Dielangana dia Meji pa Lumu
Luimpe lua Yone

No 9

Yone Mubatiji: Mulunda wa Mubaki wa Mukaji

 “Pakashika malu aa, Yesu ne bayidi bandi bakalua mu luseke lua Yudaya; wakashalaku tshitupa ubatiza bantu. Yone kabidi wakadi ubatiza bantu mu Ainona pepi ne Salima, bualu bua mpokolo ya mayi yakadiku ya bungi; bantu bakalua, bakabatijibua. Kabakadi banze kuela Yone mu nzubu wa lukanu. Bayidi ba Yone bakadi ne Muena Yuda mpata bua kudiuvua. Bakalua kudi Yone, bakamuambila ne, Labi, uwakadi nandi dishiya dia Yadene, uwakambila bantu, udi ubatiza bantu, bantu bonso balualua kudiye” (Yone 3:22-26).

Bayidi ba Yone badi ne diyisha bua Yesu bualu

 Yone Mubatiji, mudianjidi wa Mukelenge Yesu, wakatshidi mubikile Bena Yuda bua kukudimuna mitshima yabo ne bua kuitabuja lumu luimpe bualu buende, “Muana wa Mukoko wa Nzambi, udi umusha bubi bua ba pa buloba” (Yone 1:29). Bayidi bandi bakalua kudiye, bakamuambila ne, “Labi, uwakadi nende dishiya dia Yadene, uwakambila bantu, udi ubatiza bantu, bantu bonso balualua kudiye”.

 Bayidi ba Yone bakadi bamulonda bu mulombodi wabo, bakamubikila ne, “Labi”, dina dia kanemu, dipa kudi bayishi, kuandamuna kua muaku ne, “Mfumu”. Yone udi mumanye ne, Umue udi Mfumu wabo: Yesu, wakabandamuna ne, “Muntu kena mumanye mua kudiangatshila tshintu, kabayi bamupetshi tshifume mu diulu. Nuenu nudi bamanyi banyi ne nakamba ne, Tshiena Kilisto, kadi nakutumibua kumpala kuende. Udi ne mukaji udi biandi mubaki wa mukaji; kadi mulunda wa mubaki, pimaneye nende, patelesheye diyi diende, neatambe kusanka bualu bua diyi dia mubaki; ka disanka dianyi didi dikumbane. Budiye nabu mbua kutumba, bundi nabu mbua kupueka” (Yone 3:27-30).

 Yone wakadi muena kalolo. Mukanda wa Nzambi udi wamba ne, “Kudisua kua muntu nekumupuekeshe, kadi udi ne mutshima mupuekele neapete buneme” (Nsumuinu 29:23).

Yone Mubatiji udi “muntu munene ku mesu kua Mukelenge” (Luka 1:15)

 Yone wakadi wa mulongo wa bakuidi ba Bena Isalele, tatu wende Zakayo, wakadi muakuidi, ne mamuende Elizabeta, wakadi wa mu bana bakaji ba Alona (Luka 1:5). Muanjelo wa Mukelenge wakambila Zakayo ne, “Yeye neakudimushe mitshima ya bana ba Isalele ba bungi kudi Mukelenge Nzambi wabo” (Luka 1:16). Mukelenge Yesu wakamba bua bualu buandi ne, “Munkatshi mua bakalelabo kudi bakaji kamuakadi mukuabo mutambe Yone” (Luka 7:28).

 Yone wakadi muntu wa kueyemenyibua, muena mudimu muimpe wa Mukelenge Yesu. Mudimu wende wakakuama mamuma a bungi. Mukelenge Yesu wakamba ne, “Meme ndi muonshi munene, nuenu nudi matamba; wikala munda muanyi, meme muikale munda muandi, yeye neakuame mamuma a bungi; binuikala kanuyi nanyi, kanuena bamanye mua kuenza bualu. Tatu wanyi udi utumbishibua mu bualu ebu ne, Nudi nukuama mamuma a bungi; nunku nenuikale bayidi banyi” (Yone 15:5,8).

Yone udi utamba kusanka bua diyi dia Mubaki wa mukaji

 Mubaki ba mukaji udi Mukelenge Yesu (Yone 3:29). Yone wakadi mua kuyikilangana nandi pakadiye pa buloba, yeye wakenza mudimu nandi mu kuambila kua lumu luimpe. Mukenji wabo wakadi ne, “Matuku akukumbana, bukelenge bua Nzambi budi pepi; kudimunayi mitshima yenu, nuitabuje lumu luimpe” (Mako 1:15). Bakadi mua kusanka popamue, bu bobo badi basanka mu matuku a kunowa, kunyima kua kumiamina maminu akavudisha maminu makuabo a bungi.

