Dielangana dia Meji pa Lumu
Luimpe lua Yone

No 10

Yesu wakadi nabu mbua kupitshila mu Samalea
bua kusabakena ne mukaji wa ku Samalia du dina dia mayi dia Suka

Pakapingana Mukelenge Yesu mu Galela, mumuke mu Yudaya. “Buakadiye nabu mbua kupitshila mu Samalea. Yeye wakalua ku musoko wa Samalea, dina diawu Suka, pepi ne muaba wakadi Yakoba mupe muanandi Yosefe. Dina dia mayi dia Yakoba diakadipu. Luendu luakatonda Yesu, yeye wakashikama nunku kukala kua dina. Diba diakadi munda munya” (Yone 4:4-6).

 Bena Samalea bakadi ne Lumu Luimpe bualu. Lumu Luimpe lua Nzambi ludi bua buloba bujima ! Mako udi utuambila ne, dituku dikuabo, pakatangila Yesu tshisumbu tshia bantu, wakadi nabo luse, yeye wakabamona “bu mikoko yakadi kayi ne mulami; yeye wakabanga kubayisha malu a bungi” (Mako 6:34). Yesu, Mulami Muimpe wa mikoko, “wakuluila bua kukeba ne bua kusungila tshidi tshijimine” (Luka 19:10).

 Muanda bualu bua mukaji wa ku dina dia mayi dia Suko udi munkatshi mua mianda minene mu Mukanda wa Nzambi. Udi utuambila bu Mufuki wetu, udi wimanyika bintu bionso ku diyi dia bukole buende (Ebelu 1:3), wakadi mushikame kukala kua dina dia mayi, diba diakadi munda munya, mupungile ne luendu luende, windila difika dia mukaji wa mu musoko wakadi nende bualu. Mukelenge Yesu wakamanya malu ende onso. Yeye wakadi ne Musungidi bualu.

 Bayidi ba Mukelenge bakamana kuya mu musoko bua kusumba bia kudia pakalua mukaji wa mu Samalia kusuna mayi. “Yesu wakamuambila ne, Umpe mayi a kunua. Mukaji wa mu Samalia wakamukonka ne, Wewe Muena Yuda udi undombela meme Muena Samalea mayi a kunua tshinyi ? (Bualu bua Bena Yuda kabena babuelakana ne Bena Samalea” (Yone 4:9).

Bua lukuna pankatshi pa Bena Yuda ne Bena Samalea

 Kunyima kua lufu lua mukelenge Solomo, bisamba dikumi bia bisamba dikumi ne bibidi bia Isalele bakatombokela bukokeshi bua bukelenge bua nzubu wa Davidi. Bakashikama mu Samalea, bakadi bamanyibue ku tshikondo atshi bu bukelenge bua Isalele. Bisamba bibidi, Yuda ne Benyamina, wakashala. Yelushalema wakadi musoko wabo munene. Biakadi bimanyibue bu bukelenge bua Yuda.

 Mukelenge wa kumpala wa bukelenge bua Isalele, Yalobama, wakatula tuana tua ngombe tua or tubidi ne wakambila bantu bandi ne, “Tangilayi nzambi yenu, Bena Isalele; yakanulupula mu buloba bua Ejipitu” (1 Bakelenge 12:28). Bena Isalele bakakoma Nzambi wa batatu babo nyima bua kulonda nzambi mikuabo. Bakatendelela nzambi ya bantu bakadi pabuipi nabo ne bakalonda bilele biabo. Bua bualu ebu, Yehowa wakabumusha mu buloba buabo. Mukelenge wa Ashu wakangata Bena Isalele bu bapika ne wakaya nabo ku buloba buende. Yeye wakatuma bantu ba bende bua kushikama mu Samalea, katuena ne mpata bua kudima ne kulama buloba, katataka muinshi mua bukokeshi buende. Yeye wakamana kushiya Bena Isalele bakuabo mu Samalea, musangu mukuabo bua bualu ebu (2 Bakelenge 17:24).

Mukaji wa mu Samalea udi ne dikonka bualu bua mayi a muoyo

 Kunyima kua dikonka dia mukaji: “Wewe Muena Yuda udi undombela meme Muena Samalea mayi a kunua tshinyi ? ” Yesu wakamuandamuna ne, “Bu wewe mumanye dipa dia Nzambi ne wakukulomba ne, Umpe mayi a kunua, wewe wakadi kumulomba ne yeye wakadi kukupa mayi a muoyo. Mukaji wakamuambila ne, Mukelenge, wewe kuena ne tshia kukoka natshi mayi, dina didi dile, wewe udi ne mayi a muoyo kudi kunyi ? Wewe udi mutambe tatuwetu Yakoba, anyi ? Yeye wakatupa dina, wakanuaku ne bana bende ne bimuna biende” (Yone 4:10-12). Yesu wakamuandamuna ne, “Wanua mayi aa neikale ne nyota kabidi, kadi wanua mayi anamupa kena wikala ne nyota kabidi tshiendelele; mayi anamupa neikale munda muende bu mushimi wa mayi abanda mu muoyo wa tshiendelele. Mukaji wakamuambila ne, Mukelenge, umpe mayi aa, tshikadi ne nyota, tshilu too kunoko bua kusuna” (Yone 4:13-15).

Yesu udi wamba kudi muoyo mukese wa mukaji

 “Yesu wakamuambila ne, Ya ubikile mulume webe, ulue biebe kunoko. Mukaji wakamuandamuna ne, Tshiena ne mulume. Yesu wakamuambila ne, Wakuamba bulelela ne, Tshiena ne mulume; bualu bua wewe wakadi ne balume batanu, uudi nende katataka kena mulume webe; wewe wakuamba bulelela. Mukaji wakamuambila ne, Mukelenge, ndi njingulula ne, Wewe udi muprofete” (Yone 4:16-19).

