33ème COMMUNAUTE EVANGELIQUE REGION SANKURU

33ème C.E.R.S

B.P. 1673 KANANGA

"Sur ce roc je bâtirai mon assemblée,..." Matthieu 16v18

Les éléments de menu en rouge contiennent des informations récemment mises à jour.

Dielangana dia Meji pa Lumu
Luimpe lua Yone

No 5

Yesu ne Bayidi bandi badi babikidibua ku Dibaka (Yone 2:1-12)

“Bualu ebu buakenza Yesu mu Kana wa Galela buakadi bua kumudilu bua bimanyinu biandi, wakaleja bantu butumbi buandi; bayidi bandi bakamuitabuja” (Yone 2:11).

Dibaka dia mu Kana wa Galela

 “Pakapita matuku asatu, dibaka diakadi mu Kana wa Galela; mamu wa Yesu wakadiku; bakabikila Yesu ne bayidi bandi ku dibanji. Pakashika nvinyo, mamu wa Yesu wakamuambila ne, Kabena ne nvinyo. Yesu wakamuambila ne, Mukaji, ndi nebe bualu kayi? Diba dianyi kadiena dianze kulua” (Yone 2:1-4.)

 Bidi bimueneka ne, Bantu ba bungi bakadi babikidibue ku disanka dia dibaka. Malia wakambila Mukelenge Yesu ne, “Kabena ne nvinyo”. Musangu mukuabo diandamuna diende kudi muamuende didi ditushiya ne dikonka bualu buadi. Mu société wetu wa lelu, bua muntu kubikila mamuende ne “mukaji”, udi uleja kanemu kenaku. Mu matuku pakadi Yesu pa buloba mu muaku wa bantu kabuakadi nunku.

 Pakadi Malia wa Magadala udila ku lukita lua Mukelenge Yesu, yeye wakamona banjelo babidi bashikame baluate bilulu bitoke too, munga ku mutu, mukuabo ku makasa, pakadi tshitala tshia Yesu tshiladika. Bakamukonka ne, “Mukaji, udidila tshinyi?” Pakatangila Yesu Malia wa Magadala pepi ne lukita luende, Yeye wakamuambila ne, “Mukaji, Udi udidila tshinyi?” Meyi akamba Mukelenge Yesu ne banjelo kabidi kudi Malia wa Magadala akadi meyi kanemu ne a dinanga. (Tangila Yone 20:11-16).

 Musangu mukuabo Mukelenge Yesu wakakanda mamuende ndambu, pakamuambileye ne, “Kabena ne nvinyo”. Yesu wakamuandamuna ne, “Mukaji, ndi nebe bualu kayi? Diba dianyi kadiena dianze kulua”. Musangu mukuabo, yeye wakadi bua kuyila ne, Katataka Muana wanyi wa balume wakushiya diku dianyi bua kuikala mu mudimu wa Tatu wende. Mukelenge Yesu wakambila ne, “Tshiakafuma mu diulu bua kuenza bu mundi musue, anu bu mudi wakuntuma musue” (Yone 6:38).

Malia udi wambila bena mudimu meyi a meji

 Malia wakambila bena mudimu ne, “Enzayi muanuambileye” (Yone 2:5). Malia wakenza bimpe. Yeye wakabambila meyi a meji. Mbidi bimpe bua kunvua meyi a Mukelenge wetu kutudi ne bikale benji ba diyi diende (Yakobo 1:22. Luka 6:47-49).

 “Milondo isambombo ya mayi misonga ya mabue yakadi mitekela bua mayi a kuowa bu mudi tshilele tshia Bena Yuda, mulondo lita makumi tshitema, mulondo lita makumi tshitema. Yesu wakabambila ne, Nuuje milondo tente ne mayi. Bakayiuja too ne ku mibangu yayi. Yeye wakabambila ne, Nutunte, nuye nandi kudi udi pa mutu pa dibanji. Bakaya nandi” (Yone 2:6-8).

