Dielangana dia Meji pa Lumu
Luimpe lua Yone

No 16

Disanku dia Bisambusambu

Yesu udi uya ku Disanka

 Pakashika malu aa, Yesu wakadi wendakana mu Galela; kakadi wendakana mu Yudaya, bualu bua Bena Yuda bakadi bakeba mua kumushipa. Disanka dia Bena Yuda, Disanka dia Bisambusambu, diakadi pa buipi. Bana babo ba difu dimue bakamuambila ne, Umuka kunoko, ya mu Yudaya bua bayidi bebe kabidi bamone malu a kukema audi wenza. Kakuena muntu udi wenza bualu mu busokoko biasueye kumanyibua kudi bantu. Biwenza malu aa, udimueneshe kudi ba pa buloba. Bualu bua bana babo ba difu dimue kabakamuitabusha. Yesu wakabambila ne, Diba dianyi kadiena dianze kufika, kadi diba dienu didiku matuku onso. Ba pa buloba kabena bamanye mua kuikala nenu lukuna; kadi badi nanyi lukuna, bualu bua ndi mbamba ne, Malu adibo benza nmabi (Yone 7:1-7).

Balombodi ba Bena Yuda badi bakeba kushipa Yesu

 Tudi tubala tshitupa etshi tshia mu Mukanda wa Nzambi ne kanyinganyinga ka bungi. Mukelenge wetu wakenzela bantu anu malu mimpe, wakalua kudibo kudi Nzambi ne lumu luimpe lua lupandu ne bienzedi bia luse. Mu Yone nshapita 7 tudi tubala bu Bena Yuda bakadi bamukeba kumushipa ne bu bana babo ba Yesu mene kabakamuitabuja. Bantu bakuabo bakamba ne, “Udi ne demon munda” (Mvese 20).

Disanka dia Bisambusambu

 Mose wakambila Bena Isalele ne, “Balume bonso nebamueneke ku mesu kua Yehowa, Nzambi wenu, misangu isatu ku tshidimu ku tshidimu mu muaba udiye usungula: ku disanka dia mampa adi kaayi ne luevene, ne ku disanka dia mbingu ayi muanda mutekete, ne ku disanka dia bitandatanda; kabamueneki ku mesu kua Yehowa ne bianza bitupu; kadi muntu yonso neafile bintu bidiye nabi bu muakanuvudishila Yehowa, Nzambi wenu, disanka” (Dutelonome 16:16,17).

 Bualu bua Disanka dia Bisambusambu [Disanka dia Bitandatanda], tudi tubala mu Ekesode ne, “Nenudie ... bidia bia disanka kabidi kunshikidilu kua tshidimu panuashikija kusangisha bintu bionso bia mu madimi” (Ekesode 23:16). Bantu bakadisangisha mu Yelushalema pakajika tshikondo tshia kunowa. Nzambi wakasua kusankisha bantu ne kusanka nabo. Bantu bakalua bua kufila mulambu wa disakidila kudi Nzambi. Mufundi wa Musambu No. 100 wakafunda ne, “Buelayi bienu mu bibuelelu biandi ne disakidila, buelayi mu biendedi biandi ne misambu ya kumutumbisha nayi. Numusakidile, nuvudishile dina diandi disanka” (Musambu 100:4).

 Pakadi Yesu pa buloba, balombodi ba ntempelo wa mu Yelushalema bakamupidia. Disanka dia Batandatanda diakadi dibikidibua ne, “Disanka dia Bena Yuda” kudi Yone!

Bana babo ne Yesu kabena bamuitabuja

 Bana babo ne Yesu kabakamuitabuja. Bakamba ne, “Biasueye kumanyibua kudi bantu ... udimueneshe kudi ba pa buloba”. Ku tshikondo atshi kabakitabuja Yesu. Kadi kunyima kua dibandishibua dia Mukelenge mu Diulu, pakadi bantu bandi bindila dilua dia Nyuma Muimpe mu nzubu wa mulu mu Yelushalema, “buonso buabo bakadi ne mitshima muomumue, bakananukila kutendelela Nzambi, ne bakaji, ne Malia mamu wa Yesu, ne bana babo ne Yesu” (Bienzedi 1:14). Bidi bimueneka ne, Yosefe wakadi ne Nzambi: dina diandi kadiena ditetibua ! Yesu wakafila mamuende Malia mu bianza bia Yone pakadiye pa mutshi mutshiamakane, pa diba adi mene Yone wakaya nende ku nzubu kuende (Yone 19:13,26,27).

