Dielangana dia Meji pa Lumu
Luimpe lua Yone

No 14

Yesu udi Wenda Pamutu pa Mayi

Ditabuja dia Bayidi ba Mukelenge Ditetibua

 “Pakamanya Yesu ne, Badi bamba kunkuata ku bukole bua kumbueja mu bukelenge, wakaya ku mukuna kabidi, yeye nkayende. Pakabuela diba, bayidi bandi bakapueka ku dishiba; bakabuela mu buatu, bakadi baya dishiya ku Kapenuma. Butuku buakila, Yesu kakanza kulua kudibo. Mayi akadi ajuka mavuala bualu bua tshipepele tshikole tshiakadi tshipepa. Pakitabo buatu ntanta bu ya kilometa inayi anyi itanu, bakatangila Yesu wenda pamutu pa mayi, ulua pepi ne buatu; bakatshina. Kadi yeye wakabambila ne, Mmeme, kanutshinyi. Nunku bakitabuja bua kumubueja mu buatu; buatu buakafika lukasa ku mpata kuakadibo baya” (Yone 6:15-21).

 Kakuena ne mpata ne bayidi bakatshina bualu bua tshipupu, bakadi mu muaba wa njiwu. Kukita kuakadi bualu bukole. Musangu mukuabo bakela meji ne, Biakadi Yesu netu katuakadi ne bualu. Kabakamanye ne, “Yesu wakabamona batata ne kuita” (Mako 6:48).

 Pakalua Yesu pabuipi nabo, wenda pa mutu pa mayi bobo kabakamumanye, “bakatshina, bakamba ne, Mukishi; buowa buakabakuata, bakapandalala. Kadi Yesu wakabambila ne, Nukoleshe mitshima yenu; nmeme, kanutshinyi” (Matayo 14:26,27). Pabakamubueja mu buatu, tshipepele tshiakabatama (Matayo 14:32), “Lupepele ne mayi a dishiba bidi bimunvuila” (Matayo 8:27).

Mukelenge wakitabuja tshipepele tshikole kukuata bayidi bende

 Yobo wakamba ne, “Yeye udi mumanye njila undi ngendela; ne pamaneye kunteta, nempatuke bu tshiamu tshia or” (Yobo 23:10). Yobo udi tshimanyinu tshia muntu wa ditantamana dia mu makenga ne tshia lutulu. Yakobo wakafunda ne, “Monayi, tudi tuidika bantu bakadikankamika ne, Badi ne disanka; nuakumvua lumu lua kudikankamika kua Yobo, nuakutangila bu muakamuenzela Mukelenge kunshikidilu, ne bu mudi Mukelenge muule tente ne luse ne dinanga” (Yabobo 5:11). Mukanda wa Nzambi udi utuambila ne, “Yehowa wakasankisha Yobo mu matuku andi a kunshikidilu ne disanka dipite diakadiye nadi mu matuku a ku tshibangidilu” (Yobo 42:12).

 Diteta dia ditabuja dietu didi bua disanka dietu ne bua tuetu tuikale “bu tshitekelu tshiteka bua buneme, tshia tshijila, tshikumbane mudimu wa Mukelenge, tshilongolola bua mudimu muimpe wonso” (2 Timote 2:21).

Palua malu makole mu meku etu

 “Yehowa udi muimpe, udi tshinyemenu mu dituku dia ntatu, udi mumanye bantu badi banyemena kudiye” (Nahuma 1:7).

 “Udi mua kutupandulula ku dinanga dia Kilisto nganyi? Ntatu idi mua kuenza nunku, anyi kanyinganyinga, anyi tshinyangu, anyi tshiole, anyi butaka, anyi njiwu, anyi muele wa mvita? Nansha; mu malu aa onso tudi tutamba kupita bualu bua bukole bua Yesu wakatunanga. Bualu bua ndi ngitabushishibua ne, Kakuena lufu, kakuena muoyo, kakuena banjelo, kakuena bakokeshi, kakuena malu atshidiku, kakuena malu atshilualua, kakuena makelenge, kakuena bule, kakuena ndondo, kakuena tshintu tshionso tshikuabo tshifukibua tshidi ne bukole bua kutupandulula ku dinanga dia Nzambi didi mu Kilisto Yesu Mukelenge wetu” (Lomo 8:35,37-39).

