalua kudiye diambedi, umue wabo wa Bafalese, wakabambila ne, Mukenshi wetu udi ukosa tshilumbu tshia muntu diambedi kabayi banze kunvua diyi diandi, kabayi banze kumanya bualu buakuenzeye, anyi? Bakamukonka ne, Wewe kabidi udi muena Galela, anyi? Ujingulule, umanye ne, Muprofete katu wafuma ku Galela. (Yone 7:45-52).

 Bakuidi banene ne Bafalese bakadi ne tshiji pakapinga tupalayi tuabo kabayi ne Yesu. Bualu bua bupidia buabo ne bukole bua mitshima yabo, mulombolodibua kudi Satana, bakadi ne Yesu lukuna. Kadi Mufalese mukuabo wakudiku, muntu munene ne wa butumbi mu Isalele, Nikodemo, muntu wakalua kudi Yesu butuku (Yone 3,2). Yeye wakadi mumanyibua bu “Muyishi wa Isalele” (Yone 3:10). Nikodemo wakamba ne, “Mukenji wetu udi ukosa tshilumbu tshia muntu diambedi kabayi banze kunvua diyi diende, kabayi banze kumanya bualu buakuenzeye, anyi? Bakamukonka ne, Wewe kabidi udi muena Galela, anyi? (Yone 7:51,52). Bakadi ne tshiji!

 Nikodemo wakaleja ne yeye wakadi mulondi wa Yesu pakakuatshisheye Yosefe wa ku Alimatayo bua kujika Yesu kunyima kua lufu lua Mukelenge wetu pa mutshi mutshia-makane. Yosefe wakadi muyidi wa Yesu mu musokoko bualu bua wakatshina Bena Yuda, yeye, bu Nikodemo, wakadi mulumbuludi mu Isalele (Yone 19:38,39. Luka 23:50,51).

Mukelenge Yesu wakamba ne,
“Nyuma ngudi upa muoyo, mubidi kawena wenza bualu;
meyi anakunuambila adi nyuma ne muoyo”
(Yone 6:63)

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.