Dielangana dia Meji pa Lumu
Luimpe lua Yone

No 15

Yesu udi Bidia bia Muoyo

“Nudi nukeba tshinyi?” (Yone 1:38)

 Pakatshiabu, kunyima kua kudisha kua bantu binunu bitanu. Bantu bakasangana Yesu dishiya dia dishiba dia Galela, “bakamukonka ne, Labi, wakulua kunoko diba penyi? Yesu wakabandamuna ne, Bulelela, bulelela, ndi nuambila ne, Kanuena nunkeba bua bimanyinu binuakutangila, nudi nunkebela bua nuakudia mitanda, nuakuukuta” (Yone 6:25,26).

 Mukelenge Yesu wakebeja bayidi babidi ba Yone Mubatiji bakadi bamulonda ne, “Nudi nukeba tshinyi?” (1 Yone 1:38). Didi dikonka dinene, munda muadi mudi mupatuka mishimi yonso ya muoyo (Tangila Nsumuinu 4:23). Bayidi babidi ba Yone, bakadi bakeba kumanye malu makuabo bualu bua Yesu, bakalua balondi bandi. Mukelenge Yesu wakamanye ne, Ba bungi mu tshisumbu tshiakamukeba, bakamukeba bua yeye wakabadisha ne mitanda ne minyinyi ya mu mayi.

Bantu badi bakeba tshimanyinu kudi Yesu

 Bantu bakakonka Yesu ne, “Udi wenza tshimanyinu kayi bua tuetu tumone, tuitabuje Diyi diebe? Tshiudi wenza ntshinyi? Bankambua betu bakadia mana mu tshipela, bu muakafundabo ne, Yeye wakabapa bidia bia mu diulu. Yesu wakabambila ne, Bulelela, bulelela, ndi nuambila ne, Mose kakanupa bidia bia mu diulu, Tatu wanyi udi unupa bidia bilelela bia mu diulu. Bua bidia bia Nzambi mbiobio bidi bifuma mu diulu, bidi bipa ba pa buloba muoyo” (Yone 6:30-33).

 Pakondapa Yesu basame babo, bantu kabakamulomba tshimanyinu. Pakadisha Yesu bantu bakadi ne nzala ne mitanda ya bidia ne minyinyi ya mu mayi, bakamba ne, “Bulelela, ewu udi muprofete ulualua pa buloba” (Yone 6:14). Katataka badi basue tshimanyinu bua kujadika Yesu wakadi mufume kudi Nzambi, bu muakabambileye. Mitshima yabo yakadi mikole. Kabakadi ne ditabuja. Bena Yuda bakamujiana, bualu bua yeye wakamba ne, “Ndi bianyi bidia biakafuma mu diulu” (Yone 6:41).

Yesu udi Bidia bia Nzambi

 Bidia bia Nzambi bidi Yesu nkayandi. “Bua bidia bia Nzambi mbiobio bidi bifuma mu diulu, bidi bipa ba pa buloba muoyo” (Yone 6:33).

 Pakaya Yosefe ne Malia ku ntempelo mu Yelushalema pakadi Yesu muana mukese, muntu wakadiku, dina diandi Shimeona, “Muntu ewu wakadi muakane, wakadi kabidi mutumikidi wa meyi, wakadi utekemena disamba dia Isalele; Nyuma Muimpe wakadi nandi”. Pakatangileye Yesu, Shimeona wakamuambula mu maboko, wakatumbisha Nzambi, wakamba ne, “Mukelenge, mpindiewu wewe udi ulekela mupika webe aye talala bu muwakuamba; bualu bua mesu anyi akumona lupandu luebe” (Tangila Luka 2:25-32).

 Yesu nkayende udi lupandu luetu! Muanjelo wakambila Yosefe ne, “Umuidike ne, YESU, bualu bua yeye neasungile bantu bandi ku mibi yabo” (Matayo 1:21).

Yesu udi Bidia bia Muoyo

 Yesu udi bidia bia muoyo (Yone 6:35). “Munda muandi muakadi muoyo; muoyo awu wakadi munya wa bantu” (Yone 1:4).

 Bua kuikala ne muoyo, mibidi yetu idi ne bia kudia bualu. Tudi ne Diyi dia Nzambi bualu bua kudisha makengela a nyuma etu - nos besoins spirituels. Nzambi udi Mufuki wa kueyemenyibua, udi utupesha bidia bietu bia buatshia-buatshia kadi, bu bena kuitabuja, butudi nabu mbua kudisha pa Bidia bia Muoyo bua kudiunda mu malu a nyuma. Mukanda wa Nzambi udi mukumbane bua makengela etu onso ya nyuma, bua bobo badi bena kuitabuja bapia-bapia ne bua bantu bakadi mu njila wa ditabuja muntantshi mule.