Yone wakadi mulunda wa Mubaki wa mukaji, kadi mukaji udi nganyi?

 Mukaji kena Isalele. Mu Dipungila Dikulukulu Nzambi wakamba ne, “Nakumusha Isalele ne nakamupa mukanda wa kushipa kua dibaka dietu nandi” (Yelemiya 3:8). Isalele wakadi mumonebua bu mukaji wa masandi, yeye wakalonda nzambi mikuabo ya bena mpingu bakadi bamunyunguluka.

 Tudi tubala mu Mukanda wa Nzambi bua tshikondo padi Mukelenge Yesu neikale mumonebua bu Mubaki wa bakaji mu Diulu. Mupostolo Yone wakafunda ne, “Tusanke, tuikale ne disanka dinene, tumupe butumbi, bualu bua dibaka dia Muana wa Mukoko diakulua, ne mukaji wandi wakadilongolola. Bakapa mukaji bua kudiluatshisheye ne tshilulu tshia line tshilengele, tshidi tshikenka ne tshitoke; bualu bua tshilulu tshia line tshilengele tshidi bienzedi biakane bia basanto. Yeye udi ungambila ne, Funda ne, Badi babikidibua ku bidia bia dibanji bia Muana wa Mukoko badi ne disanka. Yeye udi ungambila ne, Aa adi meyi malelela a Nzambi”. (Buakabuluibua 19:7-9).

 Ekeleziya wa Nzambi udi umonebua mu Dipungila Dipia-dipia bu mukaji musela (2 Kolinto 11:2). Mupostolo Paulo wakafunda ne, “Balume, suayi bakaji benu bu muakasua Kilisto ekeleziya kabidi, wakadifila bua bualu buandi; bua yeye amujidile, mumane kumulengesha ne kuvua kua mayi ne diyi diandi; bua yeye aditekele ekeleziya kumpala kuende bu wa butumbi, kayi ne ditoba ne mufudi anyi tshintu tshikuabo tshia nunku; kadi bua ekeleziya ikale wa tshijila ne kayi mupishibue” (Efeso 5:25-27).

Banganyi badi babikidibua ku bidia bia dibanji bia Muana wa Mukoko?

 Musangu mukuabo Yone Mubatiji, bu mulunda wa Mubaki wa mukaji, udi ubikidibua ku bidia bia dibanji, musangu mukuabo ne bonso bakitabuja Nzambi mu matuku a Dipungila Dikulukulu, kadi Mukanda wa Nzambi kawena utuambila banganyi nebikale benyi, anu ne, Badi babikidibua badi basanka. Benyi kabena mua kuikala Ekeleziya bualu bua Ekeleziya udi mukaji musela.

 Kuledibua kua Ekeleziya kuakadi kunyima kua dibika dia Mukelenge ku lufu, ne dibanda diandi mu Diulu. Pashishe, pakalua dituku dia Pentekoste, Nyuma Muimpe wakapueka, bu muakadi mulayi wa Mukelenge Yesu kudi bayidi bandi (Bienzedi 1:4-8. 2:1-4). Dituku adi diakadi tshibangidilu tshia dibaka dia Ekeleziya, Mukelenge Yesu wakamana kuambila bayidi bandi bualu buawu. Yeye wakabambila ne, “Nengibake ekeleziya wanyi; bibi bia ku mbelu kua Muaba wa Bafue kabiena bimupita bukole” (Matayo 16:18).

Kupidia dipa dia lupandu dia Nzambi mbualu bukole

 “Udi mutuma kudi Nzambi udi wamba meyi a Nzambi; bualu bua yeye kena umulobela Nyuma. Tatu udi musue Muana wandi, wakafila bintu bionso mu bianza biandi. Udi witabuja Muana udi ne muoyo wa tshiendelele; kadi udi upidia Muana kena umona muoyo, tshiji tshia Nzambi tshidi tshishala nandi” (Yone 3:34-36).

 Message wa muambi wa Lumu Luimpe udi ne, Tangile kudi Mukelenge Yesu Kilisto bua lupandu. Usungule muoyo. “Tuetu mene netupanduke munyi, bituapetula lupandu bunene nunku”? (Ebelu 2:3).

“Biwajukula ne mukana muebe mene ne, Yesu
udi Mukelenge, ne biwitabuja mu mutshima webe ne, Nzambi
wakamubisha ku bafue, neusungidibue … muntu yonso
watendekena dina dia Mukelenge neasungidibue”
(Lomo 10:9,13).