Patuikale ne pampakana pa mutshima, tangila kudi Yesu

 Dituku dikuabo kuakadi muntu kuetu kakadi mua kulala tulu butuku, wakadi ne bujitu bunene be pamutu pende bua malu makole akamukuata. Pakalua lunkelu, yeye wakumvua diyoyo mu rue, wakatangila ku dididishi, wakatangila mukaji wakadi udisha mishamisha (les moineaux). Pashishe yeye wakela meji bua meyi a Mukelenge Yesu ne, “Kabatu bapana mishamisha ibidi ku dituku dikese, anyi? Mushamusha umue kawena upona panshi, anu pitabuja Tatu wenu. Nsuki ya ku mitu yenu mene mene idi mibala yonso. Nunku kanutshinyi, mushinga wenu udi mutambe wa mishamisha ya bungi” (Matayo 10:29-31). Muntu ewu wakapingana ku bulalu buende, katataka kayi ne ditata, wakalala tulu lukasa, tulu tuende tuakadi tuimpe. Mukanda wa Nzambi udi wamba ne, “Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamishile njila yebe … tulu tuebe netuikale tuimpe” (Nsumuinu 3:5,6,24).

Pawikale mukengeshibue bua ditabuja diebe

 Bena kuitabuja ba bungi bungi badi bakengeshibue pa buloba lelu. Ba bungi badi mu nzubu ya lukanu bua ditabuja diabo. Pakadi mupostolo Paulo mu nzubu wa lukanu bua kuamba kua Lumu Luimpe, “pakila butuku, Mukelenge wakimana pabuipi nandi, wakamba ne, Kolesha mutshima webe; bu mumuakamba bualu buanyi mu Yelushalema, nunku buudi nabu mbua kubuamba mu Lomo kabidi” (Bienzedi 23:11).

Yesu udi ujimisha mibi ya muntu ne disama dia kaneke

 Dituku dikuabo balunda ba muntu ne disama dia kaneke bakalua nandi mulale pa bulalu buandi kudi Yesu. “Pakatangila Yesu ditabuja diabo, wakambila muena kaneke ne, Muananyi, kolesha mutshima webe, mibi yebe idi mijimishibue” (Matayo 9:2).

 Bikala malu mabi ebe adi akutatshisha mubadi wanyi munanga, lua kudi Yesu. “Bituatonda mibi yetu, yeye udi wa kueyemenyibua ne udi ne buakane bua kubuikidila mibi yetu, ne bua kutulengesha ku malu mabi onso” (1 Yone 1:9).

 Mu luse, Mukelenge wakambila muena kaneke ne, “Bika biebe, ambula bulalu buebe, uye ku nzubu kuebe. Yeye wakabika, wakaya ku nzubu kuandi” (Matayo 9:6,7).

 Mukelenge Yesu udi mukumbane bua makengela etu onso. Mukelenge Davidi wakamba ne, “Bonso badi bakukeba basanke ne bikale ne disanka bua bualu buebe. Bonso badi bananga lupandu luebe bambe matuku onso ne, Yehowa atumbishibue … wewe udi mukuatshishi wanyi ne musungidi wanyi” (Musambu 40:16,17).

Mukelenge udi pabuipi. Lekelayi kuditatshisha
ku bualu bumue; kadi mu malu onso ku ditendelela ne
ku disengelela numanyishe Nzambi bua milombu yenu
ne disakidila. Ne ditalala dia Nzambi didi ditamba
dijingulula dionso dia bantu, nedilame mitshima yenu
ne meji enu mu Kilisto Yesu” (Filipoi 4:5-7).