Yesu udi Bidia bidi ne Muoyo

 Yesu udi Mupi wa muoyo. Muntu udi muledibua tshiakabidi kudi Diyi dia muoyo, “Nuakaledibua tshiakabidi, kenku bintu bijimina, kadi kudi bintu bidi kabiyi bijimina, ku Diyi dia Nzambi udi ne muoyo ne udiku tshiendelele” (1 Petelo 1:23). Muena kuitabuja udi ne muoyo mupia-mupia mu Kilisto, lufu kaluena mua lulenga muoyo ewu. Paulo wakafunda ne, “Nunku bikala muntu mu Kilisto, yeye udi mufukibue mupia-mupia; malu makulukulu akaya, monayi, akalua mapia-mapia” (2 Kolinto 5:17).

Yesu udi bidia bilelela bifuma mu diulu

 “Mu munga muntu yonso kamuena lupandu, bualu bua kakuena dinga dina muinshi mua diulu, dipa bantu, didi dimanye mua kutusungila” (Bienzedi 4:12). Satana udi udinga bantu, badi bela meji ne, Njila ya bungi idiku bua kupeta muoyo wa tshiendelele ne muaba mu diulu. Tudi tuimane pa Diyi dia Nzambi didi ne muoyo ne pa meyi a Mukelenge Yesu, wakamba ne, “Meme ndi bianyi njila ne bulelela ne muoyo; kakuena muntu udi ulua kudi Tatu, kayi muanze kulua kundi diambedi” (Yone 14:6).

Meyi a Mukelenge Yesu adi nyuma ne muoyo

 Mukelenge Yesu wakamba ne, “Ndi bianyi bidia bidi ne muoyo biakafuma mu diulu; biadia muntu bidia ebi, neikale ne muoyo wa tshiendelele; bulelela, bidia binafila ku muoyo wa ba pa buloba nmubidi wanyi. Bua diyi edi Bena Yuda bakelangana mpata ne, Muntu udi mumanye mua kutupa mubidi wandi, tudie munyi? Nunku Yesu wakabambila ne, Bulelela, bulelela, ndi nuambila ne, Binuikala kanuyi nudia mubidi wa Muana wa muntu, binuikala kanuyi nunua mashi ende, kanuena ne muoyo munda muenu. Udi udia mubidi wanyi, udi unua mashi anyi, udi ne muoyo wa tshiendelele, nemubishe dituku dia kunshikidilu” (Yone 6:51-54).

 Bayidi bandi ba bungi pakunvuabo diyi edi, bakamba ne, “Diyi edi didi dikole, udi mumanye mua kuditabuja nganyi? Pakamanya Yesu munda ne, Bayidi banyi badi bajiana bua diyi edi, wakabakonka ne, Bualu ebu budi bunulenduisha, anyi? Apu binuatangila Muana wa muntu ubanda kuakadiye diambedi? Nyuma ngudi upa muoyo, mubidi kamuena muenza bualu; meyi anakanuambila adi nyuma ne muoyo” (Yone 6:60-63).

Meyi a Mukelenge Yesu adi nyuma ne muoyo

 Buakadi bu Mukelenge wakadi ubambila ne, Bua kupeta muoyo wa tshiendelele, nudi nabu mbua kungitabuja meme mene mene. Meyi ende akadi bu tshimanyinu, anyi langage figurative. (Tshilejelu: Muprofete wa kale, Yelemiya wakamba ne, “Nakasangana meyi ebe, nakaadia; meyi ebe akadi kundi bu disanka ne akasankisha mutshima wanyi” (Yelemiya 15:16). Yelemiya wakadi meyi a Nzambi mu mutshima wende mene mene.

 Bakuabo badi bayisha ne, Butudi nabu mbua kuangata bidia ne lupanza bia Mukelenge bua kuikala ne muoyo wa tshiendelele, anyi bu mushindu bua kupeta luse - ke nanku to! Bidia bia Mukelenge ne lupanza bidi bimanyinu bia lufu luende bua kumuvuluka.

“Muntu kikadi biandi ne muoyo bualu bua bidia nkayabi,
ikale biandi nawu bualu bua meyi onso
adi alupuka mukana wa Nzambi”
(Matayo 4:4).