 Katataka Mukaji udi ujingulula ne, Yesu udi muprofete, udi ne makonka bualu bua muaba wa kutendelela Nzambi. “Mukashi wakamuambila ne “Bankambua betu bakadi batendelela ku mukuna ewu; kadi nuenu nudi nuamba ne, Mu Yelushalema mudi muaba udi bantu ne bua kutendelelamu *Tatu” (Yone 4:20).

 [*Mu edition wanyi wa Mukanda wa Nzambi, mvese 20 udi wamba ne, “Bankambua betu bakadi batendelele Tatu ku mukuna ewu”. Dina ne, “Tatu”, didi tshilema tshia traduction. Bantu ba mu matuku a Dipungila Dikulukulu kabakamanya Nzambi bu Tatu. (Francais: “Nos pères ont adoré sur cette montagne-ci”].

 Bilondeshile pa mukenji wa Bena Samalea, bantu bakadi mua kutendelela Nzambi anu ku mukuna wa Gelizima. Bena Yuda bakatendelela Nzambi mu Yelushalema, “musoko wakasungula Yehowa munkatshi mua bisamba bia Bena Isalele bonso bua kutekamu dina diandi” (2 Kulondolola 12:13).

Bena Kilisto badi batendelela Tatu mu muaba kayi ?

 a) Bena Kilisto badi batendelela Tatu mu mutshima wabo. Mupostolo Paulo wakafundila bena Kilisto ba ku Efeso ne, “Nuushibue tente ne Nyuma Muimpe. Nusombeshangane ne misambu ya bena kuitabuja ba kale, ne ya bena Kilisto ne ya Nyuma; [les cantiques spirituelles], nuimbile Mukelenge misambu, numutumbishe ne biombelu bia mitshima yenu. Misangu yonso nusakidile Nzambi Tatu bua bintu bionso mu dina dia Mukelenge wetu Yesu Kilisto” (Efeso 5:18-20).

 b) Bena Kilisto badi batendelela Tatu padibo basangisha popamue ku dina dia Mukelenge Yesu. Mukelenge Yesu wakamba ne, “Ndi munkatshi mua bantu babidi anyi basatu badi badisangisha mu dina dinayi” (Matayo18:20). Paulo wakafundila bena Kilisto ba mu Kolosai ne, “Nusakidile Tatu, wakatuvuija bantu badi mua kuikala babanyanganyi ba bupianyi bua basanto bua mu munya. Nyeye wakatupandisha ku bukokeshi bua midima; wakatubueja mu bukelenge bua Muana wa dinanga diandi. Utudi ne kupikudibua kuetu munda muandi, nkujimisha kua mibi yetu” (Kolosai 1:12-14).

Mushindu wa kutendelela: Mu nyuma ne mu bulelela

 Yesu wakandamuna ku dikonka bua mukaji wa mu Suko bualu bua muaba wa kutendelela ne, “Mukaji, witabushe diyi dianyi, diba nedilue dikala bantu kabayi batendelela Tatu ku mukuna ewu anyi mu Yelushalema. Nudi nutendelela tshinudi kanuyi bamanye; tuetu tudi tutendelela tshitudi bamanye; bualu bua lupandu ludi lufuma kudi Bena Yuda. Kadi diba nedilue, didiku katataka mene, diatendelela batendeledi balelela Nzambi mu nyuma ne mu bulelela; Tatu udi ukeba bantu ba nunku bamutendelele. Nzambi udi Nyuma; budi bamutendeledi nabu mbua kumutendelela mu nyuma ne mu bulelela” (Yone 4:21-24).

 Anu bena Kilisto ba bushuwa bamanye mua kutendelela mu nyuma ne mu bulelela. Bena Kilisto ba bushuwa badi “baledibua kudi Nzambi” (Yone 1:13). Badi ne dipa dia Nyuma Muimpe. Mupostolo Paulo wakafundila bena ditabuja ba ku Efeso ne, “Nuenu kabidi, panuakamana kunvua diyi dia bushuwa kudiye, lumu luimpe lua lupandu luenu, panuakamuitabuja kabidi, nuakangata tshimanyishilu tshia Nyuma Muimpe mulayibue” (Efeso 1:13). “Bikala muntu kayi ne Nyuma wa Kilisto, kena wa Kilisto nasha” (Lomo 8:9).

Mukaji udi uuya bua kuambila bena musoko bualu bua Yesu

 Mukaji kakadi mumanye mua kulama malu a kusambakena ne Yesu pa nkayandi. Wakashiya mulondo wende wa mayi ku dina, wakaya ku musoko lukasa, wakambila bena musoko ne, “Luayi numone muntu wakungambila malu onso anakenzenza; nyeye Kilisto, anyi ? Bakalupuka mu musoko, bakadi balua kudiye. Bakuabo ba bungi kabidi bakitabuja bua diyi diandi, bakambila mukaji ne, Tuakuitabuja katataka, kambualu bua diyi diebe, tuakudiunvuila, tudi bamanye ne, Bulelela, ewu udi Musungidi wa ba pa buloba (Yone 4:29,30,41,42).

“Nunku bua bualu buandi [bualu bua Yesu],
tufilafile kudi Nzambi mulambu wa
kumutumbisha nawu, udi biawu
mamuma a mishiku idi ijukula
ditabuja dia dina diandi”
(Ebelu 13:15).