 Musangu mukuabo, pakadi Yesu pa buloba, nvinyo bua dibanji dia dibaka wakadi mutekete, kayi ne alcool wa bungi. Alcool udi unyanga mioyo ya bantu ba bungi be. Mukanda wa Nzambi udi wamba ne, “Nvinyo udi museki wa bantu, maluvu makole adi bu muena diyoyo; muntu yonso udi ubikuatshika kena ne meji. Udi udila ne, Ndi ne mulawu nganyi? Udi ne kanyinganyinga nganyi? Udi ne matandu nganyi? Udi utontolola nganyi? Udi ne mputa pambidi kayi wenza bualu nganyi? Udi ne mesu makunze-kunzuu nganyi? Mbadi bashikama ku maluvu musangu mule; mbadi baya kuteta maluvu masambakaje. Kutangidi maluvu a nvinyo patshidiwu makunze, padiwu engelela munda mua lupanza, padiwu apueka bitekete pa muminu. Kunshikidilu adi asuma bu nyoka, adi asuma bu nyoka wa mbanvu” (Nsumuinu 20:1. 23:29-32). “Pakalabula wakadi pamutu pa dibanji mayi akukudimuka nvinyo, pakadiye kayi mumanye kuakufumeye (kadi bena mudimu bakatunta mayi bakamanya), wakadi pamutu pa dibanji wakabikila mubaki wa mukaji, wakamuambila ne, Bantu bonso batu bafila nvinyo muimpe diambedi; panuabo wa bungi, nebafile udi kayi muimpe kunyima; kadi wewe wakakuteka nvinyo muimpe too ne katataka” (Yone 2:9,10).

Bena mudimu bakamanya

 Bena mudimu ba Mukelenge badi bamanye malu ende. Yeye wakambila bayidi bende ne, “Nenuikale balunda banyi, binuenza bu mundi nuambila. Tshiena nubikila kabidi bapika; bualu bua mupika kena mumanye budi mukelenge wandi wenza; kadi nakunubikila balunda; bualu bua nakunumanyisha malu onso anakunvua kudi Tatu wanyi” (Yone 15:14,15).

Bimanyinu bia mu Lumu Luimpe lua Yone

 “Bualu ebu buakenza Yesu mu Kana wa Galela buakadi bua kumudilu bua bimanyinu biandi, wakaleja bantu butumbi buandi; bayidi bandi bakamuitabuja” (Yone 2:11).

 Tshimanyinu tshia kumpala mu Lumu Luimpe lua Yone tshiakaleja butumbi bua Mukelenge Yesu. Pepi ne nshikidilu wa mukanda wende, Yone wakafunda ne, “Yesu wakenza bimanyinu bikuabo bia bungi ku mesu kua bayidi, bidi kabiyi bifundibua mu mukanda ewu; kadi malu aa adi mafundibue bua nuenu nuitabuja ne, Yesu udi Kilisto, Muana wa Nzambi; ne bua nuenu nuikale ne muoyo mu dina diandi, panuitabuja” (Yone 20:30,31). Ditabuja dia bayidi bende diakadi dijadikibua. Bakadi bamonyi ba butumbi buende. Bakitabuja ne, “Yesu udi Kilisto, Muana wa Nzambi”.

Mukelenge Yesu udi ulombela bantu bende Nzambi

 Pakadi Mukelenge Yesu pepi bua kutufuila pa mutshi mutshiamakane, yeye wakalombela bantu bende Nzambi. Wakamba ne, “Ewu udi muoyo wa tshiendelele, bua bobo bakumanye wewe, Nzambi umuepele mulela, ne yeye uwakutuma, Yesu Kilisto mene (Yone 17:3).

Bualu bua dibaka

 Nzambi wakajadika dibaka dia kumpala mu Budimi bua Edene. “Yehowa Nzambi wakamba ne, Kambimpe bua mulume ashale nkayandi nansha, nemmufukile mukuatshishi bu mudiye (Genese 2:18). Mu matuku etu bantu ba bungi badi bapidia dilongolola dia Nzambi, Mufuki wetu, bua dibaka. Bua bualu ebu kanyinganyinga ka bungi kadiku. Bana ba bungi kabena bamanye dinanga ne disanka dia diku dijalame. Mbidi bimpe kulonda Diyi dia Nzambi. “Diyi diebe didi muinda ku makasa anyi ne munya muteme mu njila wanyi” (Musambu 119: 105).

“Badi bateleja diyi dia Nzambi,
badi badilama, badi ne disanka!”
(Luka 11:28).

145, Avenue du commerce, quartier Tshinsambi, commune de Kananga (Kasaï-Central, RD Congo)

Notre Site Web copyright© cers. Tous droit réservés.