Yesu udi umuka mu Galela, udi uya ku Disanka dia Bisambusambu

 Pankatshi pa matuku a disanka, Yesu wakalua mu ntempelo, wakayisha bantu. Bena Yuda bakakema ne, Muntu ewu udi mumanye mikanda, kayi muanze kuiyila, munyi ? Yesu wakabakudimuna diyi ne, Diyisha dianyi kandianyi, ndia udi muntume. Bitabusha muntu kuenza bu mudi Nzambi musue, yeye neamanye diyisha edi, ne ndia Nzambi, anyi ndi ndiambila nkayanyi. Wadiambila udi ukeba butumbi buandi; kadi wakeba butumbi bua wakumutuma udi biandi muntu mulelela, kena ne bualu bubi munda (Yone 7:14-18).

 Mukelenge Yesu wakadi mulue kudi Nzambi, bimanyinu biende ne bienzedi biende biakaleja bantu ne Yeye wakadi Kilisto wa Nzambi, kadi, bu mu matuku etu mene, Satana wakadi ufofomisha mesu a meji a badi kabayi bitabuja “bua dinkenka dia lumu luimpe lua butumbi bua Kilisto, udi tshifuanyikiji tshia Nzambi, kaditemi kudibo” (2 Kolinto 4:4).

Kanuena bamanye mua kulua kungikala

 Yesu wakamba ne, Nengikale nenu tshitupa tshipi, pashishe nenye kudi wakuntuma. Nenunkebe, kanuena nunmona; kanuena bamanye mua kulua kungikala. Bena Yuda bakakonkangana ne, Muntu ewu neaye kudi kunyi kutudi katuyi bamanye mua kumumona? Neaye kudi bena tshimuangi munkatshi mua Bena Gelika, neayishe Bena Gelika, anyi? (Yone 7:33-35).

 Bena Yuda kabakajingulula meyi a Mukelenge bualu bua bukole bua mitshima yabo. Pakapidiabo Yesu, bakapidia Nzambi. Mukelenge wakabambila ne, “Kanuena bamanye mua kulua kungikala”. Kadi kudi bayidi bandi bakamuitabuja yeye wakamba ne, “Mitshima yenu kayizakadi; nuitabuje Nzambi, nungitabuje meme kabidi. Mu nzubu wa Tatu wanyi mudi miaba ya bungi ya kuikala ... nenye kunulongoluela muaba. Binaya ne binanulongoluela muaba, nempingane kabidi, nenuangate kundi meme muine, bua kundi ngikala, nuenu nenuikaleku kabidi” (Yone 14:1-3).

 Tudi tuela meji bua muadi wa bantu mu Mukanda wa Yelemiya ne, “Tshidimu tshia kunowa tshiakupita, tshidimu tshia munya mukole tshiakushika, ne tuetu katuena basungidibue” (Yelemiya 8:20).

 Mukanda wa Nzambi udi wamba bua tunkenene tukuabo tutshidi mu buloba bua Isalele (fourmis moissonneuses). Mukelenge Solomo wakafunda ne, “Wewe, muntu mufuba, ya kudi kankenene; welangane meji mudiku kaya mu njila yaku, wikale ne meji. Koko, kakayi ne mukelenge, mutangidi, anyi mukokeshi, katu kadilongoluela bidia biaku mu tshikondo tshia munya mukole; katu kaditekela bia kudia biaku mu tshikondo tshia kunowa” (Nsumuinu 6:6-8). Tunkenene tudi tutamba bukese panshi pa buloba kadi tudi ne meji ya bungi, tudi tubuta bia kudia biatu (maminu a blé anyi maminu a mushindu mukuabo) mu tshikondo tshia munya (Nsumuinu 30:25).

 Tuetu tuakitabuja Mukelenge Yesu bu Musungidi ne Mfumu mu matuku a kunowa tudi tusanka. Pakapita tshikondo tshia ngasa wa Nzambi, diambedi dituku dikole dia tshiji tshia Nzambi kadiyi dianze kulua, Bena Ekeleziya nebikale ne Musungidi wabo, “Yesu mene, udi utupandisha ku tshishi tshilualua” (1 Tesalonike 1:10. 5:9).

“Bualu bua wakalama diyi dia kutantamana
kuanyi, nenkulame kabidi ku diba dia kuteta,
diodio didi diamba kulua kudi ba pa buloba bonso
bua kuteta badi bikala pa buloba”
(Buakabuluibua 3:10).